Eveniment Top

Companii di stat cu borgi mări suntu pi lista a privatizărilor a Guvernluui di Bucureşti

Leyla Cheamil, 28.09.2012, 11:01

Mlutu zburâtâ, privatizarea a combinatlui petrochimic Oltchim Râmnicu Valcea (sudlu ali Românii) easti ca vârâ chiatrâ greau ti Guvernlu di Bucureşti. Cu lucrâtori pi sucâchi cari caftâ pâltearea a arugârilor şi duţearea ninti a activitâţlor dit combinat, ţi ari borgi di 700 di milioani di euro, executivll sperâ s-ducâ ghini aestâ privatizari. Liţitaţia fu amintatâ di omlu di afaţeri Dan Diaconescu cu unâ ofertâ di 45 di milioani di euro ti aproapea 55% dit acţiun’ili a soţietati, iara chirolu pânâ la cari el poati s-da pâradzii easti 1 di Brumaru. Guvernlu hâbârisi că, maca aţel contractu di privatizari nu va s-hibâ adrat cum lipseaşti, ca tu cartea di sarcini, statlu român va s-da un agiutor di 40 di milioani di euro ta s-ascapâ Oltchim. Alti privatizări di mari urgenţâ ţi li mutrescu guvernanţâl’ii suntu CFR Marfâ şi TAROM. Uidisit cu autorităţli, CFR Marfâ cheari di 50 di milioane di euro cathi an. Cu vârâ 11 di n’ii di salariaţ, compania ari vârâ 50% dit pâzarea di transportu pi căi di hier cu mijloaţi fixi, stâtuti, icâ vârâ1,5 miliardi di euro. Pi lista a privatizărilor mai easti şi Tarom, unâ altâ companii di stat ţi cheari multu.Autorităţili aşteaptâ di la managerii ţi va s-yinâ unâ strateghii ti vindearea a 20% dit acţiun’ili ali companii.

Pâradz ti criştearea a ficiuriţlor

Hâbări multu buni ti pârinţâl’ii dit Românii. Camera a Deputaţlor apruchie marţâ, un proiect di nom ţi priveadi darea di cama mulţâ pâradz ti criştearea a fciorlui di la 75% la 85% dit venitlu net luat în aţei dit soni 12 meşi, ahurhinda cu 1 di Brumar. Camera easti un for fi apofasi. Aşiţi, pârinţâl’ii cari va s-intrâ tu conţediu di crişteari a ficiuriclui va s-l’ia 85% dit venitlu net, ama nu mai multu di 3.400 di lei, mama vor s-şeadâ un an acasâ, şi maximum 1.200 di lei maam vor un conţediu maternal di doi an’i. Ama s-da stimluentul di 500 di lei pi mesu şi ti pârinţâl’ii cari yin cama ayoniea la lucru, chiola câftarâ un conţediu di doi an’i ti criştearea a n’iclui.

CSAT apruchie planlu mutrinda ancupârarea nâscântor aeroplani mlutirol dit Portugalii

Achicâseari tu Consililu Suprem di Apărari ali Vâsâlii ti ancumpârarea, dit Portugalii, a 12 aeroplani mlutirol, ţi suntu deja ufilisiti. Guvernul di Bucureşti va s-pâlteascâ, tu rati, 600 di milioani di dolari, ş-ti avioane, ama şi ti suportul loghistic. Aparatili F16, cari suntu la giumitatea chirolui di ufiliseari lipseaşti s-agiungâ tu vâsâlii tu 2016. Pânâ atunţea, piloţii va s-hibâ antrenaţ.

