Bitisearea a FITS 2025
S-bitisi unâ nauâ ediţie a Festivallui Internaţionalu di Teatru di Sibiu, nai ma marli evenimentu ti artili a spectacollui.
Tașcu Lala, 30.06.2025, 14:07
Ediţia 2025 a Festivallui Internaţionalu di Teatru di Sibiu, unâ ditu nai ma mărli andamusi artistiți pi planu mondialu, s-bitisi dumânicâ, dzuuâ anda sucăchili a câsâbălui transilvăneanu furâ amplini di minari, ti ațea ditu soni oarâ la aestâ ediţie, di paradi, acrobaț, dansatori şi spectacoli cu foc. Iara dupâ conțertul ditu Pâzarea Mari al Damian Drâghici s-feați unu spectacolu multimedia cu droni, videiuri şi muzicâ. Tu ațeali dzați dzâli câtu țânu Festivallu s-dizvârtirâ aproapea 850 di evenimenti, iu loarâ parti 5.000 di artişțâ ditu cama di 80 di vâsilii.
Tema di estanu – Hâristuseri – fu, dzâcu organizatorilli, ligâtura anamisa di cuvârdâlâki, harauâ și putearea ta s-dai hări, emoţii şi ligâtura anamisa di artişțâ şi public, ți s-fați cu agiutorlu a tâtloru ațelli ți andrupăscu aestu proțesu ti miraki. Prezidentul a festivallui, Constantin Chiriac:
“Cu tuti mărli dukimâseri pi hiota akirolui, di simasie easti haraua a andamusiloru şi, ma multu, posibilitatea s-amințâ alti andamusi tu yinitoru ți va s-agiungâ platformâ, va s-adarâ ma avutâ, va s-adunâ alțâ soț, alţâ oamiñi şi, tu idyiul kiro, s-veadâ duñeaua salami că aestâ isnafi fu, easti și va s-armânâ ma largu unâ isnafi di simasie ti aestu câsâbă ți ari steauâ ş-ți ahârdzaști steali ş-cari, anaparti di tuti, nu ari mintea ali unâ pirifani individualâ, ama mași apufiseaști ți va s-dzâcâ haraua ali unâ isnafi ș-ali unâ nai ți adarâ aestâ andamusi tu numa a diversitatillei, a calitatillei a spectacoliloru, ama prota ki prota, a oamiñiloru.”
Estanu, şapti steali năi furâ adâvgati pi Sucakea a Oamiñiloru cu Anami. Pritu cânâscuț a curi lâ fu ahârdzitâ aestâ nișani, furâ și cânâscuțlli actori americañi Kathleen Turner şi Bill Murray, catacumu şi, postmortem, dramaturglu româno-frâncu Eugen Ionescu, maestrul a teatrului a absurdului. Kathleen Turner, teatrinâ şi regizoari, nominalizatâ la premiul Oscar, mârtirisi că âlli lo multâ hari ți află Sibiu ş-dzâsi că ari tu umuti s-yinâ diznău tu 2026 la Festivallu di Teatru.
“Minduescu că di multi ori nâ dukimu irmuxiț. Iara ațea ți aflaiu aoa, Sibiu, tu arada aluștui festivalu, suntu len-turlenu di formi, di imaginaţie, di conţinut”, dzâsi teatrina. Iarapoi multu cânâscutlu comediantu Bill Murray, unlu ditu cama tiñisițlli artişțâ ditu Americhie, nominalizatu la Oscar, lâ hâristusi a sibieñilor ti cumu lu aprukearâ ş-ti steaua ți âlli fu ahârdzitâ pi Sucakea a Oamiñiloru cu Anami. “Mi ciudusi tutu aestu evenimentu. Nu şteam că oamiñilli va s-calcâ pi numa a mea ti câtu kiro va s-bânedzu”, dzâsi marli teatrinu, cu umorlu a lui ți lu aleadzi di alanțâ. Dumânicâ, tu ațea ditu soni dzuuâ a Festivallui, Bill Murray giucă pi sțena ali Filarmonicâ di Stat, tu spectacolli “Lumi năi”.
Autor: Ștefan Stoica
Apriduțearea: Mirela Biolan
