Finanţarea Radio România şi independenţa editorială
Finanţarea a servitiilor publiti di radio şi televiziuni di la bugetlu di stat easti nai cama araua cearei posibilă, lugurseasti directorlu juridic ali Uniuni Europeana di Radio şi Televiziune, Richard Burnley, aflat dzalili aesti Bucureşti. Tru una declaraţie tra Televiziunea Română, Burnley şi spusi gailipsearea tru ligătură cu preconizata eliminari a taxal’ei radio-tv prit proiectul di nom iniţiat di PSD şi cafta a Parlamentului ali Românie s-nu voteadza aestă apofasi.
România Internațional, 20.10.2016, 12:12
Finanţarea a servitiilor publiti di radio şi televiziuni di la bugetlu di stat easti nai cama araua cearei posibilă, lugurseasti directorlu juridic ali Uniuni Europeana di Radio şi Televiziune, Richard Burnley, aflat dzalili aesti Bucureşti. Tru una declaraţie tra Televiziunea Română, Burnley şi spusi gailipsearea tru ligătură cu preconizata eliminari a taxal’ei radio-tv prit proiectul di nom iniţiat di PSD şi cafta a Parlamentului ali Românie s-nu voteadza aestă apofasi.
Ia ti spusi Richard Burnley: “Escu multu gailipsitu s-avdu ti s-fati. Abonamentul Radio – TV nu easti una taxă, easti contribuţia multu importantă a societatil’ei la finanţarea a serviciilor publiti di Radio şi Televiziune. Minduita tra curmarea a aistui abonamentu aduti mari gilipseri, tra atea că nascanti practit di până tora na spun că nai cama buna cearei tra finanţarea a Radioului şi ali Televiziuni Publiti easti abonamentul. Aesta turlie, ateali dauă servicii suntu acutotalui independenti şi s-fati una ligatura cu publiclu cari easti nicuchirlu a aistoru dauă media. Finanţarea di la bugetlu di stat easti nai cama slaba cearei ti poati sa s-faca. Tru Europa, tu masi ndaua vasilii avem aestu sistem di finanţare cabaia politizat tru care tută putearea easti tru mâna a politiclui şi anda s-alaxeasti putearea el’i pot s-tal’ie dit buget atea ti da pisti cap tut lucarlu. Ahtari lucri s-featira tru Europa şi ti atea caftu a Parlamentului să-şi yixeasca diznau minduita.””
Consiliul di Administraţie ali Sutiitati Româna di Radiodifuziune nu ndrupasti iniţiativa legislativă mutrindalui eliminarea a taxal’ei radio-tv. Uidisitu cu un comunicat a Consiliului, eliminarea a l’ei poati s-alaxeasca radical existenţa autonomă şi independentă a servitiilor publiti di media. Si liderlu a deputaţlor PNL, Eugen Nicolăescu, spuni că social-democraţl’ii vor s-li subordoneadza politic posturli publiti di Radio şi Televiziuni prit pripunirea tra eliminarea a taxal’ei radio-tv acatata tru isapea a programlui a lor di guvernare.
Di altă parti, ministurlu a Finanţilor Publiti, Anca Dragu, feati timbihi că impactul bugetar mutrindalui eliminarea a atilor 102 di taxi nifiscali easti di 1,6 miliardi di lei( aproapea 400 miliun’I di euro), dimi diplo andicra di isapea a iniţiatorlor cu proiectul di nom. Anca Dragu cundil’e că dificitlu bugetar tra anlu ti yini nu lipseasti s-nastreaca 3 tru sută dit PIB ali Romanie.
Proiectul di nom mutrindalui anularea, di la 1 di yinar 2017, a atilor 102 di taxi nifiscale tricu tru stămâna di ma nainti di Senat, prota cameră sesizată tru aestu caz. Dzalili aesti, pripunirea apruche aviz favorabil di la Comisia Juridică a Cameral’ei a Deputaţlor, a deapoa marţa yinitoari, gruplu parlamentar a PSD ari nadie ca el s-hibă votat tru plenlu a aistei Camera, ti ari rol decizional.
Autor: Andreea Bojoi
Armanipsearea: Tascu Lala