Şeflu ali diplomaţii di Bucuresti, Titus Corlăţean, prezent la Adunarea Ghenerala al ONU di New York

Afirerli dit Orientlu di Mesi si dit nordlu ali Africâ suntu di mari simasii ti comuniţli internationali. Hiindalui la Adunarea Ghenerala al ONU, ministrul roman di Externi, Titus Corlăţean, adrâ public intireslu ali Românii andicra di evoluţiili dit Sirii şi bâgâ un accţentu ahoryiea pi progreslu n’icşurat avut tu aţel dit soni an a Proţeslui ti Arâhati tu Orientul di Mesi El condamnă şi ataclu di tora ayoniea contra a reprezentanţâlor diplomatiţi american’i di la ambasada dit Benghazi. Mutrinda Siria, el spusi câ evoluţiili dit aestâ vâsâlii da cali ti un fenomen di contagiuni tut tutâ reghiunea. Tutnâoarâ, Titus Corlăţean dzâsi, că, tu ţi mutrreaşti numirlu mari di refugiaţ sirieni şi agiungu tu Iordanii şi catandisea greau a lor, Romania va s-da a autorităţilor di Amman un agiutor umanitar di vârâ 100 di n’ii di euro.

Tehnologia 4G vini şi tu Românii

Tu unâ lumi tut cama tehnologhizată, operatorl’ii di telefonii dit Românii adarâ nâscânti urdinări importanti cari sâ-I ţânâ tu fruntea a toplui. Unâ dit aesti easti bâgarea ali tehnologhii 4G, ţi da asiguripseri ti unâ performanţâ cama mari tu reţea, icâ va s-da cali ti transferlu di dati cu unâ vitezâ multu ma bunâ. Statlu român va s-l’ia cama di 680 di milioani di euro dit pâradzii di licenţâ di la operatorl’ii di telefonii mobilă, dupu nai ma marea liţitaţii di spectru radio adrat tu Românii pânâ azâ. Dupu liţitaţii, vârâ 700 di câsâbaţ di la hoarâ ţi nu aveau reţeli di comunicaţii mobili tu bandâ largâ va s-aibâ tora – cu prioritate di anvâleari (acoperire).

Constructorlu auto român Dacia, parti a gruplui francez Renalut, prezentă Paris, năili modeli Logan şi Sandero

Salonlu auto di Paris adusi, gioi, dinâintea a publiclui, năili modeli Logan, Sandero şi Sandero Stepway, adrati di constructorlu român Dacia, parti a gruplui francez Renalut. Năulu Logan fu prezentat, la optu an’i di la debutlu a protâl’ei gheneraţii, deadun cu năulu Sandero, model cari, pi pâzărli vest-europeani, au doilu loc preferinţili ti amaxiliromâneşţâ, dupu Duster. Logan va s-şi-adunâ ninga el clienţâl’ii cu un nău design cu influenţi ghermani, cu unâ echipari ţi ari şi un sistem di navigaţii si motoari năi. Ama şi Sandero yini cu un design nău şi cu un interior cama îmşeat.

Festivalu Internaţional a Orchestrilor Radio RadiRo, adrat di Radio Romania, la prota ediţii.

Un dealihea regal muzicalBucureşti, tu aestâ stamina, vini unâoarâ cu prota ediţii a Festivalui Internaţional a Orchestrilor Radio RadiRO. Meloman’ii dit Românii, ama şi aţei ditru-xeani vinirâ maşi ti aestu evenimentu di mari simasii, adrat di Radio Romania, furâ astiptaţ so-s-hârsirâ cu conţerti multu buni, ţânuti di ansambluri radio ghini cânâscuti ditu tutâ lumea. Dintrâ aesti dzâţem di Orchestre Philharmonique di Radio France, Orchestra “Sinfonica Nazionale della Rai” si BBC Symphony Orchestra, caritu staghiunea 2010-2011, yurtusi aţel de-a 80-lea an di banâ. Directorlu artistic a festivalluui, cânâscutlu dirijor şi pianistu Christian Zacharias, pistipseaşti câ evenimentul poati s-hibâ un simbol di unificari ali Europi, câ ţe tuti aesti ansambluri di pi continentu pot s-hibâ deadun ta s-prezintâ nai ma îmşeatili lucrări di muzicâ clasicâ.