Chivernisea ș-llea diznău borgea
Cabinetlu di suțâlle di Bucureşti va ș-llea borgea ti unu proiectu di reformâ ali administraţie publicâ.
Tașcu Lala, 09.02.2026, 17:26
Mirachea ali chivernisi ta sâ-și llea borgea tu parlamentu tu 29 di yinaru tu ți mutreaști proiectul ti reforma ali administraţie publicâ, armasi nialâxitâ, dzâți purtâtoarea di zboru a executivlui di Bucureşti, Ioana Dogioiu. Proiectili mutrindalui reforma ali administraţie şi relansarea icunomicâ, ti cari s-apufusi loarea a borgillei, suntu aştiptati la parlamentu cușia dupâ bitisearea și apruchearea a loru tu şedinţă di chivernisi, vahi pânâ tu bitisita a stâmânâllei ți yini.
Protlu ministru Ilie Bolojan cundille că misurli ti administraţie asiguripsescu, pritu alti lucri, criştearea a pâradzloru proprii a autorităţlor locali şi scadu hărgili di personal tu dimarhiili cu numir para mari di arugaț. Pâradzlli economisiţ ași va s-poatâ s-hibâ pitricuț câtrâ serviții cama buni ti țetăţeañi, cundille Ilie Bolojan, iara dupâ spusa a lui, s-așteaptâ şi descentralizarea a axiiloru şi stimularea a criștearillei localâ.
Ilie Bolojan: “Administraţia localâ ditu Românie llea ditu pâradzlli a llei sumi multu ma ñiț di suma di arada a vâsiliilor ali Uniune Ivropeanâ, hiindalui dependentâ tu unâ misurâ multu mari di transferurli di la bugetlu di stat. Cara aesti transferuri va li avem ti fonduri, nu va s-hibâ unâ cripari, ama România transferâ aesti fonduri âmprumutânda-lui-si, sumi ti cari pâltimu tocuri cabaia mări”.
Suțial-dimucraţlli, ți sunt tu proțes di evaluari a rollui a lor tu coaliţie şi a arastillei ta s-facâ parti ditu ea, câftarâ, unâ oarâ cu reforma ali administraţie, chivernisea sâ-și llea borgea ș-ti misurli di relansari ali economie. Aestea au credit fiscal criscut ş-alti efculii ti stimularea a năilor investiţii, dirmi garanţii ti IMM-uri ică scâderi artimai ti investiţiili tu xitâxeari-dezvoltari.
Sorin Grindeanu, liderlu PSD: “Nu putem maș sâ zburâmu di tâlleri, di scâderi, maca s-va ca PSD-lu s-facâ parti ditu aestâ suțatâ, unu lucru ți noi lu dzâțemu di şasi meși. Suntu misuridi dipu normali, suntu misuri ți nu agudescu bugetlu, suntu misuri ți va s-adarâ bunu. Nu poţ sâ scadz exichea bugetarâ pritu tâllearea di investiţii ş-pritu scâdearea a putearillei di ancupârari, scadz exichea tu unâ turlie cu ndreptu maca creşțâ icunomicu.”
Cabinetlu a suțatâllei PSD – PNL – USR – UDMR ari chiola unâ istorie avutâ tu loarea a borgillei, unâ proțedurâ ayuñisitâ ta s-bagâ unu proiectu guvernamentalu, ama ți easti cu piriclliu di cara majoritatea leghislativâ easti slabâ ş-nu poati s-dânâseascâ unâ moţiuni di cenzură ți poati s-facâ, la cari opoziţia ari ndreptul tu aestâ catastisi.
Cabinetlu Bolojan ş-u lo borgea ti unâ protâ pachetâ di reformâ fiscal-bugetarâ, iara toamna ți tricu u adră – nota bene – di ținți ori, ti reformi mutrindalui sânâtatea, fiscalitatea şi reorganizarea a companiilor di stat. Tuti moţiunili di cenzurâ bâgati di opoziţia populistâ, ultranaţionalistâ, nu furâ aprucheati.
Autor: Florenta Zaharescu
Apriduțearea: Mirela Biolan
