Banca Europeanã di Investiţii va s’da pãradz ti construcţia autostradãllei Piteşti – Sibiu
România amintã pãradzlli di la Banca Europeanã di Investiţii trã proiectulu autostradãllei Piteşti-Sibiu.
Tașcu Lala, 12.10.2025, 19:23
Banca Evrupeanã di Investiţii da pãradz, un miliardu di ivradz ti construcţia autostradãllei A1, Piteşti-Sibiu, prota autostradă pritu munţã a Româniillei. Calea cu mari iruşi cari va-lli strãbatã munţãlli Carpaț easti nai di simasie proiectu di infrastructură rutieru a cratlui. Viniţ vizită tru România cu furñia ti simnari contractulu di finanţari tru tiñia di 500 miliuñi di ivradz, s’clliamã, prota cumatã ditu unã paketã di un miliardu di ivradz, pitricuţllii a bancãllei s’andãmusirã, București, cu premierlu Ilie Bolojan. Aestu cundille simasia ti anvãrtusearea lucãrlui deadunu cu BEI şi cu alti instituţii finansiari ivrupeani, tru stresu parteneriatu cu Comisia Ivrupeană.
Premierlu scoasi tu migdani că, tru hãvaia a borgiloru ţi li-ari loatã mutrindalui imnaticlu fiscalu-bugetaru, agiutorlu a bancãllei easti di simasie trã cofinanţarea proiectiloru ţi suntu acãţati cu isapi tu planlu bugetaru naţionalu, asigurândalui duţearea ma largu şi bãgarea tu lucru a investiţiiloru. Contractulu trã prota cumatã di finanţari fu simnatu di ministurlu a Finanţiloru, Alexandru Nazare.
Tutu cu tut, proiectulu custuseaşti aproapea 5,5 miliardi di ivradz. Cu unã lundzimi di 122 di km, autostrada Piteşti-Sibiu easti ampărţãtă tru ţinţi cumãţ. Proiectul, cari faţi parti ditu şingirea ţentralã di purtari transeuropeanã şi ditu Master Planlu Gheneralu di Transportu ali Românie, ahurhi tu marţu 2020 a deapoa, isapea spuni cã va s’hibã bitisitu pãnu di trimesturlu IV anlu 2028. Proţlli scupadz ali investiţie au tu planu creaştirea hãirlãticã a şingirlui di transportu și ñicurarea oarili di urdinari. Un altu scupo easti sigurlãkea rutierã şi unã ligãturã ma bunã anamisa di reghiuñili ditu România cu şingirili europeani di transportu.
„Simnarea aluştui contractu easti unã nauã spuneari a borgillei a noastã ti andruparea dizvultarillei reghionalã şi ti adrari unu thimelliu vãrtosu trã creaştirea competitivitatillei ali Românieˮ, spusi ministurlu a Finanţiloru, Alexandru Nazare. El cundille că aestu easti un proiectu di simasie ivrupeanã cari va s’da silã a investiţiiloru şi va s’aducã nãi locãri di lucru, iarapoi hãirlãticlu va s’veadã tru economie şi tru bãnaticlu di cathi dzuuã a cetăţeañilor, pritu cãlliuri sigura şi ligãturi cama iruşi ti urdinari.
Tu arada a lui, viţeprezidentulu a Băncãllei Ivrupeanã di Investiții, Ioannis Tsakiris, spusi cã aesta easti unã investiţie tru oamiñi, sigurlãki şi oportunităţ ti agiutã ti urdinãrea iruşi, ma sigura şi cama va s’da di mãnã a oamiñiloru nica şi ti pãrmãtiili ţi voru purtari. „Proiectul va s’da silã la competitivitati şi va li leagã comunităţli, demonstrândalui că unia ivrupeanã aduţi prucukie pi lungu kiro şi ligãtura hãirlãticã suţialãˮ, cama spusi Ioannis Tsakiris.
Duţearea ma largu a finanţarillei easti acãţatã tu isapi defturlu contractu, cu tiñia di 500 miliuñi di ivradz, poati s’hibã vulusitu tu prota giumitati a yinitorlui anu.
Autoru: Leyla Cheamil
Armãnipsearea: Taşcu Lala
