Chişinău, catandisi greau
Hiindaei tut ma stuhinatâ di baia contestări tu mass-media şi tu sucachi, ş-di soţietatea ţivilâ, ama ş-di opoziţia di stânga, putearea di Chişinău, aspusâ pro-ocţidentalâ, easti bâgatâ la stimzmâ şi tu Parlamentu. Marţâ, deputaţl’ii socialişţâ anyrâpsirâ unâ moţiuni di cenzurâ contra a guvernului tripartitu, adrat di liberali-democraţ, democraţ şi liberali şi cumândisit di năulu lider a proţlor, Valeriu Streleţ.
Bogdan Matei, 21.10.2015, 12:27
Hiindaei tut ma stuhinatâ di baia contestări tu mass-media şi tu sucachi, ş-di soţietatea ţivilâ, ama ş-di opoziţia di stânga, putearea di Chişinău, aspusâ pro-ocţidentalâ, easti bâgatâ la stimzmâ şi tu Parlamentu. Marţâ, deputaţl’ii socialişţâ anyrâpsirâ unâ moţiuni di cenzurâ contra a guvernului tripartitu, adrat di liberali-democraţ, democraţ şi liberali şi cumândisit di năulu lider a proţlor, Valeriu Streleţ.
Caplu a socialişţâlor, Igor Dodon, hâbârisi că a s-ducâ pânâ iu s-nu mai poatâ ta s-l’ia demisia a aţilui di tora Executiv şi ta s-aducâ alidzerli parlamentari antiţipati: Noi câftăm demisia a aţilor ţi cumândisescu ma multi instituţii, câftăm şi demisia a Guvernului Streleţ. Nica va s-câftăm şi demisia a prezidentului şi alidzearea a aluştui şi vrem alidzeri parlamentari antiţipati, ţi lipseaşti s-hibâ andreapti ti primvearea a anlui ţi yini.
Chiola ş-ampartu, cu fraţl’ii a lor duşman’i, buniteaţa ali Moscovâ şi voturli a cetăţen’ilor cu vreari sovieticâ, comunişţâl’ii, cumândisiţ di aţel di ma ninti prezidentu ali Republicâ, Vladimir Voronin, hâbârisirâ ca va s-andrupascâ lucurlu a socialişţâlor, ta s-ascoatâ di pi ipotisi cabinetlu politic al Streleţ şi s-bagâ tu loc unlu dit tehnocraţ. Tora ayoniea intrat pi ipotisi, di niţi trei meşi, premierlu minduiaşti că moţiunea contra a Cabinetlui a lui caftâ s-aspargâ catandisea politicâ şi icunumicâ, şi aşi nu para bunâ: Caftâ s-bagâ tu practico aţea ţi vreau ei di multu: dânâsearea a Republicâl’ei Moldova di la îndreptul a ei strategic, îndreptul di integrari europeanâ. Contra a Republicâl’ei Moldova s-andreadzi un complot. Giocurli suntu adrati şi tora lipseaşti tu Parlamentu maşi actul dit soni: votlu pi asumta ti demisia a unui guvernu proeuropean.
Nâinti, şi prezidentul Nicolai Timofti avea dzâsâ că anvirinarea andicra di prestaţia a instituţiilor publiţi şi a nâscântor demnitari easti ufilisitâ di puteri ţi caftâ sâ ş-scoatâ inatea, neo-sovietiţi, ţi vor s-dânâseascâ calea câtâ Europa. Ca moţiunea ahurhitâ di stânga s-treacâ, lipsescu 51 di voturi tu Parlamentul adrat dit 101 di deputaţ. Socialişţâl’ii şi comunişţâl’ii nu au ahâti voturi, ama, pi unâ sţenâ politicâ ţi nu anyilici canâoarâ tu fidelitati, nu sunt scoasi dit ecuaţii problemi tu arcul guvernamental. Lucurlu cari ahurhi naua catandisi politicâ fu arestarea, stâmâna ţi tricu, a aţilui di ma ninti premier şi lider liberal-democrat, Vlad Filat.
Câbati di trafic di influenţâ şi aruşfeti, di aproapea 250 di milioani di dolari, tu marli scandal mutrinda dispariţia a unui miliardu dit sistemlu bancar ali republicâ, Filat agudi greu imaginea a propriei tabărâ. Adzâ, Chişinău, dzâc analişţâii, ecuaţia politicâ pari că nu-ari andridzeari. Câ ţe aşi-dzâsili soluţii suntu, pi di unâ parti, unâ puteari cari, tu apanghiul a gesturilor pro-europeani, deadi iamâ a Republicâl’ei Moldova, iara pi di altâ parti, unâ opoziţii cari s-alavdâ cu alumta contra a aruşfetâl’ei, ama fuvireaşti s-u arucă disnău vâsâlia tu Arusii.
