Politiţ di turlii bancarâ
Banca Naţionalâ ali Românii n’icşură dobânda di politicâ monetarâ cu 0,25 di puncti proţentuali, la 3,25% pi an, ahurhinda dit 5 di Avgustu. Easti doua oarâ estan cându BNR scadi dobanda dupu ţi, tu Şcurtu, aestâ dit soni s-n’icşură di la 3,75, la 3,5 %. Cu ahtari lucru, BNR lâ dzâţi a instituţiilor bancari comerţiali s-nu alasâ-nghios dobzânzili la depoziti şi, pi di altâ parti, s-bagâ iara cu practico creditarea, ama pi un bun timel’iu.
România Internațional, 05.08.2014, 11:36
Banca Naţionalâ ali Românii n’icşură dobânda di politicâ monetarâ cu 0,25 di puncti proţentuali, la 3,25% pi an, ahurhinda dit 5 di Avgustu. Easti doua oarâ estan cându BNR scadi dobanda dupu ţi, tu Şcurtu, aestâ dit soni s-n’icşură di la 3,75, la 3,5 %. Cu ahtari lucru, BNR lâ dzâţi a instituţiilor bancari comerţiali s-nu alasâ-nghios dobzânzili la depoziti şi, pi di altâ parti, s-bagâ iara cu practico creditarea, ama pi un bun timel’iu.
Guvernatorlu BNR, Mugur Isărescu dzâsi: Zborlu a nostu easti aestu, icâ instutuţiili bancari lipseaşti s-ducheascâ că tricurâ un greu proţes, cu unâ mari dependenţâ icâ linii di finanţari tu plan externu, maxus di la instituţiilie bancari- mamâ. Câftăm aluştor instituţii bancari s-aibâ tora unâ bunâ viziuni, şi s-yinâ aproapea di clienţâ, s-creascâ timel’iu di creditari şi s-lucreadzâ deadun cu clienţâl’ii ta s-aflâ proiecti buni ti adrari. Aestu lucru, că taha nu ari proiecti tu Românii, pari s-hibâ vârâ scuzâ. Easti şi borgea a lor, cum s-dzâţi, s-adarâ un business dealihea, maca lucreadzâ cu clienţâl’ii”.
Tu idyul chiro, cumândisearea a Bancâl’ei Ţentralâ apufusi s-nu creascâ, ni sâ scadâ ratili a rezervilor minimi zorlea tu ţi mutreaşti bâgarea tu practico a pasivilor tu moneda naţionalâ şi valutâ a instituţiilor di credit la nivelu di 12, icâ 16 proţenti. Pi di altâ parti, BNR pistipseaşti că inflaţia va s-agiungâ di la 3,3% la 2,2% tu inşita al 2014, ama şi la 3% tu bitisita al 2015. Tu aestâ catandisi, Mugur Isărescu apruchie ca Banca Ţentralâ s-poatâ s-apufuseascâ unâ nauâ scâdeari a dobândâl’ei cl’eai, maca linia di scâdeari ali inflaţii easti pi cali lungâ.
Tut el dzâsi că BNR va s-mutreascâ, tu apofasili yinitoari, şi că dobândzâli la depoziti agiunsirâ negativi tu multi vâsâlii, iara instituţiili bancari locali s-ayun’iescu sâ n’icşureadzâ dobândzâlii la icunumii, nu la crediti, atunţea cându Banca Ţentralâ scadi dobândzâlii di politicâ monetarâ.
Şi icunumistul-şef al BNR, Valentin Lazea, dzâsi, tu un interviu ti AGERPRES, că România tin’iseaşti ti prota oarâ tuti ţinţi criterii ţi lipsescu ti apruchiarea a monedâl’ei euro şi şeadi multu ghini la criteriili di convergenţâ susto câtâ zona euro. El mai dzâsi, ama, ş-că pi chiro lungu ari piriculi ţi pot s-adarâ cama lai aeastâ catandisi.
Ofiţialu BNR spuni că tuţ factorl’ii ţi agiutâ la formarea a PIB-lui potenţial suntu pi aspârdzeari, icâ şi capitalu şi forţa di lucru. Tu minduita a lui, ti andridzearea aliştei catandisi lipseaşti luarea di pâradz europen’i şi meatri mutrinda apruchiarea a investiţiilor xeani. Lazea dzâsi ş-că ameliorarea a forţâl’ei di lucru caftă politiţ cama buni pronatalisti şi di imigrari, iara productivitatea nu poati s-creascâ fârâ unâ alâxeari mutrinda domenea a înviţâmintului, ali educaţii.
