Lucarli di amprotusa a executivului
Dumenea economica şi atea fiscala, deadun cu meatrili sutiali, va s-hiba maxus tru menga a Executivlui di Bucureşti tru actuala sesiune legislativă, cari nchisi aesta stătămână. 12 suntu priorităţli dimandati di premierlu social-democrat Victor Ponta, a deapoa, anamisa di aesti s-aradapsescu ţanearea tru idyea scară a meatrilor di echilibru sutial cari mutrescu indexarea a pensiilor, a alocaţiilor tra cilimean’ili dit familiile defavorizate şi a indemnizaţiilor tra oamin’il’I sicaţ. Nomlu a Falimentului Personal, una nauă legislaţie mutrindalui redevenţili, nai programi tru dumeniile ali educaţie şi a sănătatil’ei suntu, tutunaoara, tru arada di lucru a Guvernului.
Corina Cristea, 03.02.2015, 11:57
Dumenea economica şi atea fiscala, deadun cu meatrili sutiali, va s-hiba maxus tru menga a Executivlui di Bucureşti tru actuala sesiune legislativă, cari nchisi aesta stătămână. 12 suntu priorităţli dimandati di premierlu social-democrat Victor Ponta, a deapoa, anamisa di aesti s-aradapsescu ţanearea tru idyea scară a meatrilor di echilibru sutial cari mutrescu indexarea a pensiilor, a alocaţiilor tra cilimean’ili dit familiile defavorizate şi a indemnizaţiilor tra oamin’il’I sicaţ. Nomlu a Falimentului Personal, una nauă legislaţie mutrindalui redevenţili, nai programi tru dumeniile ali educaţie şi a sănătatil’ei suntu, tutunaoara, tru arada di lucru a Guvernului.
Aesti priorităţ nchisescu di la premisa a unei stabilitati şi colaborari anamisa di Parlament si Guvernu. Aesti featiră ca tru treil’I an’I dit soni s-avem una creaştiri economică, una n’icsurari a şomajlui şi una inflaţie di 1%, anlu ti tricu, cundil’e Victor Ponta tru arada a Oaral’ei a prim-ministurlui” — iniţiativă tru premieră, cari spuni tra prezentarea a priorităţlor legislativi di cătra caplu a Executivlui, tru Cameara a Deputaţlor, tru ahurhita a cathi unlui mes calendaristic. Asi cum spuni premierlu, una parti cât cama importantă dit creaştirea economică lipseasti s-agiunga la cetăţean’i prit una ampartari cama tin’isita şi s-li tana tru idyea scara echilibrili sutiale. Guvernul va s-lipseasca s-parastisească a Parlamentului naulu proiectu a Codlui fiscal şi di procedură fiscală, pruvidzut s-hibă bagat tru lucru la 1 di yinar 2016 ş-ti ari tru scupo una legislaţie cama limbidă, cama cu pistipseari tru una dumeni di thimel’iu — atea a fiscalitatil’ei.
Anamisa di pruviderli ti li avu tru videala s-aradapsescu tanearea tru idyea scara a CAS n’icsurat, a TVA scădzut la pâni, a cotal’ei unica, nipaltearea a impozitlui pi profitlu reinvestit şi ndridzearea a condiţiilor di alumta contra a evaziunil’ei fiscala — prioritatea orlea-zorlea dimandată di premier. Tru dumenea a sănătatil’ei, Ponta ari nadie că scupolu tra cari programlu mutrindalui cardul di sănătati fu adoptat, atel tra s-asiguripseasca transparenţă, tra s-curma furlachea şi tra s-aiba una turlie cu pistipseari tra chiverniseari, s-aducă hairlatica tru yinitor.
Premierlu cundil’e, di altă parte, ti agiutorlu ti lu da Executivlu tra adoptarea unlui nom a insolvenţal’ei tra persoanili fizite tru spirit european, cari s-asiguripseasca una protecţie a aistor dinintea a crizilor financiare. Cristearea economică easti toradioara pi carti, nu s-ducheasti ngepea a român’ilor”, vini, dit opoziţie, apandisea a liderlui di la gruplu a PNL. Ludovic Orban cutugursi acţiunile a Guvernului, pi cari lu afla cabati ca aleapsi s-guverneadza prit ordonanţe di urgenţă şi nu prit dezbateri transparenti tru Parlamentu. Tru minduita al nas, Executivlu lipseasti s-cilastaseasca nu masi prit meatrili dit plan economic şi sutial, ama si prit adoptarea a naului cod electoral şi alaxearea ali Constituţie.
(armanipsearea: Tascu Lala)
