Ilie Bolojan, premierlu aleptu
Prezidentulu Nicuşor Dan lu-aleapsi, viniri, pi liderlu interimaru a PNL, Ilie Bolojan, tru ipotisea di prim-ministru.
Tașcu Lala, 20.06.2025, 17:17
Prezidentulu Nicuşor Dan lu-aleapsi, viniri, pi liderlu interimaru a PNL, Ilie Bolojan, tru ipotisea di prim-ministru. Caplu a statlui avu, gioi, consultări cu partidili şi formaţiuñili politiţi reprezentati tru Parlamentu trã alidzearea-a candidatlui ti ipotisea di prim-ministru. Alidzearea yini după ma multi stămâñi di pãzãrãpseri niacumtinati, greali, anamisa di prezidentu, liderlli şi specialiştilli aţiloru 4 partidi pro-europeani ditu Parlamentulu di Bucureşti, Partidlu Socialu Democratu, Partidlu Naţionalu Liberalu, Uniunea Salvaţi România şi Uniunea Democrată Maghiară ditu România. Deadunu cu elli s’arãdãpsirã deputaţlli ditu Gruplu a Minorităţlor Naţionali.
Furã lucri crehti și misuri greali pi cari partidili ș-li loarã borgi trã guvernari și niţi unã ditu dzãlili ţi li tricumu cu aesti muabeţ nu fu unã dzuuã kirutã. Ananghea trã România easti creaştirea icunomică, ama ta s’aminţã aesta, lipseaşti s-ai un thimelliu vrtosu, și trã aesta lipseaşti s’lucrãmu și borgea easti a guvernului și a suţatãllei ţi lu-ndrupaşti. Easti ananghi s’alãximu xikea financiarã, trã s’bãgãmu thimeallili cã economia românească, cu tutã yiştearea ţi u-ari, s’agiungã pi creaştiri și s’aducă prucukie trã româñi, spusi Nicuşor Dan. Premierlu aleptu, Ilie Bolojan, easti omlu nai ma uidisitu s’facă znuerli şi alãxerli anãnghisiti tru aparatlu a statlui român, spusi viniri prezidentulu Nicuşor Dan. Caplu a statlui spusi, la Pãlatea Cotroceni, că Bolojan easti axizitu, tru ipotisili publiţi ţi li avu, ‘că ştie s’ñicureadzã şi s’li facã hãirlãtiţi hãrgili’. ‘Easti omlu nai ma uidisitu şi va s’aibã tru mini un partener’, spusi prezidentulu.
Unã ş-unã dupu alidzeari, Ilie Bolojan spusi că va li ducã ma largu muabeţli cu partidili politiţi trã “s’aibã aradã tru finanțili a vãsiliillei, s’lucrăm trã unã bună guvernari, s’ndridzemu condiții di dizvultari și să spunemu tiñia ţi lã si cadi a românilor”. Știu că nu va s’hibã unã nkisitã lişoarã ama escu cãndãsitu cã, deadunu cu prezidentulu, cu oamiñilli responsabili ditu partidi, și cu andruparea a cetățeañiloru, putem s’triţemu ma largu pritu aestã catandisi greauã și s-u-aduţemu România pi unã cali ma bunã, adãvgã premierlu aleptu.
Analistulu politicu Cristian Pîrvulescu spusi, viniri, că Ilie Bolojan easti mutritu ca unu chirurgu araţi, cari va s’facã hirisi ama nu cu anesteziclu, alidzearea a liberalui trã ipotisea di premieru hiinda ‘logică’, ama ari şi piriclliuri. Himu di cabaia kiro tu unã criză multiplă. Xikea bugetarã zñiipseaşti credibilitatea ali Românie, Comisia Europeană caftã misuri concreti, iarapoi populismulu ufiliseaşti tuti aestea emu pi TikTok, emu tru Parlamentu, spusi Pîrvulescu, trã AGERPRES. ‘Aestă alidzeari nu easti un ceare, cã easti unã şcurticã. Ma s’amintã, Ilie Bolojan va u-ndreagã huzmetea cu tut ţi asparsi tutã clasă politică. Ma nu, ari cãbilea s’himu marturlli a bitisitãllei tru unã aradã democraticã crehtã’, cama spusi Pîrvulescu.
Autoru: Corina Cristea
Armãnipsearea: Taşcu Lala
