Expoziţie ti Brâncuşi ahãrdzitã Berlin
Tru Anlu omagialu Constantin Brâncuși, Berlin s-dişcllisi unã expoziţie retrospectivă ti opera marlui sculptoru.
Tașcu Lala, 22.03.2026, 14:59
Tru Anlu omagialu Constantin Brâncuși, Berlin s-dişcllisi unã expoziţie retrospectivă ti opera marlui sculptoru.
Unã expoziţie retrospectivă impresionantă ti opera al Constantin Brâncuşi s-dişcllisi, gioi dicsearã, Berlin. Muzeulu Neue Nationalgalerie ditu capitala ali Ghirmãnie lã pripuni a miraclleadzlor di cultură cama din 150 di sculpturi, caduri icã filme di arhivă ligati di marli sculptoru român. Suntu pãrãstisiti şi operi orighinale, adusi di la Tsentrulu Pompidou di Paris, co-organizator al expoziţie, ama şi sculpturi ditu România ţi yilipsescu, tuti, evoluţia artistică a unlui di thimilliusitorlli a sculpturãllei modernã. Ma ghini spus, tru expoziţia ndreaptã ti Constantin Brâncuşi, publiclu poati s’veadã lucrãri anãmusiti cata cumu Muza Adurñitã, Dumniţa Pogany, Bãşearea, Pullilu tu vimtu Icã Prinţesa X.
Un lucru ahoryea si tu amprotusa thesi easti impresionanta reconstituiri ti unã parti ditu atelierlu parizian al Brâncuşi, ditu Impasse Ronsin. Ditu România suntu spusi ti videari trei lucrãri,– emu ditu patrimoniul a Muzeului Huryeatlui Român, ama şi unã sculptură ditu colecţia Muzeului Naţional di Artă ali Românie, Somnulu, lucrari tru marmuru ditu 1908.
Dişcllisă până tu 9 di agustu, expoziţia spuni, nica di tora, unu sinferi ti publicu: suti di oamiñi aştiptarã tu intrata Muzeului Neue Nationalgalerie ta s’llia parti la unu di nai ma importanti evenimenti culturali a anlui tru Berlin. „Tru aestã oarã, capitala al Brâncuşi easti Berlinlu”, spusi tu dişcllideari, ambasadorlu ali Românie tru Ripublica Federală Germania, Adriana Loreta Stănescu.
Nu multu largu, Roma, unã altă expoziţie ndreaptã ti sculptorlu român – „Constantin Brâncuşi: Orighiñili a Infinitlui” – dişcllisã tu Museo dii Fori Imperiali – Mercati di Traiano, adusi cama di 12.000 di vizitatori tru un mesu. Dişcllisã tu 19 di şcurtu, până pi 19 di alunaru și organizată maxusu ta s’nsimneadzã Anlu Cultural România-Italia, expoziţia fu minduitã di Muzeulu Naţional di Artă ali Românie. Aclo, anamisa di lucrărli anãmusiti pãrãstisiti suntu Arigeaia/ Rugăciunea, Prometeu, Tors icã Scamnulu (ditu seria Measa Tăţearillei).
Evenimenti ahãrdziti ti bana şi opera al Constantin Brâncuși furã ndreapti icã va s’ndreagã emu tu România, emu tu xeani tu aestu anu ţi easti ahãrdzitu ti marli sculptoru. Di itia cã, dupu ţi tu 19 di şcurtu, ti Dzuua Naţională Constantin Brâncuşi, furã nsimnaţ 150 di añi di anda s’amintã aristulu, anlu 2026 fu apufusitu Anlu Constantin Brâncuşi.
Expoziţii, conferinţi, evenimenti multimedia, conţerti icã spectacoli di teatru va s’yilipseascã kiro di un an di dzãli, anlu omagial ahoryea. România, Republica Moldova, Franța, Portugalia, Austria, Belgia, Polonia, Israel, SUA, Canada, Turcia, Egipt, Senegal, Noua Zeelandă, India icãn China suntu maş ndauã di vãsiliili tru cari manifestări ahãrdziti ti un di nai ma cãnãscuţ şi pricãnãscuţ români pi hiotea kirolui adunã mulţã oamiñi tru idyea emoţie, acã suntu largu nãscãnţã di elli di alantã.
Autor:Roxana Vasile
Armãnipsearea: Taşcu Lala
