Pensii cama mări tu Românie
Tu Românie, 82% ditu pensii furâ fapti ma mări, iara Poşta Românâ ahurhi s-da documentili iu easti apufusitâ alâxearea pi crișteari a loru. Năulu nomu intrâ tu practico ditu dzuua di 1 di yizmâciuni.
Tașcu Lala, 19.08.2024, 23:10
Cama di giumitati di miliun di documenti ți apufusescu fâțearea isapi diznău a pensiilor ta s-hibâ alâxiti pi crișteari, lâ furâ dati di poștași a pensionariloru, viniri, prota dzuuâ di distribuire a loru. Poşta Românâ easti singura companie di curierat şi servicii poştali ditu Românie ți agiundzi tu tuti kioșili a vâsilillei, hiindalui protlu furnizor di servicii poştali la livelu naţionalu.
Dicara ațelu ți u ari numa pi documentul-apofasi nu easti acasâ, documentul poati s-hibâ dat a unlui membru a taifâllei i la vârâ sói i va s-poatâ s-lu llia, dapoaia, di la ofițiul poştalu. Nai ma mulțâlli furâ, ama, acasâ, aștiptândalui cu niarâvdari documentili-apofasi, cu umutea că va s-hibâ pritu ațelli ți va s-lliea ma mulțâ pâradz. Trițearea a poștașlui âlli alâsă nai ma mulțâlli hârsiț, ama furâ ș-niscânțâ, cabaia, a curi nu lâ si deadi niți unâ crișteari.
Cama di 3,8 miliuni di pensii ditu tuti ațeali aproapea 4,6 miliuni furâ criscuti dupâ ți feațirâ unâ nauâ isapi, iara criştearea di arada fu di 622 lei (vârâ 125 evradz), dzâsi ministrul a Lucurlui ș-a Solidaritatillei suțialâ, Simona Bucura-Oprescu. Ea dzâsi ș-cându va s-agiungâ năili pensii. Simona Bucura-Oprescu:
“Tu dzuua di 26 di agustu va s-ahurheascâ s-hibâ datâ prota parti câtrâ Poşta Românâ, iara ditu 2 di yizmâciuni va s-ahurheascâ s-hibâ daț pâradzlli di factorilli poştali câtrâ pensionari. Tu 12 di yizmâciuni va s-hibâ daț pâradzlli pritu bancâ câtâ ațelli ți au cardu. Factorilli poştali va s-ducâ, ahurhindalui cu 2 di yizmâciuni, em năili taloani di pensie, ama şi, ti ațelli ți ș-llia ndrepturli pritu Poşta Românâ, pensiile alâxiti.
Tutnâoarâ, di la 1 yizmâciuni pânâ la 1 di marțu, va s-avem proțeslu di mutreari a ndrepturilor ditu arudz loati maș niscântiori, ninti di anlu 2001 pi thimelliu a adeverinţilor di la angajatori.”
„Niți unâ pensie nu scadi” – dzâsi nica Simona Bucura-Oprescu.
Crişterli suntu di la 1% pânâ la 100% dupâ istoriclu profesional ti cathi pensionar, di contributivitatea ți u avu tutâ bana activâ ș-dupâ anlu cându inși la pensie, dzâsi, tu arada a lui, prezidentul ali Casâ Naţionalâ di Pensii, Daniel Baciu.
El cundille că, ti añilli ți yinu, niți unâ pensie ditu România nu va s-hibâ ‘angllițatâ’, câțe ari unu mecanismu pruvidzut di năulu nomu di indexari cu rata a inflaţillei.
Dupâ apofasea di fâțeari isapi diznău, crișteri mări va s-aibâ oamiñilli ți lucrarâ cama di 40 di añi ş-ți nu avurâ unu indiți di corecţie tu añilli ditu soni. Nai cama multili, vârâ 3 miliuni, va s-hibâ criscuti cu sumi anamisa di 1 leu şi 1.000 lei (vârâ 200 di evradz). Va s-aibâ ș-pensii – aproapea 8.000 – ți va s-creascâ cu sumi di cama 3.000 lei, ama ş-vârâ 800.000 di pensionari ți nu va s-aibâ niți unâ crișteari.
Maca vârâ pensionaru nu akicâseaști apofasea a isapillei, poati s-caftâ detalii la casili teritoriali di pensii. Autoritățli dzâcu că ei pot s-caftâ mutrearea diznău ș-alâxeara a dosarlui di pensie, iara, dapoaia, s-poati s-hibâ adratu unu nău documentu-apofasi, fârâ s-hibâ ananghi s-agiungâ tu instanțâ.
Autor: Mihai Pelin
Apriduțearea: Aurica Piha
