BNR va ta s’u-apridună inflația
Banca Naţională a Românillei u criscu rata a toclui di politică monetară la 2% tru an, di la 1,75% tru an, şi apufusi s’ţănă sumu controlu lichiditatea di pi păzarea monetară. Easti treia andamusi arada a cumăndusearillei BNR tru cari easti criscutu toclu-clleaie, tru s’u aibă sumu control inflaţia, cari creaşti cama iruşi andicra di cumu s’minduea.
Eugen Coroianu, 11.01.2022, 21:25
Specialiştilli a băncăllei estimeadză că tru yinitoarea perioadă va s’crească şi tocurli practicati di bănţă la mpărmuturli ţi li da ti populaţie şi companii, ama şi la depozite, aflate nica la un nivel multu ñicuratu. Tutunăoară, BNR apufusi s’li ţănă nivelurli actuale a ratelor rezervelor minime obligatorii tră pasivili tru lei şi tru valută a instituţiilor di mpărmutu. Dan Suciu, purtătorlu di zboru a băncăllei, declară la postul național di radio:
“Ti amărtie, inflaţia easti prinţipala găilipseari, tră aţea că vidzumu tru kirolu ditu soni crişteri a aluştui indiţi. Nu easti maş tru România aestă catandisi, easti ună catandisi tu plan mondial, di itia prota ş-prota a păhadzloru la energie. Vidzumu tuţ evoluţia a păhadzloru la energie – energie electrică, gaze, combustibili. Tuti aestea zñiipsescu ahănda aestu indiţi şi, aestă indiţi la criştearea di păhadz şi tru alti tipologii di păhadz – aeasta nsimneadză neise inflaţie, cându avem ună creaştire generalizată a păhadzloru.
Ti amărtie indiţili a nostru di inflaţie, pisti 70% ditu componența a lui easti faptă di itia a păhadzloru la energie, ti cari apofasili di politică monetară, pi cari li llia Banca Centrală di crişteari a toclui, au efecti relativ ñicurati, aşi că prinţipala a noastră armată, cari easti aestu tocu di politică monetară, nu easti multu hăirlătică contra a păhadzloru la energie. Ama aţea ţi minduimu s’adrămu, şi pistipsimu că tru partea a dauă a anlui va si s’veadă limbidu aestu lucru, easti ta s’ligămu aştiptărli inflaţioniste, s’ayălisimu criştearea di păhadz la alanti componenti.”
Simfunu cu BNR, activitatea economică ş’agălisi cabaia criştearea tru trimestrul III 2021, la 0,4%, di la 1,5% tru trimestrul lI, alliumtrea di aştiptări. Tru idyiulu kiro, dinamica anuală a PIB cundille ună scădeari vizibil ma pronunţată tru trimestrul III andicra di aţea antiţipată, ama armasi ma largu analtă ditu videala istorică, cu aportul majoritar a consumlui privat, cum şi cu atelu multu mari adus, şi tru aestu interval, di variaţia a stocurlor.
Tutunăoară, rata a şomajului ş-corectă maş aoa şi aclo tru yismăciuni crişterli semnificativi consemnati tru doilli meşi di ma ninti, iara tru sumedru armasi constantă, di armasi vizibil pisti valorli pre-pandemiţi. Apofasili BNR mutrescu aduţearea diznău şi ţănearea a ratăllei anuală a inflaţiillei tru linie cu ţinta staţionară di 2,5% plus / minus 1 punct proţentual, tru ună turlie cari s’aibă contributu ti realizarea a unei creaştiri economică sustenabilă, nica să spuni tru comunicatlu ali instituție.
Autor: Eugen Coroianu
Armânipsearia: Taşcu Lala
