Perspectivi polititi
Anlu 2015 easti, tru România, un an cu mizi electorali ma multu ama, minutisi. După localili şi legislativili dit 2012, după europarlamentarili şi prezidenţiallili dit 2014, anlu aestu va s-tana masi alidzeri parţiali. Va s-hiba tru agioc mandati di senatori şi deputaţ vacantati prit demisii, moarti ica condamnări tru dosari di corupţie. Chisata di procurori, cari ncl’isira cabaia dit arada a primarlor di munitipii şi prezidenţa di consilii judeţeni, şi administraţia locală va sa znuiasca tru mesl’i ti yin. Ase că scena politică va s-aiba tru amprotusa, spun comentatorl’i, limbidzari, astirneri, repoziţionări şi reglări di conturi nauntrul a partidilor. Di doi ani ş-giumitati prota-avyiulie a guvernilor di Bucureşti, PSD easti şi partidlu nai ma mari, şi partidlu cu nai ma mari problemi.
Bogdan Matei, 05.01.2015, 13:11
Anlu 2015 easti, tru România, un an cu mizi electorali ma multu ama, minutisi. După localili şi legislativili dit 2012, după europarlamentarili şi prezidenţiallili dit 2014, anlu aestu va s-tana masi alidzeri parţiali. Va s-hiba tru agioc mandati di senatori şi deputaţ vacantati prit demisii, moarti ica condamnări tru dosari di corupţie. Chisata di procurori, cari ncl’isira cabaia dit arada a primarlor di munitipii şi prezidenţa di consilii judeţeni, şi administraţia locală va sa znuiasca tru mesl’i ti yin. Ase că scena politică va s-aiba tru amprotusa, spun comentatorl’i, limbidzari, astirneri, repoziţionări şi reglări di conturi nauntrul a partidilor. Di doi ani ş-giumitati prota-avyiulie a guvernilor di Bucureşti, PSD easti şi partidlu nai ma mari, şi partidlu cu nai ma mari problemi.
Multu greali, aesti prublemi, tra social-democraţ, ti furn’ia ca nu fu anticipată di niti un sondaj, chirearea dit brumar – a premierlui Victor Ponta la prezidenţiali – nu fu nica ciumulita di activlu di partid. Stânga nu mata ari amintata prezidenţil’a di 14 di an’i, cându Ion Iliescu ş-aminta atel dit soni a lui mandat. Şi s-aştepta ca, aşi cum u păţara Adrian Năstase după eşeclu dit 2004 şi Mircea Geoană după atel dit 2009, PSD s-tragă mana ş-tora di candidatlu cari li chiru alidzerli. Dupu declaraţiili a lui, Ponta işisi nu easti apufusit pan di mardzina s-candideadza, la congreslu extraordinar dit meslu martu, la succesiunea isis tru caplu a partidlui. Niti PC, un ditru partenerl’i juniori a PSD la guvernari, nu ahurheasti anlu sum auspitii senini, după ti isira tru migdani niachicaserli anamisa di prezidentul tru exerciţiu, ministurlu ali Agricultura, Daniel Constantin, şi thimil’iusitorlu ali formaţiuni, mogulu Dan Voiculescu, pitricut tru hapsani tra dzati an’I tru un proces di corupţie.
Presa speculeadză că ampartarea anamisa di mayistru şi calfa poati sa scoata tru videala una arupeari şi nauntrul a partidlui, anamisa di atea ti jurnalistil’I lu numasescu nostalgitl’i a brandului Voiculescu şi, respectiv, lucizl’ii cari s-acata scurtică pi tinirlu lup Constantin. Niti dreapta, ti easti tru opoziţie, nu ştie nica s-chivernisească ti bitisita va s-aiba, tra ea haracoapa, a scrutinlui prezidenţial, amintat di atel di ma ninti lider liberal Klaus Iohannis. Aestu fu stipsit, dupu pirdeadz, că u baga tru prota thesi favorita, tinira şi niexperimentata Alina Gorghiu, tru loclu a lui la capia a PNL, dinintea a unui veteran cilastisitor cata cum Ludovic Orban. Complicaţie suplimentară tra una formaţiune tru cari libirtatea di opinie fu tru amprotusa totna tru ti mutreasti unitatea di niminari, libearalii lipseasti s-chiverniseasca anlu aestu şi laborioasa fuziuni, tru un mari partid di dreapta, afiliat la PPE, cu liberal-democraţl’ii.
Cu cari, tru 25 di an’i di democraţie post-comunistă, fura ma multu tru raporturi di rivalitate serta andicra di un lucru deadun tru parei. Neise, 2015 va s-hiba anlu a anvartusearil’ei ica, ici aestu lucru, dimec a invalidaril’ei polititi a dauă formaţiuni relativ nai. Partidlu Liberal Reformator (la co-guvernare), a fostului premier Călin Popescu -Tăriceanu, şi Partidlu Minarea Populară (tru opoziţie), tru caplu a curi easti aştiptat s-intra pi ipotisi ex-şeflu a statlui, Traian Băsescu, va s-poata s-faca isapea desi liderl’ii a lor pot s-aiba s-ma largu, vara turlie, una tin’ie politica.
Armanipsearea: Tascu Lala
