Perspectivi icunumiţi regionali
Bucureştiul fu, Luni şi Marţâ, vâsâlia iu s-ţânu Summit-lu UE ti Europa di Sud-Estu, cu tema Pi calea câtâ stabilitati şi crişteari”, andreptu di cânâscuta publicaţii britanicâ “The Economist”.
România Internațional, 21.10.2014, 12:12
Bucureştiul fu, Luni şi Marţâ, vâsâlia iu s-ţânu Summit-lu UE ti Europa di Sud-Estu, cu tema Pi calea câtâ stabilitati şi crişteari”, andreptu di cânâscuta publicaţii britanicâ “The Economist”.
Specialişţâ, emburi şi oficialităţ dit Românii, Albinişii, Gârţii, Italii, Republica Moldova şi Croaţia zburârâ ti perspectivili di turlii politicâ, icunumicâ şi di afaţeri ti aestâ regiuni. Mouabetea fu şi pi temi mutrinda climatlu icunumic şi di afaţeri dit sud-estul ali Europâ, perspectivili dit sectorulu bancar, oportunităţli ti investitoril’ii dit vâsâliili dit regiuni tu domenea ali energii, ali infrastructurâ, a telecomunicaţiilor icâ ali tehnologii mutrinda informaţia.
Reprezentanţâl’ii “The Economist” aspusirâ că perspectivili di crişteari ti aestâ regiuni armân buni, pozitivi, ama proţeslu di stabilitati nica va s-hibâ greu şi s-poati s-hibâ afectat ti aţea că reformili structurali nu furâ nica bitisiti, di efectili a catandisâl’ei dit Ucraina mutrinda nâscânti icunumii mări, cum easti Ghermânia, ama şi că politica a Bancâl’ei Centralâ Americanâ dzâţi că tricu chirolu a dolarlui ieftin.
Hiindalui la evenimentu, premierlu Victor Ponta dzâsi că andridzearea Bucureşti a conferinţâl’ei The Economist” confirmâ lucrul că România easti vidzutâ ca hiinda nai ma stabila vâsâlii, cu unâ mari puteari di împrustari – dit unâ regiuni cu catandisi greauâ, cu baia provocări.
El a mai spusi că România, prit strategia ţi u caftâ, poati s-agiungâ, tu an’ii ţi yin, nu maşi la independenţâ di turlii energeticâ, ama poati s-agiungâ şi exportator tu regiuni.
Ponta pistipseaşti că Bucureştiul poati, prit experienţa di pânâ tora, s-andrupascâ vâsâliili dit Balcan’ii di Vestu, ţi s-andreg s-intrâ pi calea a integrarâl’ei europeanâ. Şi aţei di ma ninti premieri – italian, Enrico Letta, şi grec, George Papandreu, zburârâ ti rolu di mari simasii pi cari România poati s-l-u aibâ tu Europa di Sud-Estu.
Aţel di ma ninti cap a Guvernului di Roma dzâţi că UE lipseaşti, cităm “unâ Românii cari s-nu mutreascâ maşi di nâuntru, ama şi cari s-aibâ unâ abordari europeanâ, cari s-va s-gioacâ un rol di lider”.
Rolu di lider — dzâsi Letta — caftâ tin’ii şi responsabilitati, ti aţea pistipsescu că responsabilitatea şi năulu rol ali Româniii tu Europa suntu tora niscânti dit lucârli di nai ma marea simasii.”
Şi aţel di ma ninti premier grec dzâsi că România poati s-hibâ unâ apunti di comunicari întrâ Europa şi viţin’ii a ei dit Estu. Criştearea ali UE, prit integrarea a vâsâliilor dit Balcani va s-aibâ efecti pozitivi multu mări tu ţi mutreaşti ligâturli di dauli pârţâ icâ regionali, spusi Papandreu. Tut el adâvgă că România easti un exemplu di amintari tu Balcani şi tu UE şi poati s-inspirâ şi alti vâsâlii dit regiuni.
