Meatri tra n’icsurarea a zn’iilor ti poati s-li aiba pesta a porcului african
Corina Cristea, 04.09.2018, 12:59
Cama di 140.000 di porţa fura tal’eaţ tru stămân’ili dit soni tru România zn’iipsita di pesta a porcului african — una langoari ti multu greu poati s-hiba ţanuta sum control tru condiţiile tru cari tra ea nu ari yitripseari. Ma multu, viruslu nu dezvoltă anticorpi, di u fati aesta turlie crearea a unui vaccin. Tru aestu kiro, tru România ari aproapea 4,5 miliun’i di porta, cundil’e ministrul ali Agricultura, Petre Daea, a deapoa un cirecu dit judeţe suntu zn’iipsiti. Nu pisti tut — ari, di la caz la caz, locuri tru cari viruslu fu aflatu masi tru câti una nicukirata ica, tru alantu capu, aestu intra tru complexe mari cu dzat di n’il’i ica nica si cama di una sută di n’il’i di porta. Tru tuti cazurli s-apufusi tal’earea a portaloru.
Nai cama dramatic caz armâni atel dit judeţlu Brăila, tru sud-estul a vasiliil’ei, la nai cama marea fermă di porta dit România şi a daua ca mărime dit Europa, iu isearea tru videala a viruslui dusi la declanşarea a procesului di gazari şi ngrupare a portalor tal’eaţ. Easti zborlu ti 140 di n’il’i di porta la ferma adusa aminti, a deapoa proceslu s-lugurseasti că va s-tana aproapea un mes di dzali. Populaţia lipseasti sa stiba că nu ari altă cale nafoara/ andicra di tal’eari, catu greaua s-hiba catastisea tra s-adram aestu lucru, exighisi ministurlu, aducandalui aminti că va s-hiba loati ma largu meatri cu scupolu ti danaseari tindearea a viruslui. Tru pânayiruri nu s-da izini ti darea-loarea a carnil’ei di porcu şi s-apufusira filtri rutiere ş-ti dezinfectari tru mardzin’ili a judeţilor iu ari fucurini. Ministurlu nica spusi că ari caftata agiutor di Bruxelles tra combaterea a pestal’ei di porcu african, a deapoa 12 di state ansarira tra s-agiuta ali Românie — vasilie cari, spuni Petre Daea, s-vigl’e di aestu virus prit meatri preventive kiro di 5 an’i.
Opoziţia di dreapta di Bucureşti şi prezidentul Klaus Iohannis stipsescu, ama, guvernarea PSD-ALDI ti kivernisearea slaba a catastisil’ei, spunandalui că mulţa fermieri suntu tora tru praglu a falimentul. Atel di ma ninti premier Dacian Cioloş zburasti ti una criză multu greaua, cari poati s-asparga tut sectorlu zootehnic a potaloru dit România, una s-una cu concedierea a n’il’iloru di lucratori dit sector. Dacian Cioloş spuni că tru harea di ministru ali Agricultura tru România şi la nivel european, cându fu comisar di resort, s-ampulisi cu ahtari catastisi şi s-vidzu că, ma s-cilastaseasca si s-lia meatri di cu kiro, lucarle pot s-hiba ţanute sum control. Nu dip tru soni, feati timbihi că ari riscul di curmari a exportului di carni di porcu dit România tra un kiro, a deapoa consecinţele pot s-hiba babageani, yilipsiti nica si pritu creaştirea ali inflaţie.
Autor: Corina Cristea
Armanipsearea: Tascu Lala
