Icunumia ali Românii, bunâ ti investiţiili xeani
Borgea externâ ali Românii — aţea publicâ anamisa di aţea a companiilor privati – scâdzu, tu prota giumitati a anlui, cu aproapea 4 miliardi di euro. Uidisit cu datili adunati di Banca Naţionalâ, borgea externâ tu ahurhita a meslui Alunar eara di 90 di miliardi di euro, dit cari aţea publicâ era sum 30 di miliardi. Uidisit şi cu BNR, tu prota giumitati a anlui, criscurâ ca baia pâradzl’ii pitricuţ tu vâsâlii di român’ii ţi lucreadzâ tru xeani.
Roxana Vasile, 14.08.2015, 10:26
Borgea externâ ali Românii — aţea publicâ anamisa di aţea a companiilor privati – scâdzu, tu prota giumitati a anlui, cu aproapea 4 miliardi di euro. Uidisit cu datili adunati di Banca Naţionalâ, borgea externâ tu ahurhita a meslui Alunar eara di 90 di miliardi di euro, dit cari aţea publicâ era sum 30 di miliardi. Uidisit şi cu BNR, tu prota giumitati a anlui, criscurâ ca baia pâradzl’ii pitricuţ tu vâsâlii di român’ii ţi lucreadzâ tru xeani.
Tu idyul chiro, investiţiili xeani directi s-pari că ş-yin pi cicioari, tu proţl’ii şasi meşi dit 2015, aesti dit soni avândalor un pâhă cu cama di 450 di milioani di euro ma mari andicra di idyul chiro similarâ a anului ţi tricu.
Daniel Apostol, analistu icunumic, zburaşti: Dit 2008 ş-încoaţi, capitalu xenu adus tu Românii scâdzu multu. Tu meslu Marţu, ama, estan, fu inregistrat un prot mari punctu, di cama di 400 di milioani di euro, iara tu meslu Cireşar, fu inregistrat un altu, di aproapea 400, icâ 370 di milioani di euro. Adunat, pi proţl’ii şasi meşi tu anlu aestu avem 1,66 di miliardi di euro, unâ ţifrâ dealihea recorud andicra di aeşţâ dit soni an’i.. Tu idyul chiro, ama, nu easti unâ ţifrâ multu mari, câ ţe furâ an’i cându nivelu a investiţiilor xeani tu icunumia româneascâ triţea di 3-4 miliardi.
Tu aestu chiro, criştearea icunumicâ bunâ, inflaţia scâdzutâ, cursul stabil a monedâl’ei naţionalâ, leulu, andicra di euro şi di borgea publicâ scâdzutâ adarâ dit icunumia româneascâ un loc iu emburl’ii ţi minduiescu că suntu riscanti catandisili dit China şi Gârţii, pot s-ahurheascâ aoa lucurlu. Analişţâ consultaţâ di televiziunea americanâ CNBC spun că emburl’ii lipseaşti s-mutreascâ maxus câtâ vâsâliili a Europâl’ei Ţentralâ şi di Estu ta s-aflâ un apanghiu andicra di intervenţiili pi pâzari şi catandisea greauâ a bursâl’ei chinezâ icâ andicra di criza a borgilor gârţeştâ.
Regiunea amintâ, ama, şi cu agiutorlu a apruchiarâl’ei comerţialâ di Ghermânii, nai ma marea icunumii dit Europâ, Bob Parker, consilier finanţiar la Credit Suisse, spunândalui că vâsâlii cum suntu România şi Vâryâria ţânurâ pi cicioari exporturili câtâ vâsâlia vestu-europeanâ. Specialişţâl’ii mai aduc aminti ti CNBC, ş-di criştearea icunumicâ româneascâ — un recordu ti regiunea a ei. Charles Robertson, prot-icunumistu la banca di investiţii Renaissanci Capital, dzâţi că Bursa di Valori di Bucureşti criscu, estan, cu 9%.
