Pensiile speţiali pi agenda-a Senatlui
Senatorlli români lipseaşti s-bagă ti votari proiectul di reformă a Executivlui mutrinda pensiile speţiali.
Leyla Cheamil, 27.03.2023, 13:34
Ti va s’facă cu pensiile speţiali cari lă yinea andrală a autoritățlor di la București, tră aţea că actuala turlie a nomlui nu s’ncadreadză tru căftărli a Comisillei Europeane și niţi tru căftărli a Băncăllei Mondiale? Tru România, ari un şingiru di categorii ti ahări pensii, cari nu au la thimelliu principiul a contributivitatillei, ntră cari aţeali a magistrațlor, a militarilor și a diplomațlor. Tru Uniunea Europeană, Suedia easti goala văsilie cari nu are ici pensii speţiali.
Până tu bitisita aliştei stămănă, Senatul lipseaşti s’da un vot ti proiectului di reformă a pensiilor speţiali pripus di Guvern. Ma s’hibă di s’năstreaţi vadelu, documentul va s’hibă adoptat tru pi tăcuta, tru calitate di prim for sesizat, şi s’hibă pitricutu la Camera a Deputaţlor. Proiectul di nom a Executivului ari tu scupo ñîcurarea a hărgiloru cu pensiile şi indemnizaţiile di lucru, jalon inclus tru Planlu Naţional di Redresare şi Rezilienţă (PNRR).
Alăxerli pripuse mutrescu făţearea isapi a pensiilor di lucru, nkisinda di la vicllimea tru specialitate, ñicurarea a procentului di calcul raportat la venitul amintatu, stagiul di contributivitate minim hiinda idyea cu aţelu aplicat tru sistemul public di pensii. Niţi ună pensii di lucru nu va s’poată s’năstreacă veniturile amintati tru perioada activă, (…) pensiile di lucru va s’hibă fapti isapai andicra di contributivitateˮ, să spuni tru expunerea di motive a proiectului di nom. Şeflu a statului, Klaus Iohannis, spunea, săptămâna trecută, că proiectul di nom lipseaşti s’mutrească s’aibă tu scupo un sistem di pensii corect, echitabil şi sustenabil.
Tu arada a lui, liderlu a Partidului Social Democrat, Marcel Ciolacu, easti di păreari că România nu pierdi niciun euro ditu Planul Naţional di Redresare şi Rezilienţă, iar nomlu mutrinda reforma pensiilor spiţiali lipseaşti s’hibă faptă cu acăţarea tu isapi a realităţloru ditu aestă oară, ntră cari cundille polimlu ditu viţiinătatea ali Românie. Liderlu social-democrat aproaki că s’feaţiră şi inechităţ, ama deadi asiguripseri că, tru yinitor, aestu lucru va s’hoibă corectat.
Di altă parte, reprezentanţăllii ali opoziţie ma multi ori arada, partidile di la putere că nu voru ună cadealihea reformă a pensiilor speţiali. USR lugurseaşti că partidile ditu suţata ţi easti la guvernare suntu hăzări s’keară miliardi di euro ahărdziti ti dezvoltarea a văsiliillei maş tra s’favorizeadză ndauă cătigurii di lucrători.
Deputatlu USR Cristian Seidler spusi că proiectul di nom ari un impact multu modestu ti hărgili bugetare cu pensiile speţiali. Lipseaşti mult curayiu, tră aţea că ceareia tehnică easti multu aplo, ama tamam curayilu nu easti tu sinlu a guvernului actual tră s’facă aestă reformă pi cari u caftă tută suţiitatea româneascăˮ, nica spusi Cristian Seidler.
Autoru: Leyla Cheamil
Armânipsearea: Taşcu Lala
