Moabeț ti defițitlu bugetaru
Unâ oarâ cu pâzârâpserli ti adrarea ali nauâ Kivernisi, București s-caftâ cearei ti scâdearea a hărgilor.
Tașcu Lala, 03.06.2025, 07:53
Unâ ș-unâ ți lo mandatlu di prezidentu ali Românie, Nicușor Dan li câlisi pi moabeț informali tuti partidili reprezentati tu Parlamentu. Furnia – pi di unâ parti, pâzârâpsearea ali unâ prezențâ tu yinitorlu Executiv, pi di altâ parti, aflarea a niscântor cearei mintiminoasi ti catastisea lai ligatâ di defițitlu bugetaru multu mari ali vâsilie. Ñiercuri, dupâ cama di 10 sâhăț di moabeț, la pripunirea a prezidentului Dan, furâ di câbuli s-adarâ dinâoarâ cu pâzârâpserli ti adrarea ali nauâ Kivernisi, și unu planu di misuri ti scâdearea a hărgilor publiți ți s-hibâ minduit di formațiunili pro-ivropeani, planu ți s-hibâ bâgatu tu practikii di yinitorlu Executivu.
Ti aestu scupo, PSD, PNL și UDMR – ți urseaști tora vâsilia, la cari s-adavgâ USR și Pareia a minorităţlor naţionali, alti pi ninga ațea mâgireascâ, pufisirâ s-adarâ unâ parei di lucru tehnicu ș-la andamusili a llei s-llia parti și reprezentanțâ ditu partea ali Administraţie Prezidenţialâ.
Catastisea icunomicâ şi finanțiarâ ali Românie easti lai ș-vahi va s-facâ crișteri di taxi ş-impoziti – dzâsi liderlu interimar a PNL, Ilie Bolojan, ți easti vrutu di prezidentul Nicușor Dan ti thesea di protu-ministru. Ți alti culăi ari nica tu minduita alu Ilie Bolojan:
ʺProta chi prota, unâ scâdeari a hărgiloru di funcţionari a Statlui românescu, analiza ali cathi instituţie, aclo iu potu s-hibâ ma pțâñi oamiñi pi lucru, mindescu că easti ananghi di unâ ahtari scâdeari, scutearea a oamiñilor ți lucreadzâ niheamâ, ama llia pâradz mulțâ, scâdearea a hărhiloru ti cari nu pot s-da giuiapi, ta s-putemu s-dămu idyili serviții, ama cu ma pțâñi pâradz ditu partea a cratlui.ʺ
Iarapoi, tu minduita a liderlui interimar ali USR, Dominic Fritz, ninti s-creascâ TVA-lu, lipseaști s-talli ma multi: ʺNinti s-criştem TVA-lu cu unu punctu şi s-amintămu ditu aesta 7 miliardi di lei, aidiţ s-tâlliemu sporlu di antenâ, cari easti 6 miliardi di lei. Ș-ari nica ndauâ ahtări paradigmi. Bugetlu ali vâsilie easti rezultatlu a vrearillei politicâ a ațiloru ți cumândârsescu. Ş-tora, mini minduescu că vini oara s-aspunemu vrearea politicâ, s-nu mata hârgiuimu ma mulțâ pâradz dicâtu avemu.ʺ
Prezidentul UDMR, Kelemen Hunor, zburâ ti unâ analizâ cu multâ mengâ a misurloru yinitoari di andridzeari icunomicâ: ʺProta cripari easti s-aduțemu, estanu, ma mulțâ pâradz, aproapea 30 di miliardi, maca vremu s-agiundzemu la unu defițitu di 7%. Ama aestu lucru nu putemu s-lu adrămu niți pritu criştearea a impozitilor i a taxilor, niți pritu tâlliarea a hărgiloru. Maca va nidzemu pi unâ cali i altâ, aestu lucru va s-ducâ la unâ zigâ bugetarâ strâmbâ ș-la tensiuni tu suțiitati.ʺ
Ditu partea ali opoziție parlamentarâ naționalistâ, la moabețli di ñiercuri cu prezidentulu ali Românie lo parti mași Partidlu a Oamiñili Tineri (POT), cari s-alumtă ti scâdearea taxiloru ș-ti unâ ma bunâ adunari a loru. AUR şi S.O.S. România nu vinirâ la moabeț.
Autor: Roxana Vasile
Apriduțearea: Mirela Biolan
