Electrica, ofiţial, la Bursa di Londra

Electrica, ofiţial, la Bursa di Londra

România Internațional, 04.07.2014, 11:59

Electrica, ofiţial, la Bursa di Londra

Dupu unâ ofertâ publicâ, prota multu sumangrâpsitâ, di vârâ 200%, acţiun’ili Electrica suntu tranzacţionati la bursili di Bucureşti şi di Londra. Aestâ companii di electricitati dit Românii luă 444 milioani di euro prit oferta publicâ dizvârtitâ tu meslu Cireşar, statlu scutândalui 51% dit acţiun’ili Electrica di investitorl’ii xen’i. Pistipsim că yinearea di investitori xen’i va s-agiutâ la criştearea a eficienţâl’ei Electrica”, dzâsi ministrul delegat ti Energii, Răzvan Nicolescu. El fu, Viniri, deadun cu premierlu Victor Ponta, la dişcl’idearea a operaţiun’ilor la Bursa londonezâ.

Oferta Electrica, nai ma marea di pi bursa româneascâ, adusi ma multi lucru buni, spun specialişţâl’ii a casâl’ei di brokeraj Tradevilli – cum suntu suprasumangrâpsearea di pisti dauâ ori, n’icşurarea di pâhă şi bâgarea tu practico a sumangrâpserilor garantati, ama şi îndauâ lucru cama pţân buni – lipsa di n’icşurari di pâhă pi tranşa garantatâ icâ angrâpsearea publicâ a prospectului, cu maşi unâ dzuâ nâinti di ahurhearea a ofertâl’ei. Uidist cu un raportu adrat di ei, acţiun’ili Electrica pot s-creascâ cu vârâ 15% andicra di protlu pâhă public, icâ vârâ 11 lei pi acţiuni. 85% dit acţiun’ili listati la bursâ suntu dati a investitorilor instituţionali, iara alanti proţenti, di 15%, a personilor fiziţi, cum suntu n’iţ’ii investitori.

Vâsâlia caftâ ca pâradzl’ii ţi va îi l’ia s-armânâ tu companii, ca timel’iu finanţiar ti planurili di investiţii pi cari Electrica va li aibâ tu yinitorl’ii an’i. Electrica easti daua companii românescâ di stat bâgatâ la Bursâ şi Bucureşti, şi Londra, dupu ţi, cu şasi meşi nâinti, Romgaz amintă idyul lucru. Dzua di 12 di Brumar eara hâbârisitâ ti listarea Romgaz ahât la Bursa di Bucureşti, ama şi pi aţea di Londra, nica di la ahurhearea a ofertâl’ei publicâ prit cari statlu vindu 15% dit acţiun’ili a producătorlui di gazi naturali. Investitol’rii ancupârarâ 36% dit acţiun’ili Romgaz sum turlia di certificati di depozit, ţi furâ listati la bursa di Londra, alanti di 64% hiindalor luati ca acţiun’i tranzacţionati la bursa di Bucureşti.

Tu minduita a analişţâlor, criştearea a numirului di companii listati la Bursa di Valori Bucureşti easti un lucru-cl’ieai tu ţi mutreaşti aduţearea di investitori şi tu idyul chiro poati s-creascâ pistusinea a companiilor că listarea la bursâ easti unâ bunâ turlii ti finanţarea a proiectilor di împrustari.