Pruvidearea a FMI mutrindalui icunumia ali Românie
Icunumia româneascâ va s-creascâ preayalea tu kirolu ți yini – dzâcu experţâlli FMI.
Tașcu Lala, 25.10.2025, 07:38
Fondul Monetar Internaţional (FMI) alâxi, cu unâ crișteari ñicâ, pruvidearea icunomicâ globalâ, la 3,2% ti estanu. Experţâlli a Fondului dzâcu că pâhadzlli bâgaț ti importuri di prezidentul american, Donald Trump, adusirâ ma pțânâ zñie di cumu s-aștipta. Ama, tu unu raportu ți mutreaști tuti vâsiliili a lumillei, ei alâxirâ pi scâdeari pruvidearea di crişteari a icunumillei ali Românie ti 2025, luyursindalui unâ crișteari di mași 1 proțentu, andicra di 1,6 tu sutâ, câtu luyursea tu meslu apriiru, şi di 3,3 proțenti, câtu eara criștearea tu meslu sumedru, anu.
Instituția finanțiarâ internaționalâ nu ari nâdie niți ti kirolu ți va s-yinâ ti scâdearea ali Românie a xikillei di contu curentu. Uidisitu cu năili luyurseri, xikea va sâ scadâ mași pânâ la 8% ditu Produslu Internu Brutu (PIB) estanu, andicra di unâ scâdeari di pânâ la 7,6% ditu PIB cumu eara pruvidzutu tu primuvearâ. Anlu ți yini, ama, xikea di contu curentu ali Românie va sâ scadâ pânâ la 6,6%, unâ pruvideari cama bunâ di ațea ditu meslu apriiru – 7,4 proțenti.
FMI alâxi multu și pruviderli mutrindalui evoluția a pâhadzloru di hărgi tu Românie, ți va s-hibâ di arada 7,3% tu 2025 și 6,7% tu 2026. Ma s-fâțemu biani, tu meslu apriiru, Fondul luyursea ti Românie unâ crișteari di mesi tu anu a pâhadzloru di 4,6% tu 2025, și mași 3,1% tu 2026.
Tu ți mutreaști rata a șomajlui tu Românie, aestu va s-creascâ cu giumitati di proțenti, la 5,9%, ta sâ scadâ mași niheamâ tu 2026. Fondul criscu, ama, multu pruviderli ti inflaţia ditu Românie, luyursindalui tora unâ inflaţie di mesi tu anu di 7,3% ti estanu ş-di 6,7% ti 2026.
Pruviderli furâ scoari tu padi cu furñia a andamusillei di toamnâ a Fondului Monetar Internațional ș-ali Bancâ Mondialâ, ți s-dizvârteaști stâmâna aesta, Washington.
Ti Românie, anyrâpseaști presa di spețialitati, năili pruvideri suntu idyea cu ațeali bâgati tu raportul aspusu melsu ți tricu, tu bitisita a vizitâllei Bucureşti ali unâ misiuni a Fondului. FMI ari unâ luyurseari cama pi buna di Banca Mondialâ tu ți mutreaști icunumia româneascâ. Isăkili fapti di pțânu kiro ti Ivropa ș-Asia Țentralâ scoasi tu migdani, stâmâna ți tricu di Bancâ, luyursescu că România va s-aibâ unâ crișteari di mași 0,4% estanu şi 1,3 anlu ți yini. Banca Mondialâ dzâți nica că kivernisea di Bucureşti s-alumtă cu unâ xiki fiscalâ ți tricu di 9% ditu PIB anu ș-bâgă tu practico unâ pachetâ di anvârtușari fiscalâ ți avu emu scâderi di hărgi, cata cumu suntu dânâsearea a cirștearillei a tiñiiloru di cathi mesu ș-a pensiilor publiți, emu taxi cama mări. Bucureşti, luyurserli ditu soni ali Comisie Naţionalâ di Strateghie şi Prognozâ aspunu unâ crișteari a PIB di 0,6% ti estanu ş-di 1,2% ti 2026.
Autor: Bogdan Matei
Apriduțearea: Mirela Biolan
