Nâinti cu 6 an’i, zurbâlâki tu câsâbălu Chişinău
S-înclid 6 an’i di la protestili dit Republica Moldova, la cari luarâ parti dzâţ di n’ii di oamin’i, ma multu tiniri, anvirinaţ di turlia cum furâ andreapti alidzerli parlamentari dit 5 di Apriiur ş-di nivelu di banâ, vidzut ca hiinda nai ma scâdzutlu dit Evropa.
Valentin Țigău, 07.04.2015, 13:25
S-înclid 6 an’i di la protestili dit Republica Moldova, la cari luarâ parti dzâţ di n’ii di oamin’i, ma multu tiniri, anvirinaţ di turlia cum furâ andreapti alidzerli parlamentari dit 5 di Apriiur ş-di nivelu di banâ, vidzut ca hiinda nai ma scâdzutlu dit Evropa.
Alidzerli furâ amintati di Partidlu a Comunişţâlor, la puteari, ama protestatarl’ii aurlarâ că s-adrară baia fraudo la misurarea a voturilor. Pi 6 şi 7 di apriiur 2009, Chişinau furâ manifestaţii ţi deadirâ cali la aspârdzearea a sediilor ali Prezidenţii şi a Parlamentului.
Nu ma pţân di un om fu vâtâmat, iara suti furâ arestaţ. Caplu ali vâsâlii di atumţea, Vladimir Voronin, adusi câbati ali Românii că ari ahurhitâ tuti protestili şi hâbârisi scutearea dit vâsâlii a ambasadorlui român tu Moldova ama şi bâgarea disnău tu practico a sistemlui di vizi ti cetăţen’ii român’i.
Ministerlu di Externi ali Românii nu apruchie câbăţli adusi di Voronin. Dupu ţi s-bitisirâ protestili, opoziţia ţânu-n loc alidzearea a prezidentului a statlui, lucru ţi dusi la alidzeri antiţipati şi la yinearea a partidilor pro-europeani la puteari. Eeali adrarâ unâ suţatâ cu numa di Alianţa ti Integrari Europeanâ, cu unâ magioritati di 53 dit aţeali 101 di locuri tu parlamentu.
Dapoaia, Alianţa s-asparsi, temi ti moaubeti ca inşearea a Republicâl’ei Moldova dit neutralitatea militarâ, unirea cu România icâ ampârţarea a ipotisilor di cumândiseari nu agiunsirâ la idyea minduieari.
Vinirâ trei interimati la ipotisea di prezidentu, ca, tu Marţu 2012, s-hibâ aleaptâ o persoanâ apoliticâ, magistratlu Nicolae Timofte. Nai ma recentul dit guvernili a Moldovâl’ei intrâ dupu alidzerli dit 30 di Brumar 2014 şi fu apruchiat di Parlamentu tu Yinaru, cu agiutorlu a voturilor a comunişţâlor.
Protestili dit 7 di Apriiur furâ numânâsiti Revoluţia Twittter câ ţe, dupu prota revoluţii aspusâ la televizii — revoluţia româna dit Andreu 1989 — eali furâ reflectati, live, on line, di la Chişinău. Observatorl’ii di turlii politicâ dzâc că fu ti prota oarâ cându ligâturli soţiali on line şi-aspusirâ putearea di adunari a masilor di oamin’i.
Dupu 7 di Apriiur 2009, catandisea ahurhi disnău, ma pi altu continentu: tu Tunisia şi tu Egiptu, iu protestili furâ andreapti tu idyea turlii, cu agiutorlu a Facebook-lui şi Twitter; oamin’ii amintarâ s-aspunâ a-ntreagâl’ei lumi ţi-s faţi tu vâsâlia a lor. Adzâ, pi ligâturli di socializari, nica suntu grupuri ţi cl’ieamâ poplu la revoluţii, tu Siria icâ Yemen, iara tu alti vâsâlii, ahtări ligâturi on line furâ ofiţial încl’isi.
