Doi comisari europeañi tu vizitã București
Comisarllii europeañni Roxana Minzatu şi Apostolos Tzitzikostas vinirã vizitã tru România tru perioada 30-31 marţu cu programari ahoryea.
Tașcu Lala, 31.03.2026, 20:47
Proiectul european lipseaşti s’aibã tu amprotusa ninti di tuti, oamiñilli, locuri di lucru ghini pãltiti, investiţii tru educaţie, tru sănătate şi viglleari ndrepturli ti cathi unu cetăţean – spusi prezidentulu ali Românie, Nicuşor Dan, tru unã postari pi Facebook, după andamusea ţi u avu, luni, București, cu viţeprezidenta executivă a Comisiillei Europeanã, co-naționala Roxana Mînzatu, comisar european trã Ndrepturi suţiali şi axizeri, locãri di lucru di calitate şi pregătiri.
Mobilitatea forţãllei di lucru, pricunuştearea diplomilor şi a calificărloru profesionali pi livelu transfrontalieru, licşurãri ti investiţiili tru casi sustenabili, ndruparea categoriiloru oarfãni, ama și ananghea cã, trã România, bugetlu ali Uniuni Europeanã s’armână vãrtosu, nai ma pţãnu pi livelu di tora, trã s’armãnã cu idyiulu ritmo a investiţiilor tru dumenii strateghiţi – neise furã tutu ahãntea subiecti tu muabeţli anamisa di Nicușor Dan și Roxana Mînzatu.
Tru arada a vizitãllei tru România a ufiţialui euuropean fu acãtatã tu isapi şi participarea la lansarea a unui proiectu co-finanțat di UE di kiverniseari fondurli externi nirambursabili şi di monitorizari contribuţia aluştori ti dizvultarea durabilă. Dizvãrtitu ti un kiro di 4 añi, proiectul ari tu planu coerenţa Politicãllei di Coeziuni cu aţeali 17 Obiective di Dizvultari Durabilă, oferindalui unã hartă actualizată a finanţărloru externi nirambursabili icã anvãrtuşindalui axizeri pritu instruirea a 200 di inşi ditu aţeali 8 reghiuni di dizvultari tru dumenea dizvultarillei durabilã şi economiei circularã, cari s-ndrupascã – tuti – ti unã administraţie hãirlãticã, digitalizată şi cu volea ti sustenabilitati.
Subiectulu importantu la București mutrindalui lucrarea iruşi a proiectilor şi reformilor – nãscãnti amãnati – asumati di România pritu PNRR nu eara ascãpati ditu muabeţli pi cari Roxana Mînzatu li-avu și cu premierlu Ilie Bolojan, cari va cã vãsilia s’amintã cât ma multu ditu fondurli disponibile pritu aestu mecanismu europeanu.
Di altă parti, catastisea a pãhadzloru la carburanţã, proiectili di interconectari tru transporturi, mobilitatea militară şi dialoglu mutrinda elaborarea yinitoarillei strateghii europeanã trã turismu durabilu eara protili subiecti pi cari premierlu Bolojan li acãţã tu muabeti, tutu luni, și tut București, cu Apostolos Tzitzikostas, comisaru europeanu trã Transportu Durabilu şi Turismu. Aestu yilipsi simasia gheostrateghică a Româniillei trã securitatea reghiunillei şi a Europãllei şi cundille ananghea ti darea silã a proiectiloru di interconectari, spunãndalui că ‘România easti ligatã stresu cu priorităţli a mandatlui’ a lui.
Ditu arada a proiectiloru eara adusi aminti anvãrtuşearea lucãrlui deadunu anamisa di sinuri, anamisa di România, Gãrtia şi Vãrgãria tru infrastructura di transportu; ufiliseari fondurli pritu programlu SAFE trã interconectarea Româniillei cu Ripublica Moldova şi Ucraina pritu autostrădzli A8 şi A7 icã dizvultarea Portului Constanţa la Amarea Lae.
Autor: Roxana Vasile
Apridutearia: Taşcu Lala
