Covid-19, un miliuni di cazuri tru România
România năstricu, sâmbătă, praglu di 1 miliuni di infectări cu năulu coronavirus. Ditu bitisita a meslui şcurtu a anlui ţi tricu, cându autoritățli raportară protlu caz di lăndzidzari, până tora, ditu aţelli cama di 1 miliuni di româñi cari loară viruslu, cama di 900 di ñilli s-vindicară, ama tu idyiulu kiro cama di 25 di ñilli chirură alumta cu Sars-CoV-2. Indicatoru a zorillei la cari easti, nica, stuhinatu sistemlu medical easti numirlu a lăndzidzloru internaț la terapie intensivă. După ţi, un kiro, aestu numir dănăsi la aproapea 1.200-1.300 di cazuri ndzuuă, tu aestă oară, el agiumsi anvărliga di 1.500. A deapoa ministerlu a Sănătatillei spuni că situația easti dramatică, apaturli la ATI suntu tutu ma pţăni dzuua di dzuuă: tu niscănti giudeţi numata ari ici vără locu. Easti urut shi lăhtărosu, ama maş morţălli pot s-ducă la eleferisirea di apaturi.
Roxana Vasile, 12.04.2021, 13:48
România năstricu, sâmbătă, praglu di 1 miliuni di infectări cu năulu coronavirus. Ditu bitisita a meslui şcurtu a anlui ţi tricu, cându autoritățli raportară protlu caz di lăndzidzari, până tora, ditu aţelli cama di 1 miliuni di româñi cari loară viruslu, cama di 900 di ñilli s-vindicară, ama tu idyiulu kiro cama di 25 di ñilli chirură alumta cu Sars-CoV-2. Indicatoru a zorillei la cari easti, nica, stuhinatu sistemlu medical easti numirlu a lăndzidzloru internaț la terapie intensivă. După ţi, un kiro, aestu numir dănăsi la aproapea 1.200-1.300 di cazuri ndzuuă, tu aestă oară, el agiumsi anvărliga di 1.500. A deapoa ministerlu a Sănătatillei spuni că situația easti dramatică, apaturli la ATI suntu tutu ma pţăni dzuua di dzuuă: tu niscănti giudeţi numata ari ici vără locu. Easti urut shi lăhtărosu, ama maş morţălli pot s-ducă la eleferisirea di apaturi.
Nica ditu 2020, autoritățli ditu dumenea sanitară ş-loară borgea s-ndreagă locuri ma multi la terapie intensivă ti oamiñilli ţi suntu tu ananghi. Maş că, tu loc di cearei, s-adusiră justificări și meatri provizorii cari adusiră, di multi ori, niifharistusearea ali opinie publică. Easti cazlu a episodlui di viniri noaptea, di București, di la nai ma modernulu și ma căftatlu spitalu di ortopedie ditu România – Foișor. Unitatea medicală di elită fu alăxită tu spital cari s-yitripsească maş lăndzidzlli di Covid, a deapoa tră aesta, cama di 100 di paciență cari eara internaț aclo cu lenu turlii di lăngori, născănţă feaţiră hirisi maş cu ndauă săhăţ ninti, fură ică duşi tu alti locări, ică ălli pitricură acasă cu salvări i cu aftukinatili a loru.
Haua di la poarta-a spitalulu Foișor fu pitricută nyie di televiziuñile ţentrali: paciență greu lăndzidz, mulță tu ilikie, era scoși pi tărdză, tu căruţiki cu arăhoati i cu ciumădzli cu cari s-ndrupăscu tu imnari; soia a loru alăga să-lli veadă desi suntu a loru și să-lli prillea di la yeaţră și asistenti; protestatarlli ţi agiumsiră iruşi aclo s-pindzea cu giandarmilli pitricuţ s-kivernisească ma s-hibă di s-facu mintireaji; a deapoa reporterllii și cameramañilli alăga na ndreapta și na stănga s-adună mărtirii.
Işiră tu migdani tu săhăţli yinitoari, și spunerli a născăntoru lăndzidz tu greaua hală cari, programaț ti intervenții chirurgicale la Spitalu bucureștean di ortopedie, fură hăbărisiţ că operațiili lă suntu curmati. Una pisti alantă, și tu aestă oară cură stepsurli andicra di turlia tu cari autoritățli, cari ţi s-hibă eali – ministru ică subalterñi, akicăsiră tra s-află ma multi apaturi di terapie intensivă ti lăndzidzlli di Covid.
Profesorlu Vasile Astărăstoae ţi ma ninti eara prezidentulu a Colegiului a Yeaţărlor ditu România, spuni isapea, tru un articol, tră multili alathusi a evacuarillei di viniri, di la Foișor, și cundilleadză că “apufusitorlli lipseaşti s-akicăsească că anda ufiliseşţă Putearea daima lipseaşti s-ai responsabilitati mutrinda apofasili ţi li lleai.”
Autor: Roxana Vasile
Apridutearea: Taşcu Lala
