Cumu va s’hibã dupu moartea-a Pãpãlui
Papa Francisc muri. Va s’aibã unã turlie di lucru giuridicã pi lungu kiro şi minuţişu cari acaţã tu isapi ma multi adeţ veclli di suti di añi.
Tașcu Lala, 21.04.2025, 17:48
Papa Francisc muri. Va s’aibã unã turlie di lucru giuridicã pi lungu kiro şi minuţişu cari acaţã tu isapi ma multi adeţ veclli di suti di añi.
Omlu ţi u-ari borgea cu dimãndarea-a hãbarillei ş-cu andridzearea-a arãdzlloru di angrupari Camerlengo, caplu a cabinetlui a Pãpãlui, ipotisi ţi u-ari cardinalu irlandezu Kevin Farrell.
Aşi cumu easti adetea, nelu a Suveranlui Pontif cu vula ti documentili ufiţiali papali, easti faptu afanu/ aspartu, lucru ţi spuni bitisita-a dumniillei a Lui, iarapoi casili papali suntu vulusiti.
Va s’aibã un kiro di nauã dzãli di jeali, cãnãscutu cu numa Novendiali, tru cari truplu a pãpãlui va s’hibã bãgatu ti-a-videari tu Catedrala San Pietro.
Truplu a Pãpãlui va s’hibã ayiusitu, anviscutu tu strañe papali şi scosu ti-a-videari tru Bazilica Sumu Qetru tra sã-lu veadã duñeaua. După aestu kiro, tru cari oamiñilli va lli-aducã aţea ditu soni tiñie, va s’hibã andreapti arãdzli di angrupari a Pãpãlui.
Dupu adeti, Pãpãlu lipseaşti s’hibã angrupatu tru criptili, chivurili di sumu Bazilica a Sãmtului Qetru. Aproapea 100 di Papañi suntu angrupaţ aclo, nica şi Pãpãlu Benedict XVI-lu. Suveranlu Pontif alăsã, ama, dyeatã, cu testamentu s’hibã angrupatu tru Bisearica Sãmta Maria Maggiore di Roma. Easti protlu pãpã tu aţea ditu soni sutã di añi angrupatu nafoara-a Vaticanlui.
Pãpãlu Francisc vru sã-lli si facã unã cãntari aplo, a prefţãloru, a depoa s’hibã bãgatu tu unã sfinduki aplo, nu, ași cum pruveadi adetea, tru trei sfinduki, dauă di-tu lemnu și unu di-tu tsingu.
După angryuparea a Pãpãlui Colegilu a Cardinalliloru va s’adunã tru Capela Sixtină ta s’ndreagã un conclavu, turlia di lucru giuridicã mistico, ascumta, ti alidzearea-a unlui nãu Pãpã, la cari llia parti cardinalli cari suntu pi unã ilikie ma ñicã di 80 di añi.
Fumlu laiu cari iasi pi ugeaclu, pi sulina i cã buştina di-tu Bazilica-a Sâmntului Qetru dupu aestã turlie di lucru giuridicã spuni că votlu nu aprãftãsi, nu andreapsi lucãrlu cu alidzearea. Fumlu albu dimãndã cã fu aleptu unu nãu Pãpã, a deapoa, turlia di lucru giuridicã s’bitiseaşti cu “Habemus Papam”/ Avemu unu Pãpã.
Autoru: Mariana Chiriţã
Armânipsearea: Taşcu Lala
