Hâbărli ti Covid-19: Terapia intensivă, veadi zori mari
Turnarea iruși a infectărloru cu năulu coronavirus tru Europa poati s’aducâ, ti ndauâ stâmâńi, câlbâlâki mari tu secţiili di terapie intensivă. Easti timbihea ți u fați Organizaţia Mondialâ a Sănătatillei tru oara anda criscu numirlu a internărlor ditu spitali.
Roxana Vasile, 19.10.2020, 21:34
Turnarea iruși a infectărloru cu năulu coronavirus tru Europa poati s’aducâ, ti ndauâ stâmâńi, câlbâlâki mari tu secţiili di terapie intensivă. Easti timbihea ți u fați Organizaţia Mondialâ a Sănătatillei tru oara anda criscu numirlu a internărlor ditu spitali.
România treați, tu aestă oară naima greulu kiro di anda ahurhi criza sanitară, neise tu bitisita-a meslui șcurtu, cu recordu după record, emu numirlu di infectări, emu a lândzițloru ți suntu la ATI. Nica sâ spunemu ș-atea câ tu stâmâna ditu soni, cazurli năi raportati cathi dzuuâ suntu anvârliga di 4 ńilli, cu Bucureștiulu pi protlu loc, ti amârtie, tru toplu a lândzidzârloru cu Covid-19. Tutunâoarâ, numirlu a oamińiloru spitalizaț la ATI, pi livelu național, easti anvârliga di 750.
Tru Capitală, prefectul Gheorghe Cojanu dimândă că numata ari locuri. Di aestâ furńie/ itie, s’apufusi câ, ahurhindalui di luni, spitalu – Colentina — s’lucreadzâ acutotalui tră yitripsearea-a lândzițloru di Sars-Cov-2.
Ia ți spusi Gheorghe Cojanu: “Bucureşti numata ari locuri la ATI. Aestâ spuni că agiumsimu pi mari halâ, furńie trâ cari [n.r. secretarlu di stat] Raed Arafat nâ hâbârisi că ari vulusitâ un documentu. Spitalu Colentina va s’lucreadzâ acutotalui ti yitripsearea-a lândzițloru di Sars-Cov-2, s’clleamâ câ va s’hibâ 300 – 400 di locuri ti yitripsearea-a aluștoru lândziț cu Covid. Tutu andicra di aesti lucri, sâ spunemu că ari un spital modular la spitalu Elias ți lucreadzâ cându ș’cându câțe nu eara asiguripsitu cu cadri medicali ahâtu câtu eara ananghi, S’apufusi că emu Spitalu Floreasca, emu Spitalu Elias s’asiguripseascâ aesti cadri medicali.”
Uidisitu cu ațea ți spusi prefectulu Gheorghe Cojanu, s’apufusi, câ yeațârlli şi asistenţâlli şcolari di la unităţli di nviţămintu cari tricurâ tru scenariul aroşu, ți va s’dzâcâ mași pi sistemlu nvițămintu online, şi cari, dimecu, numata ari huzmeti/ activitatea directă cu cilimeańilli, s’hibâ pitricuț tu spitalili cari yitripsescu pacienţâ infectaț cu năulu coronavirus.
Idyea catastisi cu ațea di București easti și tu căsăbălu Iași, nai cama marli câsâbă ditu apirita ali Românie. Și aclo, tuti crivãțli/ apaturli di la tearapie intensivă suntu mplini cu lândziț. Cama ghini, sâ spunemu și ațea câ, spitalili ahârdziti ti paciențâlli infectaț cu năulu coronavirus au 41 di locări la ATI, ațeali ditu soni 10 hiindalui acâțati, tru weekend, di la unâ dzuuâ la alantâ. Ascâparea — sumu turlia a atiloru nica 24 di apaturi — lipsea s’yinâ di la un spital mobiul, dișcllisu viniri, ama staţia di oxigenu avu unâ zńie/ avarie, a deapoa znuearea-a llei putea sâ s’facâ ti vârâ dauâ stămâńi. Cum lucărli nu pot s’armămă niminati, autoritățli locale apufusirâ s’dișcllidâ dauă puncti di tearapie intensivă tră pacienţălli Covid la alti spitali ditu zonă. Până va s’agiungâ pi lucru, ama, cazurli greali va s’hibã pitricuti tu alti unităț medicale ditu vâsilie.
Autoru: Roxana Vasile
Armânipsearea: Tașcu Lala
