Niachicâseri mutrinda n’icşurarea CAS
Prezidentul român Traian Băsescu şi premierlu Victor Ponta ş-ascoasirâ tufechili tu unâ nauâ frândzâ a alumtâl’ei di turlii politicâ. Tora, tema a niachicâserilor easti n’icşurarea cu 5% a pâradzlor daţ ti asiguripserli soţiali la angajator, pi cari Guvernlu va s-u bagâ tu practico di la 1 di Sumedru. Luni, caplu ali vâsâlii l-u acl’imâ pi aţel a Executivlui la moaubeţ, dupu ţi, stâmâna ţi tricu, hâbârisi că nu va s-aproachi aestu dit soni nom, maşi dupu ţi Guvernul va l’i-aspunâ di iu va s-l’ia pâradz tu ţi mutreaşti aestâ n’icşurari şi dupu ţi va s-dzâcâ ţi va s-adarâ ta s-nu hibâ problemi la buget.
Roxana Vasile, 15.07.2014, 11:48
Prezidentul român Traian Băsescu şi premierlu Victor Ponta ş-ascoasirâ tufechili tu unâ nauâ frândzâ a alumtâl’ei di turlii politicâ. Tora, tema a niachicâserilor easti n’icşurarea cu 5% a pâradzlor daţ ti asiguripserli soţiali la angajator, pi cari Guvernlu va s-u bagâ tu practico di la 1 di Sumedru. Luni, caplu ali vâsâlii l-u acl’imâ pi aţel a Executivlui la moaubeţ, dupu ţi, stâmâna ţi tricu, hâbârisi că nu va s-aproachi aestu dit soni nom, maşi dupu ţi Guvernul va l’i-aspunâ di iu va s-l’ia pâradz tu ţi mutreaşti aestâ n’icşurari şi dupu ţi va s-dzâcâ ţi va s-adarâ ta s-nu hibâ problemi la buget.
Tu minduita al Traian Băsescu, scâdearea CAS poati s-ducâ la un crişteari a defiţitului a pâradzlor di pensii ti cari Executivlu va s-creascâ taxili icâ s-scadâ investiţiili. Ama, exiyisirli a premierului Ponta şi a ministrului a lui di finanţi, Ioana Petrescu, nu-l cândisirâ. Prezidentul Băsescu: Mi aştiptam ca d-na ministru s-yinâ cu un program, cu unâ carti A4, s-n’i da argumenti. Nu avu. Easti, tu minduita a meau, unâ meatrâ electoralâ ayunisitâ, ţi va s-aducâ ma multi taxi ti popul. Pot s-anchisescu şi s-pistipsescu că zborlu aluştui nom easti s-agiutâ companiili, lucru ţi l-u andrupăscu ş-mini, ama pâradzl’ii va s-hibâ luaţ nâpoi di la cetăţen’i, tu unâ turlii icâ altâ — taxi directi icâ indirecti.
Di propagandâ politicâ, prit niapruchiarea aliştei meatrâ, îi aduţi câbati şi Victor Ponta a prezidentului. Premierlu ş-ţâni pi cicioari minduita mutrinda şansa a n’icşurărilor a contribuţiilor soţiali la angajator şi a efectilor aluştui lucru, pi chiro lungu — ascâparea di lucrul paranom, fârâ acti, şi adrarea di năi locuri di lucru. Premierlu Ponta: Îi exiyisii multu limpidi şi el ştea aestu lucru, că ti anlu 2014 nu s-alâxeaşti niţi unâ dit borgili ali Românii. Iara ti anlu 2015 – 2016, atunţea cându va nidzem tu Parlamentu cu năulu buget, va nâ minduim şi la evaziunea di turlii fiscalâ, la efectili pozitivi a apruchiarâl’ei a Nomlui ti insolvenţâ, la turlia cum u mutrim împrustarea icunumicâ ali Românii şi la unlu dit scupadzl’ii di time’liu pi chiro mediu, icâ: s-avem nu ma pţân di un lucrâtor cari s-da pâradz ti asiguripserli soţiali la un pensionar, câ ţe n’icşurăm aestu raportu, ama nu pânâ s-agiundzem la nu ma pţân di 1:1, câ ţe pi chiro di dzaţi, inghiţ an’i, catandisea va s-hibâ lai.
Dupu andamusea Băsescu – Ponta, prezidentul hâbârisi că, chiola aţea dit soni dzuâ ti apruchiarea a nomlui easti 24 di Alunar, el va ta s-zburascâ ş-cu reprezentanţâl’ii a emburilor pi tema a scâdearâl’ei CAS. El aşteaptâ – tu idyul chiro, aesti dzâli – di la ministrul di finanţi argumenti şi, maxus, ţifri concreti.
