Nău accidentu cu victimi tru sistemlu sanitar
Roxana Vasile, 13.04.2021, 17:47
Ună defecţiuni la hălatea di oxigen a unâllei unitati mobilă di terapie intensivă inaugurată cu maş ndauă dzăli ninti tru avlia-a Spitalui di Lângori Infecţioasi şi Tropicali “Doctor Victor Babeş” di Bucureşti dusi, luni, la moartea a trei paciență infectaț cu năulu coronavirus. Alță ţinţi fură transferaț. Caplu a Departamentului trâ Catandisi di Ananghi, Raed Arafat, exighisi că s-agiumsi la ună crişteari pi napandica a presiunillei la oxigenu, lucru ţi feaţi că ventilatoarili sâ s-dănăsească. Premierlu Florin Cîţu ălli căftă a ministurlui ti lucri di năuntru, Lucian Bodi, snkisească ntrăoară ună anchetă nica şi transparentă pritu cari aţelli aflaţ câbati s-da giueapi:
“Ditu aţea ţi ştimu până tora, s-pari că easti un accidentu, ama ahurhi şi ună anchetă — zburâmu cu ministurlu di Interni. Ma largu, va s-ahârdzimu resursi şi va s-cilăstăsimu s-avemu ma multi apaturi di terapie intensivă, aşi cum câftămu aoa şi doi meşi di dzâli, căţe himu tru aestă alumtă cu pandemia.” Traghedia di la “Victor Babeş” nu easti maş ea goală: tru meslu brumaru, un mari focu s-feaţi la secția ATI, ahărdzită tră paciențălli cu Covid-19, a Spitalui Județeanu di Urgență Piatra Neamț (nord-estu) ; deapoa, tru yinaru, București, tru unu ditu pavilioanili a nai cama modernului Spitalu di lângori infecțioase ditu văsilie, “Matei Balș”, foclu s-teasi tru ma multi saloani tru cari eara internaţ oamin’i cu turlii di mesi şi multu greali di Covid a curi lâ si dâdea oxigenu. Tru dauli focuri murirâ oamiñi, născănţă arşi.
La catandisea di niifharistuseari a bănătorloru nica s-adavgă și turlia tru cari fură scoşi nafoară, viniri noaptea, paciențăllii di la nai ma modernulu și ma câftatlu spitalu di ortopedie ditu România – “Foișor”, di București, alăxitu tru unitati cari s-yitripsească maş lăndzidzlli di Covidu. Nica şi politicieañi ditu partidili ţi suntu tru coaliția di ţentru-dreapta la guvernari âlu cutugursiră ministurlu di tora a Sănătatillei, Vlad Voiculescu. Tu ţi mutreaşti opoziția suţialu-democrată, aesta âlu cutugurseaşti premierlu Florin Cîţu că nu ălu scoasi di pi ipotisi şi dipusi contra a titularlui di la Sănătati ună nauă moțiuni simplă – a daua ditu aestă sesiuni parlamentară – tru cari âlu cutugurseaşti şi lu află căbati ti turlia cumu furâ scoşi nafoară pacienţăllii di la “Foişoru”, niaxizearea tra s-adară unu programu di testari tru measă trâ Covid-19 icâ eşeclu mutrinda criştearea a numirlui di apaturi la terapie intensivă.
Alfred Simonis, deputat PSD: Avum şi ma ninti miniştri alătusiţ di rolu ţi ălu avea la ministeri, ama canda vărnăoară vărnu s-aiba alăthusita cata cumu domnul Voiculescu.” Si s-hibă adoptată di Parlamentu, ună moţiuni simplă contra a unlui ministru nu duţi ună ş-ună la demiterea a aluştui.
Autor: Roxana Vasile
Armânipsearea: Taşcu Lala
