Nomlu ti scutearea a nascantor taxi, la Curtea Constituţională

Leyla Cheamil, 16.11.2016, 13:26

Votat pi ayun’ie di Parlamentul di Bucureşti meslu ti tricu, nomlu cari pruveadi eliminarea a atilor cama di 100 di taxi nifiscali nu fu promulgat di przidentul Klaus Iohannis. Iniţiat di PSD, el pruveadi, ntra altele, eliminarea, di la 1 di yinar 2017, a timbrului di fisi tra autovehicule, a taxal’ei tra eliberarea a paşaportului temporar, a taxal’ei radio-tv, a paltearil’ei tra cazierlu fiscal. Seflu a statlui contesta, marţa, la Curtea Constituţională, actul normativ di furn’ia că nu suntu tin’isiti ndaua articole dit nomlu di thimel’iu. Ase, tru sesizarea pitricuta a magistraţlor di la Curti, prezidentul Klaus Iohannis spuni ca nomlu calcă normele constituţionale mutrindalui principiul di separaţie a puterlor tru stat şi atel a legalitatil’ei, raporturle a Parlamentului cu Guvernul şi rolu a Executivului.

Tru sesizarea di niconstituţionalitate, Klaus Iohannis spuni că mulţa cetăţeni au vrearea tra eliminarea a nascantor taxe, ama aestu lucru lipseasti sa s-faca pi una turlie coerenta, hairlatica şi responsabila. Şeflu a statlui lugurseasti, tutunaoara, că ayun’ia cu care fu mutrit aestu subiect di cătra Parlamentu feati ca nascanti meatri pruvidzute tru textul a nomlui s-acaţă tru isapi inditii de niconsituţionalitate: Di furn’ii, cari mini personal nu li cunoscu, s-lucra tru Parlamentu pi una procedură multu ayun’iusită, care nu deadi izni ica vahi nu avu vrearea tra s-tin’iseasca nascanti caftari a protedural’ei. Dimec, lugursiiu că nascanti lucri, şi pi procedură şi fondu, nu fura duri limbidzati di Parlamentu, şi caftaiu, neise una verificare pi constituţionalitate. Cadealihea, turlia tru care Curtea Constituţională va s-afla nascanti părţa lipseasti s-hiba reformulati, Parlamentul va s-poata s-adara aestu lucru, tru cazlu tru cari nomlu easte pitricut diznau la mine, cadealihea că va s-l’iau tru atea oara apofasea desi va lu vulusescu nomlu, ica va s-fac placarsea a Parlamentulyui sa u adavga cu hairi.

Prezidentul Klaus Iohannis feati timbihi că, prit aestu nom, România easti tru piricl’iu s-nastreaca ţinta di 3% di deficit, straxita dinintea a organismelor internaţionale. Una apofasi exclusiv politică, spusi iniţiatorlu a proiectului, liderlu PSD, Liviu Dragnea, tra apofasea a şeflui a statlui tra s-cafta control de constituţionalitate. Tru arada a lor, liberalii suntu simfun’I cu nai cama multe pruvideri a nomlui, ama lugursescu că easte ananghi di tanearea ma largu tru lucru a timbrului tra fisi şi a taxal’ei radio-tv.

Eliminarea a aistei dit soni scoasi tru migdani dezbateri apreasi pi scena publică. Apărătorl’i taxal’ei RadioTV — organizaţii şi experţa tru media — spun că tradzearea mana di la aesta şi finanţarea exclusivă a posturlor publiti di la buget va s-aduca dininti premizili tra subordonarea a lor politica. Curtea apufusi ca vade tra analiza a caftaril’ei data di 14 di andreu.

Autor: Leyla Cheamil

Armanipsearea: Tascu Lala