Giustiţii şi anti-aruşfeti
Nu pţâni suntu numili avdzâti, maxus di politicien’i, cari va s-ducâ ninti, şi tu 2014, mintireanili prit tribunalili dit Românii. Aţel di dicl’isi calea estan fu premierlu dit chirolu 2000 — 2004, soţial-democratlu Adrian Năstase, condamnat di Nalta Curti di Casaţii şi Giustiţii la 4 an’i di hapsi cu executari, tu un dosar di aruşfeti. Un apofasi di hapsi cu executari ţi-l mutrea nica dit 2012, tu un altu dosar, fu vidzut, tu aţel chiro, un punctu zero ti giustiţii, aţea cari, tu întreg chiro di dupu comunismu, avea adunatâ maşi n’iţ catandisi andrepti tu alumta cu marea aruşfeti. Tora, tu aestu dosar, Năstase – figurâ politicâ dit prota linii tu un chiro cându politicien’ii earau la nivel analtu – luă mitâ di vârâ 630 di n’ii di euro.
Florentin Căpitănescu, 08.01.2014, 11:55
Nu pţâni suntu numili avdzâti, maxus di politicien’i, cari va s-ducâ ninti, şi tu 2014, mintireanili prit tribunalili dit Românii. Aţel di dicl’isi calea estan fu premierlu dit chirolu 2000 — 2004, soţial-democratlu Adrian Năstase, condamnat di Nalta Curti di Casaţii şi Giustiţii la 4 an’i di hapsi cu executari, tu un dosar di aruşfeti. Un apofasi di hapsi cu executari ţi-l mutrea nica dit 2012, tu un altu dosar, fu vidzut, tu aţel chiro, un punctu zero ti giustiţii, aţea cari, tu întreg chiro di dupu comunismu, avea adunatâ maşi n’iţ catandisi andrepti tu alumta cu marea aruşfeti. Tora, tu aestu dosar, Năstase – figurâ politicâ dit prota linii tu un chiro cându politicien’ii earau la nivel analtu – luă mitâ di vârâ 630 di n’ii di euro.
Chiola nai ma cânâscutlu, nu maşi cazlu Năstase fu di interes public tu ahurhita a anlui. Un deputat al PC (la putaeri), Gheorghe Coman, fu arestat tu un dosar tu cari îi si aduţi câbati, di procurorl’ii ali Direcţii Naţionalâ Anti-aruşfeti, că şi-ufilisi ipotisea ta s-li’a pâradz ţi nu earau a lui. Pi di altâ parti, avdzâtlu yeatur-chirurgu Şerban Brădişteanu fu achitat di Tribunalu Bucureşti tu dosarlu tu cari îi si adusi câbati că luă patru milioani di euro, ta s-arâdâ tu unâ licitaţii mutrinda echiparea a spitalilor dit hapsi. Alţâ oamin’I cânâscuţ va şi-aflâ pideapsili tora ayoniea, tu chirolu ţi yini. Easti catandisea aţilui di ma ninti ministru al transporturilor, Relu Fenechiu, condamnat la ţinţi an’i di hapsi cu executari ti complicitati la abuz tu ipotisi. Al Fenechiu ăi si aduţi câbati că, întrâ 2002 – 2005, vindu, prit firmili a lui, transformatoari şi întrerupătoari vecl’i la pâhălu a nâscântor năi, ali unâ companii di stat.
El şi-deadi demisia tu Alunar 2013, dupu ţi ş-aflâ pideapsa la prota instanţâ. Tu aestu mesu s-aşteaptâ şi concluzia mutrinda dosarlu tu cari a doi minişţrâ di ma ninti, Tudor Chiuariu (giustiţii) şi Zsolt Nagy (telecomunicaţii), lâ si aduţi câbati că agiutarâ la triţearea paranom a unui imobil di patrimoniul a Poştâl’ei Românâ tu aţel ali unâ firmâ privatâ. Giustiţia mai adarâ problemi şi a viţepremierlui di tora, Liviu Dragnea, câftat ti infracţiuni cum suntu votlu multiplu, turismul electoral icâ falsificarea di simnături, ama şi aţilui ţi fu ministru ali Icunumii, Varujan Vosganian, a curi îi si aduţi câbati ti subminarea ali icunumii naţionalâ. A întregâl’ei catandisi îi si adavgâ unâ mari armatâ di oamin’i ţi au borgi locali, la primari di hori n’iţ pânâ la prezidenţâ di consilii giudeţeni.
Armanipseari: Cristina Mina
