Premieră tră tenislu românescu
Agiucătoarea română di tenis Simona Halep s-califică tru finala turneului di Mare Şlem di Wimbledon. Easti prota româncă agiumtă vărăoară tru atel dit soni actu ti proba feminină di simplu a nasi cama marlui turneu pi iarbă dit lumi. La simplu masculin, dit România, maşi Ilie Năstase ari agiumtă tru finala di Wimbledon, ama chiru di dauă ori: tru 1972, dinintea a americanlui Stan Smith, şi tru ’76, fu azvimtu di suedezlu Björn Borg.
Florin Orban, 12.07.2019, 11:42
Agiucătoarea română di tenis Simona Halep s-califică tru finala turneului di Mare Şlem di Wimbledon. Easti prota româncă agiumtă vărăoară tru atel dit soni actu ti proba feminină di simplu a nasi cama marlui turneu pi iarbă dit lumi. La simplu masculin, dit România, maşi Ilie Năstase ari agiumtă tru finala di Wimbledon, ama chiru di dauă ori: tru 1972, dinintea a americanlui Stan Smith, şi tru ’76, fu azvimtu di suedezlu Björn Borg.
Gioi, tru semifinale, Simona u antricu agiucătoarea ucraineană Elina Svitolina, cu 6-1, 6-3. Vidzu zori tru protili dauă game-uri, ama deapoa u azvimsi/ domină limbid. Tru doilu setu s-agiucară echilibrat până la 3-3, după cari Halep numata putu tra s-hibă dănăsită.
Ti alumta cu Svitolina, Simona declară: “Ază fu ună presiune cabaia mari, ti furn’ia că meciurli contra a l’ei daima fură greale şi mi ari bătătută di ndauă ori tru finale. Steam că lipseaşti s-agiocu giuneasti şi maca aprăfăsiiu aestu lucru mi spunu haristusită di atea ti am lucrată până tora şi di turlia profesionistă tru cari agiucaiu. U spun dit inimă, nu nyisamu s-agiungu tru finală, anyisamiu maşi s-amintu cathi meci şi ăn’i băgaiu tu minti s-amintu cathi meci pi cari li-agiucaiu şi s-agioc ma ghini cathi dzuă. Lucru ţi s-feaţi, a deapoa, aestu lucru mi feaţi tra s-escu cama cu pistusini tru mini”.
Tru finală, românca va s-agioacă diznău cu Serena Williams, dinintea a curi amintă, până tora,maşi unăoară, ama chiru di nauă ori. Agiucătoarea americană ari tru palmares, ntră altili, şapti trofee amintati la Wimbledon, protlu tru 2002 a deapoa atel dit soni, tru 2016. Tru semifinala di gioi, Williams u azvimsi agiucătoarea cehă Barbora Strýcová cu 6-1, 6-2.
Ti alumta di sâmbătă, cu Williams, Simona spusi: “Nu minduiiu cum va s-agioc. Măni va s-minduescu ti aestu lucru. Toraseara nu voi s-minduescu la tenis. Voi s-mi hărsescu ti atea ţi s-faţi. Cadealiha că nu am ici ţiva ti-a chireari. Vă spun aestă dit inimă. Va s-cilăstăsescu multu di multu şi voi s-agioc cât cama ghini, s-mi antrecu mini işişi. Va s-videm ţi va s-iasă”.
Simona Halep easti, tru aestu chiro, numirlu şapti mondial. Fu tru caplu a clasamentului WTA chiro di 64 di stămân’i. Amintă, tru carieră, 18 di turnee WTA, dit cari unu di Mari Şlem, anlu ţi tricu, la Roland Garros. Amintată tru 27 di yismăciuni 1991, Custanţa, Simona Halep debută tru tenislu mari tru 2006, cându avu protili a l’ei agiocuri tru circuitlu ITF. Tru 2010, agiumsi tru Top 100. Tru 2014, tru meslu agustu, agiumsi prota oară pi loclu 2 tru ierarhia mondială, loc cari eara tru atel chiro poziţia nai cama analltă ti u avu vărăoară ună sportivă dit România. Tru sumedru 2017 agiumsi pi protlu loc tru clasamentul mondial, poziţie ţi u chiru tru yinaru 2018. Agiumsi diznău pi protlu locu tru idyiul an, tru meslu şcurtu, şi armasi lider mondial până tru ahurhita a alustui an, după Openlu ali Australie.
Autor: Florin Orban
Armânipsearea: Taşcu Lala
