Dusi la Aţelu di Analtu multiplulu campionu olimpicu Ivan Patzaichin

Eugen Cojocariu, 05.09.2021, 12:26

Multiplulu campionu olimpicu la canoe Ivan Patzaichin dusi la Aţelu di Analtu la ilikia di 71 di añi, deadi hăbari Comitetlu Olimpicu şi Sportivu Român, dumănică, pi frăndza a lui di Facebook.

Nai ma marli canoistu român pi hiotea-a kirolui, Patzaichin amintă 8 titluri di campionu mondialu, anamisa di 1970 si 1983, cata cum şi 4 medalii olimpiţi di malămă, la aţeali 5 ediţii a Olimpiadăllei la cari lo parti, anamisa di 1968 şi 1984.

Feaţi protili jgllioati tru sportu tru 1967, meslu marţu, anda s’ngrăpsi la clublu bucureşteanu Dinamo. Fu inspirat că trei ficiori ditu hoara a lui iu s’avea amintată ditu Delta-a Dunăllei, Mila 23, avea işită, cu niheamă kiro ma ninti, campioñi mondiali Berlin. Prota-a lui performanţă importantă s’nreghistră tamamu dupu trei meşi, când agiumsi pi loclu 2 la campionatlu naţionalu di giuniori. Unu anu ma amănatu, tru 1968, Mexic, aminta prota a lui medalie olimpică di mălămă, la canoe dublu, pi distanţa di 1000 di meatri, deadunu cu Serghei Covaliov.

Aţea ditu soni mari victorie s’nreghistră dupu 16 di añi ma amănatu, la Olimpiada di Los Angeles, cându amintă mălăma, la dublu, cu Toma Simionov. Până atumţea, avea amintată medalii olimpiţi di mălămă München, tru 1972, la simplu, pi 1.000 di meatri, şi Moscova, tru 1980, deadunu cu Simionov, tutu pi 1.000 di meatri.

Unu ditu succesili al Patzaichin armasi tru istorie nolgica-a pirmitusearillei tu cari eara năsu. Tru dzuua di 5 di yismăciuni 1972, la Agiocurli Olimpiţi di München, tru calificărli a probăllei individuali di 1000 di meatri, a românlui ălli si arupsi pagaia nica ditu ankisită. Arbitrilli nu dănăsiră cursa, cum eara regulamentaru, aşi că Patzaichin fu anănghisitu s’vâslească până tu bitisită cu ciotlu cari lli-avea armasă tru mâñi. Bitisi cursa cu trei minuti după protlu clasatu… Fură multi muabeţ, ama, păn tu soni, a românlui ălli si deadi izini s’tragă tru semifinală, tu 8 di yismăciuni. Bitisi protlu, cu 3 secundi dinintea-a cehlui Jiří Čtvrtečka, avânda un timpu ma bunu cu 20 di secundi andicra di ateali nregistrati di azvingătorlli ditu serii. Intră ca favoritu tru finala ditu 9 di yismăciuni, pi cari u-amintă limbidu, la aproapea 4 secundi ninti di sportivlu maghiar Tamás Wichmann, clasat doilu.

După ţi bitisi cariera competiţională, Ivan Patzaichin fu, añi di dzăli, antrenorlu a loturloru naţionali di caiacu-canoe ali Românie, cu cari amintă alti dzăţ di medalii la antriţerli continentali, mondiali şi olimpiţi.

Cama nclo, agiumsi unu ditu proţlli promotori a Deltăllei a Dunăllei, a oamiñiloru şi a adeţloru di aclo. Ndreapsi concursuri cu ambarcaţiuni tradiţionali şi andrupaşti proiecti mutrinda turismulu durabilu tru reghiuni.

Autori: Eugen Cojocariu, Florin Orban

Armânipsearea: Taşcu Lala