Premierlu Ponta, dinintea ali una moţiuni di cenzură
Protlu prim-ministru ali Românie post-comunista pusputit penal tru chirolu a mandatlui, Victor Ponta nu apruche em stepsurli a procurorlor, em caftarli a prezidentului Klaus Iohannis şi ali opoziţie liberala tra s-da demisia. Ase că a aistui dit soni nu al’i armasi ca masi recursul la una nauă moţiune di cenzură contra a Executivlui. Simnat di 180 di parlamentari – liberali, independenţa şi dit gruplu democrat şi popular –, documentul spuni că Ponta numata poate s-cumanduseasca Guvernul, după ti fu pitricut tru giugico di DNA tra fapte di corupţie. Falsu tru ngrapseri sum vulă privată, complicitate la evaziune fiscală şi paradz pi laea suntu capitili di stipseari contra a lui, ti li au procurorl’i tru un dosar mutrindalui simnarea a nascantor contracti di asistenţă juridică la companiile energetice Turceni şi Rovinari (sud).
Bogdan Matei, 22.09.2015, 15:56
Protlu prim-ministru ali Românie post-comunista pusputit penal tru chirolu a mandatlui, Victor Ponta nu apruche em stepsurli a procurorlor, em caftarli a prezidentului Klaus Iohannis şi ali opoziţie liberala tra s-da demisia. Ase că a aistui dit soni nu al’i armasi ca masi recursul la una nauă moţiune di cenzură contra a Executivlui. Simnat di 180 di parlamentari – liberali, independenţa şi dit gruplu democrat şi popular –, documentul spuni că Ponta numata poate s-cumanduseasca Guvernul, după ti fu pitricut tru giugico di DNA tra fapte di corupţie. Falsu tru ngrapseri sum vulă privată, complicitate la evaziune fiscală şi paradz pi laea suntu capitili di stipseari contra a lui, ti li au procurorl’i tru un dosar mutrindalui simnarea a nascantor contracti di asistenţă juridică la companiile energetice Turceni şi Rovinari (sud).
Tru idyiul dosar, fostul ministru a Transporturilor tru cabinetlu Ponta, senatorlu PSD Dan Şova, easti pusputit penal tra complicitate la abuz tru serviciu, ti furn’ia ca s-pari ca ari loata suti di n’il’i di euro tra achicaseri prit cari statlu fu zn’iipsitu cu cama di 16 miliun’i di euro. Parlamentarl’ii di la puteari, spun iniţiatorl’ii a moţiunil’ei, lipseasti s-aleagă anamisa di interesile a cetăţean’ilor şi ateali a premierlui. Ia ti spusi liderlu a gruplui PNL dit Camera a Deputaţlor, Eugen Nicolăescu: Easti zori ca un ahtari premier s-reprezinta una vasilie ca România. Easti zori ca un ahtari premier nica sa zburasca, cu vara posibilitate tra s-apraftaseasca s-adara tiva tra vasilia a noastră. Cara aestu premier nica va s-hiba tru caplu ali Românie, România poate s-hiba lugursita una vasilie cari aveagl’e corupţia.”
După ti cabinetili cumandusiti, tru atel’i trei an’i ş-giumitati, di Ponta tricura cu brio testi di idyea turlie, libearal’i minduescu că aestă moţiune di cenzură easti prota cari ari şansi alithea s-treacă şi, ti atea, tru perioada yinitoari va s-pazarapseasca cu tuti partidile parlamentari, tra ş-asiguripseasca ateali 276 di voturi — giumitati s-nica una dit totalu a aleptalor – di cari easti ananghi tra surparea a Guvernului. Cara, extrem di probabil, deputaţl’ii şi senatorl’ii UDMR (tru opoziţie) va s-voteadza, ici tiva nu-l’i ndiptăţeaşti, nica, pi iniţiatori s-bagă besa pi defecţiuni tru arcul guvernamental PSD-UNPR-ALDI. Până tora coaliţia lucra hairlatic fără sincope, a deapoa luni, un câti un, liderl’ii a aistei şi znuira angajamentele di loialitate andicra di premier.
Vara turlie haristusit di declaraţiile a lor, Ponta spuni că: Lipseasti s-dutem ninti guvernarea, căte easti una guvernari bună. Niti barim atel’i di la PNL nu spun că guvernarea nu easti bună, au el’i una problemă cu mine, ama tută lumea easti simfuna că, dit videala economica şi sociala, lucarlu lu adram şi nidzem ma largu.” Până la dezbaterea şi votlu ti moţiuni ari nica una stămână şi masi una goada di teatru, spun comentatorl’i, poati sa ua slagheasca majoritatea cari-lu ndrupasti premierlu. Tut el’i cundil’eadza, ama, că scena politică di Bucureşti ambartiteadza goada di teatru.
Ngrapsearea: Bogdan Matei
Armanipsearea: Tascu Lala
