Inflaţia, pi unâ ñicâ scâdeari
Tu Românie, 2025 s-bitisi cu unâ ratâ ali inflație di arada tu anu di 7,3%, dupâ ți indicatorlu avu unâ ñicâ scâdeari tu bitisita di anu.
Tașcu Lala, 03.02.2026, 00:11
Inflația tu Românie avu unâ ñicâ scâdeari tu bitisita a anlui 2025, dupâ ți tricu praglu psihologhic di dauâ țifri. Ași cum scoasirâ tu padi datili tipusiti ñiercuri di Institutlu Național di Statisticâ, rata di cathi anu ali inflaţiei, tu meslu andreu 2025 andicra di andreu 2024, fu di 9,7%. Tu tutu anlu ți tricu, inflaţia fu di 7,32%, andicra di 5,6% tu 2024, nai ma multu criscândalui pâhălu la serviții, dapoaia pâhălu la pârmâtiili nialimentari ş-la ațeali alimentari.
Uidisit cu spusa a INS, pi protili locuri tu toplu a scunchiriloru suntu energhia electricâ, cu aproapea 61 di proțenti, urdinarea pi calea di her și cafelu, cu vârâ 24 di proțenti, energhia termicâ şi urdinarea pi calea a aerlui, cu crişteri di cama di 18% cathi unu. Ma s-mutrim la meslu brumaru 2025, anda România eara vâsilia cu nai ma marea inflație ditu Uniunea Evropeanâ, datili INS spun unâ ñicâ scâdeari a indicatorlui tu meslu ditu soni andicra di meslu di ma ninti.
Analișțâlli finanțiari dzâcu că tora ankisi unâ cali ayalnicâ di scâdeari a inflaţillei. Cu tuti aesti, ei luyursescu că armâni mari pircilliul a niscântoru năi crișteri di taxi tu estanu, tu arada a gairețloru ți li adarâ executivlu di București di scâdeari a xikillei bugetarâ ali Românie. Analistul finanțiar Adrian Codîrlaşu, prezidentul CFA România (organizaţia profesionişțâlor tu investiţii ditu România), dzâsi ti Radio România:
“Videm tu andreu prota scâdeari cama susto, a că easti ñicâ, ama ma s-fâțem biani cu meșli di ma ninti, easti cama salami, ali ratâ ali inflaţie. Videm, dirmi, ankisita a unlui proțes di scâdeari ali inflație, ți va s-facâ pri ayalea. Dirmi, s-nu nâ aştiptăm sâ scadâ inflaţia ayoñea ș-multu, ea va sâ scadâ pri ayalea, cu ândauâ lucri cama di simasie tu daua parti di estanu. Avum crişteri di taxi şi ahurhiindalui cu năulu anu. Di cara la automobili, apartamenti şi casi nu s-veadi tu inflaţie, că nu intrâ tu niți unâ componentâ ațeali crișteri di taxi, ama easti limbid că scadi putearea di ancupârari. Ama, acțizili la combustibil, ți s-ascunkirâ dit 1 di yinaru, va s-dukeascâ tu inflaţia ditu yinaru. Dirmi, politica fiscalâ armâni ma largu protlu piriclliu. Noi, la CFA România, luyursim că va s-agiundzemu tu bitisita a anlui cu unâ inflaţie anamisa di 6 şi 7%, cara s-nu s-facâ năi crișteri di taxi salami.”
Uidisitu cu ațea ditu soni prognozâ ali Bancâ Naţionalâ ali Românie, inflaţia di cathi anu va sâ scadâ salami ahurhiindalui cu meslu avgustu, dupâ bitiseara a efectilor di crişteari a TVA-lui, va s-agiungâ dapoaia la 3,7% tu bitisita di anu ș-poati s-agiungâ la țifra minduitâ di BNR, di 1,5-3,5%, tâș tu protlu trimestru ditu 2027.
Autor: Daniela Budu
Apriduțearea: Mirela Biolan
