PAPA LAMBRU BALAMACE – CURCEAUA, ARBINUSHIE

Aduţeari aminti a Martirlor Armân’i şi Migliniţ dit Balcani, la Băsearica Ayiu Yioryi Nău” di București iu s-ţănu şi prota liturghiseari ti Preftulu Haralambie Balamace, la 12 di Apriiur 1914.

Tașcu Lala, 23.03.2018, 22:51

Aduţeari aminti a Martirlor Armân’i şi Migliniţ dit Balcani, la Băsearica Ayiu Yioryi Nău” di București iu s-ţănu şi prota liturghiseari ti Preftulu Haralambie Balamace, la 12 di Apriiur 1914.

Ază 23 di Marţu 2018, Bucureşti, Românie la Băsearica Ayiu Yioryi Nău” s-ţănu ună Liturghiseari şi Misali ndreaptă di Institutlu ʹʹEudoxiu Hurmuzachi” tră Român’il’i di Iuţido, instituție ţi easti sum areapta a Ministerlui tră Român’il’i di Iuţido, Societatea di Cultură Macedo-Română și Fundația Națională tră Român’il’i di Iuţido ti aduţearea aminti a Martirlor Român’i — Armân’i şi Migliniţ – dit Balcani.

Liturghisearea u ţănu Mult Luţitlu Preftu Varlaam Ploieșteanul, Episcop-Vicar Patriarhal deadun cu Preftul Paroh Emil Nedelea Cărămizaru şi cu alţă trei prefţa cari scoasiră tru videală că, maxus tora tu anlu Centenar, tinirlu bărnu lipseaşti s-hibă ngăldzătu cu identitatea criștină, cari lipseaşti s-hibă siminată tu fumeal’ea criştină şi tu băsearică.

Domnul Nicolae Brînzea, director gheneral a Institutlui ʹʹEudoxiu Hurmuzachi” tră Român’il’i di Iuţido haristusi a Multluţitlui Preftu Patriarh Daniel ti agiutorlu ţi ălu deadi ti dizvărtearea-a aliştei adunari tră aduţearea aminti a armân’ilor şi migliniţlor dit Balcani, a preftului paroh Emil Cărămizaru și a prefțălor slujitori di la Băserica Ayiu Yioryi Nău”, ama și a partenerlor instituționali și cundil’e simasia ţi u ari nsimnarea a aiştei andamasi: Evenimentul nă aduţi aminti ti simasia ti u ari ţănearea tru bană şi duţearea tră ninti a identitatil’ei românești prit curbani, nă aduţi aminti ti vrearea prit curbani. Român’il’i martiri tră identitati armân urnechi şi tru dzălili a noasti tu sinidisea/ conștiința a noastră, nă căndăseaşti s-duţem ma largu proiectul a lor cari ţăni di 1000 di an’i ş-cama. Cari ţi s-hibă provocărli ţi li aduţi istoria, ţi easti tu sinidise – harea tsi u-ari omlu s-aduchească n sinea-a lui că el s-află şi băneadză tu lumi, că lucărli s-fac tu bană aşi cum li veadi, că poati s-minduească şi să zburască ca om – armăni yie şi nu-ari ta s-keară.”

Pi arada ţănură un zbor:

Domnul Eugen Popescu prezidentul a Fundaţiil’ei ’’Român’l’I di Iuţido. Domnul Mihai Toti viţeprezidentul a Societatil’ei di Cultură Macedo-Română.

Ma largu domnul director a Institutlui ʹʹEudoxiu Hurmuzachi” tră Român’il’i di Iuţido Eugen Popescu călisi Pareia ‘’Boaţea a Pindului” ncapu cu domnul Vasili Topa şi Iancu Mataranga ta s-căntă imnul national a armăn’ilor ‘’Părinteasca Dimăndari’’ tră tin’isearea a Iroului Martir Papa Lambru Balamace.

Eara viniţ la aestă adunari ti Liturghiseari şi Misali armân’i di la Societatea di Cultura Macedo-Romănă, Suţata di Cultură Armânească di Bucureşti, Fara Armânească dit Românie, membri di la Institutlu “Eudoxiu Hurmuzachi” cum shi ună parei di mul’eri armâni dit hoara Pipera di ningă Bucureşti cari ndreapsiră şi misalea tră aduţearea aminti a Iroului Armânu Papa Lambru Balamace dit Curceaua, Arbinishie.

U nsimnară aesta adunari canalu Trinitas TV şi Radio România Internaţional — Secţia Armânească, reporter Taşcu Lala şi redactor Aurica Piha.

23 di Marţu 2018

RRI — Secţia Armânească

Reporter Taşcu Lala