Năi cumândârseri ali SRR, TVR și AEP
Leghislativlu ș-deadi psiflu ti năili Consilii di Administraţie ali SRR şi SRTV.
Tașcu Lala, 24.11.2025, 22:17
Parlamentul di București va ș-da psiflu, marţâ, ti năili Consilii di Administraţie a posturlor publiți di Radio şi Televiziuni. Eali va s-hibâ adrati ditu 13 membri – optu ditu partea a grupurlor parlamentari, doi ditu partea a arugațloru ş-câti unu di la minorităţli naţionali, prezidențâ şi chivernisi.
Ași, Consiliul di Administraţie ali SRR va s-hibâ adratu ditu: Ruxandra Ileana Săraru, Radu Bogdan Herjeu şi Alexandru Ioan Şerbănescu, di la partia PSD; Maria Muntean, di la partia AUR; Vlad Mircea Pufu, di la partia PNL; Robert Cristian Schwartz şi Alexandra Coliban, di la partia USR; Bodoczi Annamária di la partia UDMR; Ruxandra Georgeta Gheorghe di la partia ali Parei a Minorităţlor Naţionali; Dragoş Gabriel Pătlăgeanu, di la partia a Prezidentului ali Românie; Nadina Ioana Dogioiu, di la partia a Chivernisillei; Marius Dorian Tănase şi Nicoleta Viorica Balaci di la partia a arugațlor SRR.
La postul public di televiziune, membrilli titulari a Consiliului di Administrație suntu: Loredana Corchiş, Nicoleta Amalia Matei şi Stelian Bărăgan di la partia PSD, Radu Carp şi Cristina Ancuţa Pocora di la partia PNL, Catrinel Trofin di la partia USR, Monica Simona Ghiurco di la partia AUR, Anderco Aliz Timea di la partia UDMR, Cristina Narcisa Manciu di la partia prezidentului ali Românie, Ana Adriana Săftoiu di la partia ali Chivernisi, Emanuel Sorin Torică și Cristian Godinac di la partia a arugațloru SRTV și Borislav Velimirovici di la partia a minorităţlor.
Aduțemu aminti că la psiflu di marţâ parlamentarilli AUR, tu opoziţie, nu loarâ parti. George Simion, nihârsitu di aestu lucru, deadi hâbarea că va lâ da tu șteari a autoritățloru di abuzlu tu servițiu, dzâcândalui că formaţiunea câmândâsitâ di elu avea ândreptul s-aibâ câti dauâ locuri tu dauli Consilii di Administraţie, ama nu unu cum ari tora.
Di cara ș-deadirâ giuratlu, membrilli a Consiliilor di Administraţie s-adunarâ tu şedinţi ahoryea ta aleagâ/numâseascâ candidaţlli ti thesea di preprezidentu director gheneral. La TVR nominalizarea easti Adriana Săftoiu, giurnalistâ ma ninti, ex-purtâtoari di zbor la Președinții și parlamentaru ninti kiro. Giurnalistul și comentatorlu Robert Schwartz, redactorlu-șef di ma ninti ali redacție Deutsche Welle tu limba română anamisa di añilli 2000 și 2020, el fu pripus ti thesea di prezidentu director gheneral ali Suțietati Românâ di Radiodifuziuni. Doilli candidaţ va s-hibâ audiaț, stâmâna aesta, tu Comisiili ți va s-adunâ ti culturâ a Parlamentului, a dapoaia, lipseaști s-dzâcâ și Leghislativlu ma s-hibâ di câbuli.
Pi di altâ parti, Parlamentul fu sinfun ș-cu pripunirea a PSD mutrindalui numâsearea al Adrian Ţuţuianu ti thesea di prezidentu ali Autoritati Electoralâ Permanentâ. El fu senator, prezidentu a Consiliului Giudețeanu Dâmbovița și ministru ali Apârari. Tu 2012, Adrian Țuțuianu fu mutrit di DNA ti trafic di influenţâ tu ligâturâ cu campania electoralâ ti alidzerli locali, ama nu ahurhi canâ mutrearti penalâ contra a lui.
Autor: Mihai Pelin
Apriduțearea: Aurica Piha
