Fãrtuñi cu victimi tru România
București și tru mai multi giudeţi ditu sudlu a vãsiliillei furã fãrtuñi vãrtoasi, ama şi victimi
Tașcu Lala, 19.07.2025, 19:12
Tru România, s’facu, tru aestu kiro, fenomeni meteo extremi catacum fãrtuni i cãñină, iarapoi meteorologilli apufusirã, tru dzãlili ditu soni, un şingiru cu fãţeari timbihi codlu galbinu, purtucalişu și aroșu ti kirolu slabu. Fãrtuñili, grãndina și ploiurli feaţirã mãri zñii București și tru ma multi giudeţi ditu vãsilie. Meteorologilli apufusirã codu aroşu, iara autorităţli pitricurã hãbãri Ro-Alert, cu cllimarea cãtã bãnãtori s’tiñiseascã misurli preventivi dimãndati.
Tru capitală, gioi dicseară, furã fãrtuñi vãrtoasi, cari feaţirã și victimi. Vimtulu bãtu Bucureşti cu cama di 90 di kilomeatri tu sihati, arupsi cumãţ di aviliminti/ citiili a casiloru, iar unã ditu eali agudi unã mlleari tru ilikia di 49 di ani di Otopeni, cari muri. Dauă persoani furã pliguiti și, dupu evaluarea medicalã di aclo, furã purtati la spitalu, nica tu banã suntu. Multi vehiculi furã asparti, dzãţ di cupaci surpaţ di vimtu cãdzurã pisti aftukinati şi stâlki di electriţitate, iarapoi ma multi cumãţ di la citiili a casiloru s’arupsirã şi agiumsirã pi geadei.
Echipajili di intervenţie cilãstãsirã ti scuteari apa ditu ma multi casi și avlii, ti adunarea a cumãţloru di construcţie arupti di pi citiili a dzãţloru di casi, ditu cari dauă instituţii publiţi, ti adunarea a sutiloru di cupaci şi dzãţ di stãlki di electriţitati cădzuţ pi carosabilu. Unã parti ditu anvãlimintu s-arupsi şi la Academia di Poliţie „Alexandru Ioan Cuza”,iu ma multi sãlliuri di clasă furã nicati.
Traficlu aerian fu zñiipsitu, idyea şi aţelu rutier. 15 di aeronavi cari lipsea s’dipunã pi Aeroportulu Internaţionalu „Henri Coandăˮ furã dirijati s’armãnã nica ndzeanã tru vimtu cu scupolu tra s’ndreagã kirolu şi s’dipunã deapoa cu amãnari. Alte trei cursi furã asţãti şi turnati neise cătã alti aeroporturi.
Sudlu a vãsiliillei fu, ngheneralu, aguditu di fãrtuñi. Tru giudeţlu Ialomiţa s’feaţirã mãri zñii, cama di 30 di nicukirati furã nicati, iarapoi tru municipiulu Slobozia apa anvãli parterlu a unlui bloc di locuinţe. Tru Prahova, cama di 30 di ñilli di consumatori ditu 40 di localităţ armasirã fără curentu electricu, un panou publicitaru cădzu pi unã autostradã, tu kirolu anda, tru localitatea Mizilu, un sturu electricu s’apreasi. Alte giudeţi zñiipsiti suntu Brăila, Buzău, Călăraşi, Custanţa, Tulcea, Argeş, Giurgiu şi Teleorman, iu fu ananghi di intervenţia a pompierlor tra s’mutã cumãţli di citii şi cupacilli arupţã di vimtu cari cădzurã pisti aftukinati şi sturi di electriţitati.
Fenomeni meteo extremi s’nreghistrarã și tru nord-estul a vãsiliillei, iu ndauã giudeţi furã sumu timbihea di codu purtucalişu și galbinu di ploiuri cabaia mãri. Tu arada a lor, hidrologilli feaţirã timbihi ti nicãri tru ligãturã cu cupañea arãurloru, vãrã trei cirecuri ditu aestea ditu vãsilie.
Autoru: Leyla Cheamil
Armãnipsearea: Taşcu Lala
