Paris – summitlu ti Ucraina
România nu-ari s’pitreacâ askirladz tru Ucraina, nãpoi spusi tru summitlu ditu capitala ali Franțã, prezidentulu interimaru Ilie Bolojan.
Tașcu Lala, 29.03.2025, 06:06
Paris, tu cadurlu a unlui summitu, cãpiili di cratu şi di guvernu ditu vãsiliili cari şi spusirã vrearea tra s’agiutã Ucraina bitisirã muabeţli mutrindalui securitatea şi yinitorlu ali Ivropã. Agiutorlu militaru, icunomicu şi uminitaru faptu ma largu trã Kiev, simfunizarea streasă cu Statili Uniti cu tuti iniţiativili cari nãpoi s’aducã iriñea tru Ivropã, asiguripserli di securitati trã Ucraina, sancţiuñili politiţi şi icunomiţi bãgati ti Arusia di craturli ali UE eara protili lucri ti cari pitricuţlli a vãsiliiloru ţi loarã parti furã simfuñi.
Franţa şi Marea Britanie, cari thimilliusirã aestã aşi-spusã suţatã a voluntarloru’, cundilleadzã ma largu cã easti ananghi ti adunarea stogu a unãllei furteaţã cu askirladz ivrupeañi cari s-a asiguripseri di securitati tu locãrli ucraineani după bitisearea-a polimlui. Nãscãnţã di liderlli ţi eara duşi Paris nu aprukearã ta s’minteascã tu aestã acţiuni, a deapoa, alţã nu deadirã nica vãrã apandisi. Aesti askeri nu va s’hibã ti alumtari, nu va s’hibâ bãgati pi arãdãrikea frontului, nu va s’alãxeascã askirladzlli ucraineañi şi niţi nu va s’aibã rolea ti ţãnearea ali iriñi – suntu limbidzãrli fapti di prezidentulu frãnţescu Emmanuel Macron, cari ãlli pãtidzã cu unã naua numã: ‘furteaţa di xanaasiguripseri’.
Puterli ivrupeani suntu apufusiti s’ndrupascã pi lungu kiro askerea ucraineană, cari va s’agiungã protlu sturu di apărari ali Ivropã, axizitã s’nu s’agiungã la niţi nã fuvirseari-cãlcari ali Rusie pi continentu. Unã parei frãnţeascã-britanikeascã va s’hibã pitricutã tru Ucraina tra s’llia parti la ndridzearea a yinitorlui cadhuru ali askeri ucraineanã, nica spusi Emmanuel Macron.
Reprezentată la andamusea ditu capitala ali Franțã di prezidentulu interimaru Ilie Bolojan, România ş-lo borgea s’ndrupascã ma largu Ucraina ta si s’veaglle dinintea ali fuvirseari aruseascã. Alliumtrea, niţi unu askirlã românu nu va s’hibã pitricutu tu frontulu aţillei di ma ninti ripublicã sovieticã, unã apofasi ţi fu loatã pi livelu politicu, după cuvenda cu partidili ţi suntu tru Parlamentul di Bucureşti, nãpoi adusi aminti Ilie Bolojan:
”România ari un sinferu strateghicu s’ndrupascã ma largu Ucraina, di itia că ma s’nu aibã unã ahtari andrupari, frontulu easti tu piriclliulu ta s’cadã. Neise, ucraineañilli, priti aţea ţi adarã, cu vigllearea bãnãtorloru şi a locãrloru, ţãnu piriclliulu alargu. Iţi turlie di catastisi tru cari Ucraina ari unã cãdeari duţi la mãri mintireaşi şi unã nkisitã cãtã ascãpitatã, ţi niţi Ivropã ş-niţi România nu u va. Unu altu lucru ţi fu acãţatu tu muabeti spuni ti furteţli di asiguripseari ali irini şi, ditu aestã videalã, aşi cumu u-amu-spusã, România nu va s’pitreacã – şi dimãndã aestã provlimã multu limbidu – niţi un aşkirlã român tru Ucraina.”
Liderlli andãmusiţ Paris nica s’akicãsirã că easti ananghi şi ntrãoarã cã areapta ditu apiritã ali NATO s’hibã anvãrtuşitã, a deapoa, prezidentulu interimaru român spusi cã ari cãbilea cã pi teritoriulu a vãsiliillei s’hibã pitricuti, tu şcurtu kiro, nãi continghenti di askirladz aliaţ. Tutunãoarã, România va s’llia parti la pareia di lucru thimilliusitã ti viglleari cumu easti tiñisitã aţea ditu soni akicãseari ti dãnãsearea alumtiloru tu Amarea Lae.
Autoru: Mihali Pelin
Armânipsearea: Taşcu Lala
