Asocieri istorică la Uniunea Europeană
Foc di zboarâ ancruţil’eati, tru prota giumitati a aiştei stâmânâ, anamisa di Statili Unite şi Rusia! Prezidentul american Barack Obama fuvirsi Moscova cu năi sancţiuni cara aestâ nu va s-facâ aţea turlie tra s-hibâ n’icşurati mintireaşili dit apirita ali Ucrainâ, ti cari u-ari şubeia că nu easti xeană. Ma ninti, ruşl’i avea faptâ timbihi că va s-l’ia apofasi di avigl’eari ma s-iasâ tru migdani că acordurli di asocieri ţi va s-hibâ simnati, viniri, anamisa di Uniunea Europeană, di unâ parti, şi Ucraina, Ripublica Moldova şi Georgia, di alantâ parti, va s-aducâ zn’ie tru economie.
Roxana Vasile, 26.06.2014, 12:34
Foc di zboarâ ancruţil’eati, tru prota giumitati a aiştei stâmânâ, anamisa di Statili Unite şi Rusia! Prezidentul american Barack Obama fuvirsi Moscova cu năi sancţiuni cara aestâ nu va s-facâ aţea turlie tra s-hibâ n’icşurati mintireaşili dit apirita ali Ucrainâ, ti cari u-ari şubeia că nu easti xeană. Ma ninti, ruşl’i avea faptâ timbihi că va s-l’ia apofasi di avigl’eari ma s-iasâ tru migdani că acordurli di asocieri ţi va s-hibâ simnati, viniri, anamisa di Uniunea Europeană, di unâ parti, şi Ucraina, Ripublica Moldova şi Georgia, di alantâ parti, va s-aducâ zn’ie tru economie.
Ripublica Moldova şi Georgia va li simneadzâ acordurli di asociere şi comerţ libir ahândusit, chiro tru cari Ucraina — maşi partea economică a documentului a curi capitoli politiţii furâ simnati, cu ndoi meşi ninti. Moscova, aesti documente suntu vidzuti ca un artifiţiu prit cari aţeali trei stati ies di sum sfera a l’ei di influenţă. Bruxelles, al’iumtrea, multu ambiţioasili achicâseri suntu lugursiti ca hiindalui istoriţi. Prezidentul, pi ipotisiţ tru aestu chiro ali Comisie Europena, Jose Manuel Barroso:
Prit aestă simnari, Uniunea Europeană ş-l’ia borgea tra s-hibâ totâna ninga Georgia, Ripublica Moldova şi Ucraina pi calea cari va s-ducâ la alâxearea a lor tru democraţii stabili şi cu prucuhie. Acordurli nai cama ambiţioasi pâzârâpsiti până tora di Uniunea Europeană mutrescu s-ahânduseascâ ligâturli politiţi şi economiţi şi s-agiungâ cu integrarea preayalea-ayalea aţeali trei vâsilii tru pâzarea unică europeană. Easti di simasie s-cundil’edz, diznău, că achicâserli suntu tră ţiva lucru şi nu contra a vârnui. Nu mutrim s-avem ligâturi exclusivi cu aesti vâsilii.Avem pisti tru societăţli şi tru economiile dişcl’isi.
Chişinău, ţi easti la ma puţân di 500 di kilomeatri alargu di Bucureşti, putearea pro-occidentală veadi tru simnarea a acordului di asociere cu Uniunea Europeană unâ mari victorie. Va s-aprâftâseascâ, ama, aestâ s-aducă prucuchia multu aştiptată di cătră cetăţean’il’i majoritari românofon’i a ex-sovieticâl’ei Ripublicâ Moldova? Icâ va s-armânâ maşi tru catastisea di carti simnată? Guvernul ali Ripublicâ, andrupât niacumtinat di România tru gaereţli a l’ei europeani, lugurseaşti că easti di sinfer naţional tra să-şi anvartuşeadzş ligşturli cu Uniunea. Pi lungu chiro, s-veadi nica şi membră a ‘clublui’ comunitar.
Până atumţea, va s-lipseascâ s-ndreagă unâ Europă tru miniatură la ea acasă, dimec s-timil’iuseascâ standardi europene di democraţie şi prucuchie tră tuţ cetăţean’il’i a l’ei. Acordul va s-da cali ti unâ integrari europeană ma ahândoasă em dit videala politicâ, em şi aţea economicâ. Va s-ndreagâ tru idyea scarâ, un cadru di cooperari tru dumenii cata cum comerţul, politica di securitate şi cultură. Cu un zbor, va s-agiutâ la alâxearea niacumtinatâ ali Ripublicâ Moldova tru unâ văsilie europeană modernă. Valabil — easti cu nâdia — nica ş-tră Georgia şi Ucraina !
Armanipsearea: Tascu Lala
