Bana politică după alidzerli prezidenţiale

Trei membri cu mari vazi di la PSD – Mircea Geoană, Marian Vanghelie şi Dan Şova – fura avinat, gioi, dit prota formaţiune politică ti easti la guvernari. El’i fura stipsiţ, maxus, di călcarea a printipiului tra unitatea a partidlui. Votlu ti avinarea dit partid fu dat tru prota andamusi di lucru di chipita a PSD după eşeclu a liderlui Victor Ponta tru alidzerli prezidintiale di la giumitatea a aistui mes. Ca ti ciudie, cumandusearea a partidlui nu-l’I agudi atel’I ti suntu cabati tra chirearea a alidzerlor, ghini ma Victor Ponta s-u lo ama borgea tra scorlu amintat la scrutin.

Valentin Țigău, 28.11.2014, 13:52

Trei membri cu mari vazi di la PSD – Mircea Geoană, Marian Vanghelie şi Dan Şova – fura avinat, gioi, dit prota formaţiune politică ti easti la guvernari. El’i fura stipsiţ, maxus, di călcarea a printipiului tra unitatea a partidlui. Votlu ti avinarea dit partid fu dat tru prota andamusi di lucru di chipita a PSD după eşeclu a liderlui Victor Ponta tru alidzerli prezidintiale di la giumitatea a aistui mes. Ca ti ciudie, cumandusearea a partidlui nu-l’I agudi atel’I ti suntu cabati tra chirearea a alidzerlor, ghini ma Victor Ponta s-u lo ama borgea tra scorlu amintat la scrutin.

Tru arada ali andamusi di lucru, s-apufusi amânarea, ti primveara a anlui 2015, a Consiliului Naţional şi a Congreslui PSD cari va s-aleaga una noauă cumanduseari a formaţiunil’ei politica di stânga şi va s-vuluseasca un nau proiectu politic tra România a yinitorlor tinti ani. Protlu reper di simasie a PSD lu reprezintă alidzerli legislative dit 2016 ama, până atumtea, formaţiunea ş-pripuni, asi cum spuni premierlu Victor Ponta, tra s-aiba borgea ti actul a guvernaril’ei. Victor Ponta:

“Vrem s-parastisimu, tru parlamentu, prota s-prota, una formulă alxita di guvernu şi bugetlu tra anlu 2015, atea turlie câ proiectili buni s-hiba bagati tru lucru ma largu.”

Primlu-ministru nica cundil’e că guvernul va s-aiba ngatan maxus dumen’ili di nviţămintu, sănătate şi infrastructură. Ligat di imaginea di ansamblu a formaţiunil’ei a lui, Victor Ponta spusi că strategil’i a partidlui lipseasti tra s-afla una cearei cari să spuna că PSD s-arupsi acutotalui di tricutlu chiro, di comunismu şi că easti una formaţiune alaxita, europeană.

Cara eşeclu a liderlui a lor tru alidzerli prezidintiale nu al’i candasi social-democraţl’i tra s-caftă ţachil’i cari s-da giueapi, ia că una reacţie fu silighita dit sinlu a UDMR, partener la guvernare. Prezidentul a UDMR, Kelemen Hunor dimanda, gioi, că s-apufusi, tru Consiliul Permanentu, ca Uniunea s-iasă di la guvernare, dupa ti 80% dit voturli a maghiarlor dit România s-deadira tra libearalu Klaus Iohannis, amintatorlu a alidzerlor dit soni. Kelemen Hunor:

“Noi lugursim că votlu, em dit protlu tur şi maxus dit turlu doi, fu un mesaj multu limbid di partea a alegătorlor a noştri şi nu căftam alti exighiseri. Noi lom apofasea tra sa u anvartusim ligatura cu alegătorl’ii a noştri.”

Tru idyiul chiro, liderlu a maghiarlor dit România spusi că tradzearea napoi a formaţiunil’ei a lui nu va s-aduca instabilitati politică, ti furn’ia ca PSD şi partenerl’ii a lui va s-aiba, nica si fara UDMR, una majoritati tru Parlamentu. Ma multu, UDMR s-l’ia borgea tra s-ndrupasca tuti acţiunile cari va s-nchiseasca cu una jgl’ioata ninti tra cetăţeni, nica s-tra maghiarl’ii dit România.

Armanipsearea: Tascu Lala