Raportulu ali UE mutrinda statlu di dreptu
Corina Cristea, 21.07.2021, 12:50
Comisia Europeană publică, marță, raportul ti statlu di dreptu tru statili membri ali Uniuni. Independența ali justiție, libirtatea-a presăllei ica alumta antiaruşfeti suntu minutişu mutriti tru cadrulu a aluştui instrument anual, aflat la a daua ediție. Raportul ari spuneri punctuali tră majoritatea-a aţiloru 27 di membri ali Uniuni Europeană, ama probleme sistemiţi mutrescu maxus Ungaria și Polonia – spusi comisarlu tră Justiție, Didier Reynders. Aluştoru dauă, a curi lă si caftă giueapi ti independenţa ali justiţie şi libirtatea a presăllei, lă si advgă și Slovenia, cutugursită și ea tră ună aspărdzeari a libirtatillei mass-media. Di altă parti, catastisea-a presăllei easti un subiectu major di găilipseari: “tru multi stati ali Uniunii s’veadi ună crișteari a fuvirserloru, prişcăviiloru fapti contra a jurnaliștilor” – cundille și viţe-prezidenta a Comisiillei Europeani, Vera Jourova.
Tru cazlu ali României, raportulu spuni, tru ma marea parti, ti reformele ditu Justiţie. S’agiumsi pi isapea că suntu pi calea ti dizvărteari gaereţ tră revizuirea-a alăxerloru — sertu cutugursiti – adusi a legislaţiillei tru perioada 2017-2019 și suntu expusi găilipseri mutrinda existența-a Secţiillei Specială di Investigari a Infracțiunilor ditu Justiție. Iniţiativa di ncllideari a aliştei Secţii lipseaşti s’acaţă calea a dreptului european – spuni Comisia. Aducăndalui aminti ună apofasi a Curtillei Constituționali ali Românie cari statuă, tora ayoñea, că nomlu di thimelliu naţionalu easti ieararhicu superioru atumţea cându giudicătorlli lipseaşti să s’raporteadză la dreptul european, Comisia Europeană spuni, alliumtrea, dimecu că, aestă turlie, agiundzi s’hibă pi dauă principiulu a supremaţiillei legislaţiillei comunitară.
Uidisitu cu Vera Jourova, legislaţia europeană ari prioritati dinintea a aţilloru naţionali și tuti apofaili a Curtillei Europeani di Justiţie suntu obligatorii tră autorităţli şi instanţili ditu statili membri. Raportul ali Comisie nica cundilleadză, ntră altili, că dificitlu di personal armâni s’hibă ună cilăstăseari tru Justiția românească. Tru andreu 2020, aproapea 10% ditu locurli di giudicători şi aproapea 16% ditu aţeali di procurori eara vacante, cu impactu şi ti hăirlăticlu a sistemlui. Deapoa, dacă prividearea ditu 2018 ţi dădea izini ti pensionarea ninti di kiro a magistraţlor cu ună vicllimi di 20 añi fu abrogată di Parlamentu tru marţu anlu aestu, aproapea 300 di magistraţ işiră la pensie tru 2020 şi aproapea 250 tru protlu trimestru ditu aestu an, di u creaşti nica ş-cama multu ixikea di personalu.
La capitolu aruşfeti, Comisiacundilleaqdză că percepţia anamisa di experţă şi şeflli di companii easti că nivelu aliştei lăngoari tru sectorlu public armâne analtu, ama — adavgă Executivlu comunitar – anchetili şi sancţionarea ali aruşfeti pi livelu di mesi şi analtu armasiră cu hăiri. Neise, Comisia Europeană spuni că tru România ma largu suntu raportati proţesi tră agudeari şi nitiñiseari arcati pi skiniratlu a niscăntoru jurnalişti di investigaţie.
Autoru: Corina Cristea
Armânipsearea: Taşcu Lala
