Comisarlu ivropean ti migrație, București
Comisarlu ivropean ti emburlâkea di nuntru şi migraţie, Magnus Brunner, tiñiseaști gairețli ali Românie tu lucurlu a migraţielli şi securizarea a sinurloru.
Tașcu Lala, 26.10.2025, 04:04
Comisarlu ivropean ti emburlâkea di nuntru şi migraţie, Magnus Brunner, ți easti tu unâ vizitâ Bucureşti, alâvdă România ti lucurlu a llei ți agiutâ la vigllearea a sinurloru di nafoara ali Uniuni Ivropeanâ. Protlu raportu di evaluari/mutreari dupâ aprukearea acutotalui la spaţiul Schengen easti furñia ti cari ufițiallu ivropean vizită România, iu lo parti la ma multi andamusi di lucru.
Prota ditu eali fu cu șeflu a cratlui, Nicuşor Dan, iu zburârâ di vigllearea a sinurloru di nafoara ali Uniuni, maxus tu catastisea a unlui polimu hibrid şi turlia tu cari statili membri lucreadzâ deadunu ta s-alumtâ cu aestu fenomen, ași cum scrisi pi platformili di suțializari prezidentul. Vizita a ufițiallui ivropean s-bitisi, ama, la Ministerlu di Emburlâki di Nuntru, iu dzâsi că tiñiseaști gairețli ali Românie ti curmarea a migraţillei contra a nomlui şi turlia profesionistâ tu cari easti andreptu lucurlu la sinurlu ți agiumsi s-hibâ parti ditu Spaţiul Schengen.
“Avem borgea s-vâ agiutăm cu gairețli ți li aveț ti adrari tu Românie, ama ș-la livelu a tâtâloru alântor vâsilii membri. Noi dăm s-vâ andrupâm nu maș finanțiar, pritu dari di pâradz, ama ș-pritu lucurlu ali Frontex. Aghenția ari unâ capațitati mari tu Românie, lucru ți s-dukeaști lișor ma s-acâțăm tu isapi poziţia a llei, ş-nâ pripusimu s-duțemu ma largu aestâ andrupari ali Românie”, dzâsi Magnus Brunner.
Comisarlu ivropean dzâsi nica că ari unâ akicâseari cu tuti vâsiliili membri ta s-adarâ unâ reformâ tu dumenea di dari di azil ş-di migraţie, iara aesta va s-ducâ ninti pânâ tu cirișar 2026. Tu arada a lui, Cătălin Predoiu, ministrul român di Nuntru, dzâsi că raportul, ți lipseaști s-hibâ scosu tu padi tu meslu brumar, va s-aducâ surprizi pozitivi ti lucurlu ali României la țânearea a securitatillei tu zona Schengen. Tutnâoarâ, România va ș-țânâ idyea poziţie susto ș-di aoa ș-ninti:
“Vigllemu nu mași România, teritoriul naţional şi securitatea a țetăţeañilor româñi, ama vigllemu şi sinurlu di apiritâ și notu-apiritâ ali Uniuni Ivropeanâ. Di aoa yini și sinferlu ta sâ zburâmu di aestu lucru cu Comisarlu Ivropean. Di pțânu kiro s-bitisi prota misiuni di mutreari a turliei cum lucfreadzâ România cu sistemili Schengen. Arada aesta, ca vâsilie membrâ, parti ditu Schengen, raportul ufițialu va s-hibâ scosu tu padi tu melsu brumaru. Ama akicâsii di la domnul Comisar că nu va s-cârteascâ ma s-dzâcu kiola public că fu unâ vizitâ multu bunâ ş-că România tricu multu ghini aestu testu. Ş-raportul ufițial va sâ scoatâ tu migdani multi surprizi pozitivi ti vâsilia a noastâ. Va s-aspunâ că noi zburâm dealihea ninti di intrata tu Schengen şi că nâ țânumu zborlu ș-tuti borgili dupâ intrata tu Schengen.”
Ași, dupâ vizita a comisarlui ivropeanu, România aspusi, ași cumu u dzâsirâ emu prezidentul Nicuşor Dan, emu ministrul Cătălin Predoiu, că lucreadzâ ca unu membru responsabil a spaţiului Schengen, fârâ alatusi mări ți s-ducâ la misuri di ananghi.
Autor: Mihai Pelin
Apriduțearea: Mirela Biolan
