Bugetu, ama nu cu năi taxi

Suţata di guvernare di București PNL-PSD-UDMR va s’pitreacă a Parlamentului, până tru 20 di andreu, pripunirea mutrinda nomlu a bugetului di stat tră s’hibă acăţatu tru debate şi vulusitu. Aţeali trei partidi ş-pripusiră s’acaţă tu debatu și s’vulusească strategia fiscal-bugetară pi 2022 până di Crăciun. Proiectul di nom tră bugetlu di stat lipseaşti s’hibă adratu aţea turlie tra s’aibă fonduri tră investiţii, tră criştearea a pensiilor şi alocaţii di stat, iara deficitlu bugetar s’hibă ţănut sum control. Idheea a născăntor năi taxe cari s’hibă băgati tru proiectul di nomu a bugetului di stat scoasi tu migdani muabeţ tru suţata nău adrată. Liberalii cundilleară, nica nă oară, că nu va s’aibă năi taxi tru bugetlu pi anlu yinitor.

Leyla Cheamil, 13.12.2021, 19:58

Suţata di guvernare di București PNL-PSD-UDMR va s’pitreacă a Parlamentului, până tru 20 di andreu, pripunirea mutrinda nomlu a bugetului di stat tră s’hibă acăţatu tru debate şi vulusitu. Aţeali trei partidi ş-pripusiră s’acaţă tu debatu și s’vulusească strategia fiscal-bugetară pi 2022 până di Crăciun. Proiectul di nom tră bugetlu di stat lipseaşti s’hibă adratu aţea turlie tra s’aibă fonduri tră investiţii, tră criştearea a pensiilor şi alocaţii di stat, iara deficitlu bugetar s’hibă ţănut sum control. Idheea a născăntor năi taxe cari s’hibă băgati tru proiectul di nomu a bugetului di stat scoasi tu migdani muabeţ tru suţata nău adrată. Liberalii cundilleară, nica nă oară, că nu va s’aibă năi taxi tru bugetlu pi anlu yinitor.

Cu tuti aestea, PSD şi UDMR vor s’bagă ună taxă di 1% a companiilor cu ţifră di afaceri di pisti 100 di miliuñi di euro. Taxa poati s’asiguripsească, uidisitu cu UDMR, păradz la buget tră investiții tru sănătati și educație. Mediul di afaceri şi spusi niifharistusearea andicra di aestă misură. Prezidentulu liberal, Florin Cîţu, aduţea aminti că aeasti companii păltiră tru avans taxi la buget tru apriiuru anlu tricut, atumţea cându economia fu ncllisă. El cundille că nu easti tiñisitu că eale s’hibă penalizate. Tu arada a lui, premierlu Nicolae Ciucă deadi asiguripseri că nu va s’aibă ună ahtari taxă. “Tamamu ti aţea nă lomu borgi tru programlu di guvernari: anlu aestu nu va s’avemu aestă taxă. Programludi guvernari fu aprobat tru parlamentu şi va s’hibă băgatu tu practico aşi cum fu aprobatˮ, cundille Nicolae Ciucă.

Şi ministrul a Finanţilor, Adrian Câciu, deadi asigurări că bugetlu va s’hibă construit fără s’bagă taxi năi şi iţi alăxeri a regimlui fiscal va s’hbă fapti predictibil, pi thimellilu a unui dialog cu mediul privat. El spusi că România ari ananghi, tora, di solidaritati tră să-lli veaglle, afirească pi româñilli cu amintatiţi ñiţ di criştearea-a păhadzloru, maxusu a aţiloru di la energie. “Va s’adrămu aesta stimulânda economia şi firmili cari produc tru România, cari ţi s’hibă naţionalitatea acţionariatlui a lor, di itia că tut aţea ţi s’favrică tru România s’faţi cu lucrători români. Un produs favricat tru România nsiamneadză locuri di lucru tră români. Andrupănda producătorllii ditu România, dămu garanţii ma mări tră suti di ñilli di lucrători că va s’aibă locuri di lucru stabile şi siguriˮ, nica spusi ministrul a Finanţilor, Adrian Câciu.

Tu arada-a lui, liderlu social-democrat, Marcel Ciolacu, declară că, mac ava s’apufusească, tru coaliţie, băgarea a unăllei nauă taxă, aesta nu va s’bagă tru practico ună ş-ună, vadelu hiinda di şasi meşi. Di altă parti, tru aţea ţi mutreaşti zona di evaziune fiscală şi adunari a TVA, aestu spusi că văsilia ari mări probleme la aestu capitol. “Tru aestă oară, s’estimeadză că România ari ună evaziune fiscală la 10% ditu PIB. 34% ditu TVA nu easti adunatu tru Româniaˮ, feaţi timbihi Marcel Ciolacu.

Autoru: Leyla Cheamil

Armânipsearea: Taşcu Lala