Demonstraţii tra unirea ali Românie cu Ripublica Moldova
Masi aproapea dauă n’il’i di oameni, dimi multu ma puţan’i andicra di ti avea nadie organizatorii, loara parti, sâmbătă, tru misuhorea a Bucureştiului, la un nau marşu ti andruparea a Uniril’ei ali Românie cu Republica Moldova. Mulţa viniţ dit statlu vitin, participanţal’i spun că, tru actualu contextu geopolitic, Unirea a atiloru două state easti goala cearei ca etnitl’i român’i dit Ripublica Moldova s-intra sum umbrela NATO şi UE, dit cari România fati parte, şi s-nu cadă victime a unei fuvirseari aruseşti, catacum atea fapta contra ali Ucraina. Ma multu, statutlu di cetăţeni români, dimi, si, di europeni va la asiguripseasca hairi cu standardile occidentale di legalitate, prucukie şi democraţie.
Bogdan Matei, 24.10.2016, 12:37
Masi aproapea dauă n’il’i di oameni, dimi multu ma puţan’i andicra di ti avea nadie organizatorii, loara parti, sâmbătă, tru misuhorea a Bucureştiului, la un nau marşu ti andruparea a Uniril’ei ali Românie cu Republica Moldova. Mulţa viniţ dit statlu vitin, participanţal’i spun că, tru actualu contextu geopolitic, Unirea a atiloru două state easti goala cearei ca etnitl’i român’i dit Ripublica Moldova s-intra sum umbrela NATO şi UE, dit cari România fati parte, şi s-nu cadă victime a unei fuvirseari aruseşti, catacum atea fapta contra ali Ucraina. Ma multu, statutlu di cetăţeni români, dimi, si, di europeni va la asiguripseasca hairi cu standardile occidentale di legalitate, prucukie şi democraţie.
Nica di multu hiindalui una adeti Bucureşti, marşurile tra Basarabia fura nkisiti tru 2012, cându s-comemorara 200 di ani di la prota aracheari a aistei provincii româneşti di cătra Rusia, tu atel kiro, ţaristă. Pi una cumata di locu ali Basarabie istorica, intrată tru componenţa ali Românie după Protlu Polim Mondial şi napoi arakita di URSS tru 1940, fu thimil’iusita actuala Republică Moldova. Aesta arada, participanţal’i la marşu caftara ca Unirea s-agiunga yinitorlu proiectu di vasilie a politicienilor români.
Dumanică, după moeabeţle cu liderl’i a atilor nai cama importante partidi care va s-l’ia parti la alidzerli parlamentare dit 11 di andreu, militanţal’i unionişti spusira că loara asiguripseri că lucarli acatara calea ti u voru nasi. El’i s-andamusira cu reprezentanţii PSD, formaţiunea cu nai cama marea parei parlamentara tru actualu Legislativ, atel’i di la ALDI, cumandusita di prezidentul a Senatlui, Călin Popescu-Tăriceanu, şi PMP, a fostului şef a statlui, Traian Băsescu, catacum şi ali USR şi PRU, dauli extraparlamentare. Partea ntunicată a bitisital’ei di stămână fura incidentile, fără precedentu la marşurli unioniste dit an’il’i di ma nainti, exubearanti şi irin’eatiti, anamisa di manifestanţa şi jandarmi.
Ndoi participanţ avura naeti s-treaca cu sila pisti barajlu a forţelor di arada di pi Calea a Victoriil’ei, una ditru nai cama di simasie cal’iuri rutiere bucureştene, tra care nu avea autorizaţie di urdinari di la Primărie. Acataţ di forţele di arada, tinti dit arada a aistoru, ncapu cu işisi liderlu a minaril’ei unioniste, George Simion, fura ţanuţ ndaua sahats tru una secţie di poliţie şi deapoa fura silighiţ tra s-fuga. Ama imaginile, di una priscavil’e moderată, tru care român’i s-bat cu români, featira, turlu a televiziunilor autohtone şi xeani, ti haraua a adversarlor ali Uniri.
Nica si participanţal’ii irin’eatit la marş ili comentatorl’ii di presă favorabili tra cauza unionista spun că marli amintatoru a mintireasiloru di sâmbătă easti liderlu a socialiştilor pro-moscoviţi dit Republica Moldova, Igor Dodon. Un antioccidental şi românofob sertu, tra care mulţa spun că easti telecomandat dit Rusie, Dodon easti cotat, tru sondajili mutrindalui naeţli di vot, ca favorit a alidzerloru prezidenţiale dit 30 di sumedru. A deapoa sâmbătă apruke una dhoara ti nu-l’i si cadea tamam di s-aştipta ma puţan.
Autor: Bogdan Matei
Armanipsearea: Tascu Lala
