Arusia ş-ataca ali infrastructurâ țivilâ
Armâsâturi di droni aruseșțâ asparti di apârarea ucraineanâ agiumsirâ diznâu pi teritoriul ali Românie, aproapea di sinurlu cu Ucraina.
Tașcu Lala, 31.07.2024, 18:22
Armâsâturi di dronâ aruseascâ furâ aflati tu unâ localitati dit giudețlu Tulcea, aproapea di sinurlu cu Ucraina, dupâ atacurli dit noaptea di marţâ câtâ ñiercuri pisti infrastructura țivilâ şi portuarâ dit vâsilia viținâ, deadi tu șteari Ministerlu ali Apârari Naţionalâ. Alti armâsâturi di droni agiumsirâ tu spaţiul aerian românescu ş-noaptea alantâ, când Arusia ș-ahurhi diznău ataca. MApN dzâsi că tuti zonili iu câdzurâ armâsâturi di droni suntu anaparti di locurli iu bâneadzâ oamiñi ş-nu avurâ zñie elementili di infrastructurâ.
Caplu a Statlui Major ali Apârari, ghenerallu Vlad Gheorghiţă, dzâsi că zona di ceamaunâ poati s-aibâ ș-ahtări riscuri, ama cathi oarâ easti mutritâ cu angâtan zona, ta s-nu aibâ niți un piriclliu. Vlad Gheorghiţă: “Cara s-aflâ fragmenti, lipseaști sâ știm a curi suntu. Eali sunt mutriti cu angâtan ditu punctu di videari chimic, ditu punctu di videari spectral. S-adarâ multi testi, ta s-nâ asiguripsim că nu ari canâ piriclliu ni ti duñeauâ, ni ti locu, ti canâ ți poati s-llia parti la ahtari evenimentu”.
Tu ațeali dauâ nopţâ tu cari dronili xeani agiumsirâ tu spaţiul aerian românescu, a oamiñloru dit zonâ lâ si pitricurâ mesaji RO-ALERT, iara Forţili Aeriani Români mutrirâ ș-viglliarâ zona. Ațel ți u ari borgea ali Emburlâchi ali Ambasadâ a Federaţillei Aruseascâ Bucureşti fu cllimat la Ministerlu di Externi, iu âlli si dzâsi că autorităţli români câtiyursescu aesti acti.
România giudicâ sertu acţiunili ‘iresponsabili’ ali Arusie, dzâsi ministrul di Externi, Luminiţa Odobescu. Tu arada a lui, prezidentul a Senatlui, liderlu PNL Nicolae Ciucă, dzâsi că România easti tu siguranţâ ş-că atumțea anda zburâm di ițido fuvirseari ti securitatea a noastâ, lucrul nai ma di simasie easti s-armânem isihi tu ahtări catandisi. ‘Him tu unâ moabeti fârâ curmari ş-coordonari cu aliaţlli, ma multu cu vâsiliili dit Apirita ali NATO. Așkerea a noastâ mutreaști tuti fuvirserli ți pot sâ s-facâ.’, dzâsi Nicolae Ciucă pi un singir di suțializari.
Tu arada a llei, NATO spusi că nu veadi tu aestu evenimentu niți un semnu di atacâ faptâ castilea/maxus di Moscova pi teritoriul ali Alianţâ, ama ahtări acțiuni suntu iresponsabili şi cu piriclliu. Uidisit cu un comunicat ali organizație, NATO ş-criscu misurli di viglleari și mutreari tu reghiunea ali Amarea Lai, tamam ș-prit viglleari aerianâ. România ari un sinur di 650 di km cu Ucraina ş-tu aestu an dit soni câdzurâ ma multi ahtări armâsâturi di droni aruseșțâ pi teritoriul a llei.
Autor: Daniela Budu
Apriduțearea: Aurica Piha
