Nauâ frândzâ mutrinda niachicâserli prezidentu – premier

Cari arâsi pi cari? Prezidentul Traian Băsescu, atunţea cându-l cândisi pi premierlu Victor Ponta s-anyrâpseascâ un actu di colaborari di turlii instituţionalâ? Protlu ministru pi soţl’ii a lui liberali dit aţel chiro, cârtiţ ti aestâ ascumtâ achicâseari? Icâ şi prezidentul şi premierul, deadun, tutâ opinia publicâ?

România Internațional, 08.08.2014, 11:05

Cari arâsi pi cari? Prezidentul Traian Băsescu, atunţea cându-l cândisi pi premierlu Victor Ponta s-anyrâpseascâ un actu di colaborari di turlii instituţionalâ? Protlu ministru pi soţl’ii a lui liberali dit aţel chiro, cârtiţ ti aestâ ascumtâ achicâseari? Icâ şi prezidentul şi premierul, deadun, tutâ opinia publicâ?

Tora, cându aestâ achicâseari fu aspusâ di premier, niţi că mai ari vârâ simasii. Aestâ achicâseari, ama, easti importantâ ti Românii, iara premierlu s-ayunisi cându apufusi s-lu-aspunâ la tuţ, pistipseaşti Traian Băsescu. El îi câftă al Victor Ponta s-şi mutreasca ghini apofasea, nica unâ oarâ: Aestu dit soni actu l-u-agiutâ şi l-u-ascapâ di baia exiyisiri şi pi el, şi guvernlu a lui, maxus că aratâ a soţlor a noşţrâ stabilitatea mutrinda calea europeanâ ali Românii, tu criştearea a ligâturâl’ei transatlanticâ şi tu tin’isearea a statlui di îndreptu.

Tu unâ carti dişcl’isâ, Victor Ponta exiyisi câ ţe el veadi aestu actu ca hiindalui caduc. Ponta i-adusi câbati a prezidentului ti zboarâli dit un interviu iu aestu dit soni dzâsi că fu arâs ta s-anyrâpseascâ actul ti cari zburâm. Aestu lucru dzâţi el, fu ti Ponta furn’iea ti cari el adră publicâ achicâsearea a lor. Prezidentul dzâţi că el nu ari spusâ ahtari lucru canâoarâ, ama pricunoaşti că nu zburâ multu limpid cu ziaristul cari l-u-antribâ îndauâ lucri mutrinda aestu subiectu.

Aduţem aminti că actul fu anyrâpsit dupu alidzerli dit 2012, amintati limpid di magioritatea cari tu vearea a idyului nu putu s-lu-ascoatâ di pi ipotisi pi prezidentu. Aestâ achicâseari lipsea, câ ţe soţl’ii dit Ocţidentu ali Românii alâsau s-veadâ că au gaile mutrinda naua catandisi dit vâsâlia a noastâ. Încâcerli, câbăţli şi zboarâli niuidisiti furâ totna întrâ prezidentu şi premier. Tuti pisti tuti actul fu bun, agiută România s-armânâ pi unâ cali bunâ, democraticâ, chiola soţl’ii a ei ditru xeani nu pistipseau că va s-hibâ aşi. Pi di altâ parti, cumândisearea deadun, prezidentu — premier, nu fu canâoarâ ma lai ca tora,

Lucârli s-asparsirâ estan, unlu electoral, ţi ahurhi cu europarlamentarli şi ţi va s-bitiseascâ cu alidzerli ti prezidentu. Dupu dauâ mandati şi dzaţi an’i la cumândisearea ali vâsâlii, Traian Băsescu nu mai ari îndreptul s-li’a parti. Poati, ama, s-aspunâ că andrupaşti pi iţi vârâ dit candidaţl’ii di dreapta, maşi ta s-nu iasâ prezidentu Victor Ponta. Ligâtura lai dintrâ Traian Băsescu şi Victor Ponta, la cari s-adavgâ şi problemili ţi yin unâoarâ cu alidzerli, nica va s-da cali la unâ catandisi politicâ ici bunâ.