Majoritati pro-europeană tru Parlamentulu di Chişinău
Bogdan Matei, 12.07.2021, 14:17
Formațiunea prezidențială pro-occidentală Partidlu Acţiuni şi Solidaritati (PAS) amintă categoricu alidzerli parlamentari antiţipati di dumănică ditu Ripublica Moldova. După misurarea-a voturloru ditu cvasi-totalitatea-a secțiilor di votari, PAS, thimillusitu di șefa-a statlui, Maia Sandu, amintă cama di giumitati ditu sufragii. Bloclu Electoral a Comuniştilor şi Socialiştilor (BECS), cumăndusitu di foștii șefi filoaruși a statlui, comunistul Vladimir Voronin și socialistul Igor Dodon, easti doilu, cu aproapea unu cirecu ditu opţiuni. Tru năulu Legislativ nica ari intrată maş partidlu populistu a sulfuroslui oligarhu fugaru Ilan Șor, protagonistul a ma multiloru dosari greale di aruşfeti, ţi easti şi condamnatu tru primă instanţă la şasi añi di hăpsani. Niţiună ditu alanti aproapea 20 di listi di candidaţ nu tricu praglu electoralu. Multu slabu, di sumu un proţentu, fu scorlu a aţiloru dauă formaţiuni cari promoveadză dişcllisu făţearea ună cu România, Partidlu a Unitatillei Naţionali (PUN) şi Alianţa ti Unirea-a Românilor (AUR), franciză a formaţiunillei naţionalisti omonimi, tru opoziţie tru Parlamentul di Bucureşti.
Analiştilli cundilleadză că, uidistu cu aţelu ditu soni sondaju, rata-a unioniştiloru ditu ripublică easti tutu di 40%, ş-cama şi aeşţă aleapsiră ti partidlu prezidenţialu. Prezidenta Maia Sandu dimăndă, tu 28 di apriiuru, că simnă decretlu di dizolvari a Parlamentului, dominatu di stânga filoarusă şi niaxizitu s’aducă pi ipotisi un guvernu, și acllimă ti alidzeri legislativi antiţipate tru 11 di alunaru. Comentatorlli spunu că şefa-a statlui avu tru mengă ufilisearea a tutăloru proţedurlor constituţionali, ta s’poată s’ncllidă câtu cama ntrăoară aţelu di ma ninti legislativ, lugursitu nai ma coruptu ditu istoria di trei dekenii a republicăllei independenti. Aleaptă prezidentu, tru toamna-a anlui ţi tricu, cu un programu pro-Uniunea Europeană, Maia Sandu ălli stipsi, ma multi ori arada, pi aţelli di ma ninti deputaț că vor să-lli slăghească autoritatea și cilăstăsi ti organizarea alidzeri leghislativi ninti di kiro, aţea turlie că Parlamentul s-u agiută tru alumta ti curmarea ali aruşfeti şi a pandemiillei di coronavirus.
După scorlu ţi nu ş-ari preţedentu amintatu tu alidzeri di unu partidu declaratu di dreapta, partener a PNL (la co-guvernari tru România) şi a popularloru europeni, prezidenta va s-aibă, neise, tuti pârghiili a putearillei. Ea ari ligături multu buni Bucureşti, di iu, pi ningă multi echipamenti medicali, Ripublica Moldova ari loată giumitati di miliuni di vacţinuri anti-COVID-19, şi ari uşi dişcllisi Bruxelles, Paris ică Berlin. Ama Maia Sandu armâni şefa a unlui ditu nai ma oarfăni craturi di pi continentu, lăndzidu di aruşfeti şi minatu di separatismulu pro-arusu ditu Transnistria (est), aşi că victoria di dumănică ălli caftă cilăstăseari, cabaia multu, a deapoa greulu a mandatlui a llei di aoa şi nclo yini.
Autoru: Bogdan Matei
Armânipsearea: Taşcu Lala
