Comunicat di presa

Tașcu Lala, 23.12.2013, 12:40

Miniştril’i di externi ali Românie şi Ripublica Albania, Titus Corlăţean şi Ditmir Bushati alâxirâ cărţâ, tru contextul a evenimentilor ndreapti tră yiurtusearea 100 di an’i di ligâturi diplomatiţi anamisa di ateali dauă vâsilii.

Tru cartea pitricută di ministurlu român tră afaceri externe, Titus Corlăţean, a omologlui albanez Ditmir Bushati, suntu adusi aminti ligâturli streasi anamisa di aţeali dauă stati, ţi au la thimel’iu momenti istoriţi comuni şi cabaia semnificativi, pi fondul a rolâl’ei ţi u avu vâsilia a noastră tră thimil’iusearea a statlui albanez modernu, România hiindalui protlu stat cari u pricunuscu independenţa statală ali Albanie.

Ministurlu Titus Corlăţean yilipseaşti tru mesajlu pitricut cu aestâ furn’ie tradiţiile şi valorli comuni mbârţitati di aţeali dauâ vâsilii pi lungu chiro şi cari ţânurâ cheptu la mărli provocări ţi ţânearea şi anvârtuşearea a libirtatil’ei, democraţiil’ei şi prucuchiil’ei. Cathi stat ş-vidzu pâ di mardzinâ eforturli, tru aeşţâ 100 di an’i dit soni, prit apartenenţa comună la organizaţii internaţionale di simasie şi vrearea di afirmare a identitatil’ei europenâ tu unâ progresivă simfunizari cu standardili şi valorli promovati di Uniunea Europeană, un altu momentu di simasie a aluştui imnaticu hiindaluisimarea semnarea di cătră Albania a Protocolui di Intrari la NATO, la Summit-lu ali Alianţă cari s-ţânu Bucureşti tru 2008.

Tricutlu a nostru comun şi momentul importantu di yiurtuseari tră 100 di an’i di relaţii anamisa di ateali dauă stati nă cl’iamâ ti unâ nauâ abordari a dialoglui politic, cata cum şi a cooperaril’eio pi livel sectorial. Am nâdia că relaţiile di cooperari anamisa di ateali doauă state va s-creascâ şi tru yinitu, cunuscut hiindalui potenţialu real a aţilor doauă vâsilii, ti hâirlâtica un-alantu a populilor român şi albanez” ngrâpsi ministurlu român ti omologlu a lui albanez Ditmir Bushati.

Tu idyea scarâ, tu carti easte cundil’eatâ poziţia constantă şi sânâtoasâ ali Românie, di ndrupari a imnaticlui european ali Tirană, cu accentu maxus ti dutearea ma largu a agiutorlu pân di mardzinâ, românescu tră sâ-l’i si da statutlu di candidat la UE, ali Albanie.

Tru bitisitâ, Titus Corlăţean cundil’eadzâ cândâsearea a partil’ei români că vârtoasili ligâturi istoriţi avuti pi hioteas a chirolui cu elitili intelectuale, economiti şi sociale albanezi, nica şi cu imigraţia albaneză dit vâsilia a noastră, membril’i a comunitatil’ei aromâni şi absolvenţâl’ii albanezi di studii tru România, suntu spunerli palpabili a patrimoniului comun cultural, lingvistic, social şi politico-diplomatic ahâtu avut, ţi lâ da un caractir frâtescu tră ligâturli bilaterale, anaparti di ligâturli di aradă diplomatiţi.

Alti informaţii:

Relaţiili diplomatiţi furâ apufusiti la 15/28 di andreu 1913, la nivel de legaţie, dupu un an di la proclamarea a independenţâl’ei ali Albanie. Dit 1939, Bucureşti şi Tirana, era dişcl’isi Consulate. La 17 di marţu 1948, s-ndreapsirâ diznău relaţiili diplomatiţi la nivel de legaţie, a deapoa la 30 di cirişar 1954 aesti agiumsirâ pi livel di ambasadă.

La 15 di andreu 1913, M. N. Burghele fu aleptu tu harea di ministru plenipotenţiar şi pitricut extraordinar a Regatlui ali Românie pi ningă guvernul albanez di Durres.

La 7 di andreu 2013, tru prezenţa a autorităţilor locale, a reprezentanţâlor a Ambasadâl’ei ali României tru Ripublica Albania, cata cum şi a reprezentanţâ MAE român, s-dişcl’isi Consulatlu Onorific ali Românie tu câsâbălu Korçë. Tru perioada interbelică, eara dişcl’is Korçë un Consulat Onorific ali Românie. Dişcl’idearea a unui nău Consulat Onorific ali Românie tru Korçë fati parti dit dalga di manifestări organizate tră yiurtusearea a ţentenarlui tră ligâturli diplomatiţi româno-albaneze. Oaspitlu di tin’ie a evenimentului eara ministurlu tră afaceri externe a Ripublicâl’ei Albania, Ditmir Bushati.

Ambasada ali Românie la Tirana ndreapsi, cu furn’ia a ţentenarlui tră relaţiili bilaterali româno-albaneze, aesti evenimente: un simpozion ştiinţific Relaţii culturali şi istoriţi româno-albaneze” (Korcea, 26-27 di marţu 2013), un Concertu di muzică clasică albaneză şi românească ndreptu di muzicien’il’i dit Albania absolvenţâ a Universitatil’ei Naţionalâ di Muzică di Bucureşti (Teatrul Naţional di Tirana, 18 di sumedru 2013), vernisajlu a expoziţiil’ei ”Cartea Albaneză tru România: 1844 — 1913”, (Biblioteca Naţională ali Albanie, 9 di andreu 2013).

20 di Andreu 2013

Armanipsearea: Tascu Lala