Consiliul Ivopreanu di Bruxelles
Prezidentul ali Românie, Nicuşor Dan, lo parti la protlu a lui Consiliu Ivropean, di Bruxelles, iu deadi asiguripseri că naua kivernisi di Bucureşti va sâ scadâ defițitlu bugetar şi aspusi diznău andruparea ti proțeslu di aprukeari ali Republicâ Moldova la Uniunea Ivropeanâ.
Tașcu Lala, 27.06.2025, 15:31
Șcurtu kiro dupâ ți lo parti la Summit-ul NATO di Haga, prezidentul ali Românie, Nicuşor Dan, s-dusi deadunu cu alanțâ lideri ditu Uniunea Ivropeanâ la Consiliu di Bruxelles. Pi aghenda a prezidentului furâ emu temi icunomiți ti Bucureşti, catacumu scâdearea unâ ș-unâ a xikillei bugetar, capitol iu România easti pi protlu locu tu UE, emu subiecti di politicâ externâ ş-di sigurlâki.
Tu ți mutreaști capitollu icunomic, Dan zburâ cu prezidențâlli a Consiliului ş-ali Comisie Ivropeanâ, Antonio Costa și Ursula von der Leyen, di planlu ali României ta sâ-și scadâ xikea, ama ș-ti amânarea a proiectilor finanţati pritu Planlu Naţional di Redresari şi Rezilienţâ. El lâ dzâsi a doiloru că România va ta s-aibâ Bruxelles pisti pi ea ș-că lucreadzâ, prota ki prota, ti dânâsearea a hărgiurli a cratlui şi, dapoaia, ti criştearea a taxilor.
Prezidentul român deadi tu șteari că kivernisea va sâ scoatâ tu migdani, tu 8 di alunaru, protlu setu di acţiuni, iara, di cara România va s-ducâ ninti pi calea di bâgari tu practikii a apofasiloru, va sâ zburascâ dipriunâ cu Comisia şi Consiliul ti niscânti alâxeri tu aesti apofasi, ma s-hibâ ananghi. Tu arada a loru, instituțiili ivropeani va s-mutreascâ, cându ș-cându, ta s-hibâ siguri că xikea bugetarâ scadi ași cumu ș-loarâ borgea.
Ti subiectili di arada tu moabeț ș-ti ațeali ți furâ di prota thesi tu Consiliului Ivopeanu, dirmi sigurlâkea a continentului, criștearea a industrillei ivropeanâ di apârari, andruparea ali Ucrainâ ş-tindearea ali UE, România pripusi dauâ temi ti moabeț: strateghia la Amarea Lai şi ţânearea a andruparillei ali Uniuni ti Republica Moldova.
Tu declaraţia di arada ditu bitisita a summit-ului, statili membri apufusirâ fâțearea ma lungâ cu șasi meși a sancţiunilor contra ali Arusie, presiuni bâgatâ pi Kremlin, și ș-aspusirâ diznău andruparea ti Ucraina şi vrearea ta s-ducâ ma largu calea ivropeanâ ali Ucrainâ ș-ali Republicâ Moldova. Şefa ali Comisie Ivropeanâ, Ursula von der Leyen dzâsi că Uniunea deadi aoa ș-pțânu kiro nica unu miliardu di ivradz ti industria di apârari ucraineanâ, pâradz ți yinu ditu valorificarea a lucriloru aruseşțâ loati cu zorea, ș-easti etimâ s-da alanti 11 miliardi ți armasirâ te-a dari ași cumu fu apufusitu tu arada G7.
Tutnâoarâ, prezidentul ali Românie luyurseaști că, tu 3-4 stâmâñi, Bucureştiul poati s-pitreacâ planurli di achiziţii ta s-putemu s-nâ hârsimu di programlu ivropean di ânarmari şi ghinui bâgarea ali Republicii Moldova pi aghenda a summit-ului, la pripunearea ali Românie. Dan deadi tu șteari că sâ zburâ ti: reformili ți Chişinăulu li adră tu calea ivropeanâ, andruparea tu problemili di thimelliu şi summit-lu UE-Republica Moldova, ți va s-dizvârteascâ tu 4 di alunaru tu capitala moldoveanâ. Dupâ spusa a prezidentului român, evenimentul di Chişinău easti unâ provâ ti mirakea a statilor membri di duțeari ma largu a proțeslui di apruckeari la UE a statlui di nastânga a Prutlui.
Autor: Sorin Iordan
Apriduțearea: Aurica Piha
