Ripublica Moldova, pi calea ivropeanâ
Prezidenta ali Ripublicâ Moldova, Maia Sandu, zburâ ti lucrâli di prota thesi tu politica di nafoarâ tu 2026.
Tașcu Lala, 04.02.2026, 23:50
Țânearea a irinillei ș-a libirtatillei suntu lucârli di thimelliu ti sigurlâchea şi criștearea ali Ripublicâ Moldova, dzâsi prezidenta Maia Sadu.
Tu unâ conferinţâ di presâ, iu zburâ ti lucârli di prota thesi a instituţillei prezidenţialâ ti 2026, şefa a cratlui dzâsi nica unâ oarâ că proțeslu di aprucheari tu Uniunea Ivropeanâ armâni un lucru di prota thesi şi easti „nai ma dealihea strateghie di dezvoltari” ti ripublica sovieticâ ma ninti, cundillindalui că lipseaști s-lucreadzâ cușia tora, cându vini oara, ta s-poatâ s-veadâ hâiri di crișteari.
Tu dumeanea a politicâllei di nafoarâ, Maia Sandu dzâsi că Ripublica Moldova ș-adarâ ma vârtoasi suțatili cu partenerilli, dirmi cu UE şi România ca sturi strateghiț, şi va s-andrupascâ ma largu Ucraina. Maia Sandu cundille că politica di nafoarâ şi sigurlâchea armân lucârli di prota thesi di cara ari unâ catastisi internaţionalâ nisiyurâ, lucurlu deadun anamisa di craturi scâdzu și s-veadi tut ma multu filisearea a hâlățlor hibridi. Arusia armâni, dupâ cum dzâți șefa a cratlui, prorlu izvur di aspârdzeari a zigâllei tu reghiuni, iara polimlu easti ma largu un piriclliu mari. Tu aestâ catastisi, ti vâsilia a llei angreacâ multu țânearea a irinillei şi țânearea susto tu lumea libirâ şi dimucraticâ, luyurseaști Maia Sandu.
Ea dzâți nica că, atumțea cându ndreptul internaţional easti bâgat sum un semnu di antribari, craturli au ananghi di soț vârtoși. Ași, apruchearea tu Uniunea Ivropeanâ armâni nai ma di simasie proiectu strateghic, ți easti spus ca hiindalui di thimelliu ti bânari și crișteari.
Maia Sandu: “Politica di nafoarâ ali Ripublicâ Moldova va s-mutreascâ s-aibâ soț vârtoși ti vâsilia a naostâ, di pistusini, pragmatiț. Nai ma di simasie parteneriat ti noi easti Uniunea Ivropeanâ. Tutnâoarâ, ligâtura strateghicâ cu România easti un stur di thimellu ti sigurlâchi, stabilitati şi dezvoltari, cata cum ș-ti calea a noastâ ivropeanâ.”
Prezidenta zburâ di „un chiro cu hâiri șcurtu” ti apruchearea ivropeanâ ş-di ananghea ti lucru multu mari, tamam ș-di ţânearea a andruparillei a tâtâlor aților 27 di craturi membri.
Tu dumeanea a sigurlâchillei ş-a rezilienţâllei, va s-angreacâ ma multu pi prevenţie, reacţie ayuñisitâ și afirearea a spaţiului aerian. Tu 2026, Ripublica Moldova va s-aibâ un nău radar dat di Uniunea Ivropeanâ ca andruapri ți nu va pâlteari ta s-poatâ s-dânâseascâ fuvirserli aeriani, tamam ș-dronili.
Pi di altâ parti, alumta contra ali arușfeti ş-duțearea ma largu ali reformâ a giustiţillei armâni pi aghenda prezidenţialâ, arada di fâțearea susto a ligâturillei cu diaspora. Maia Sandu dzâsi că instituţia prezidenţialâ va s-andrupascâ gairețli di turnari a moldoveñilor acasâ, cundillindalui că nai ma buna culai ta s-dânâseascâ migraţia easti fâțearea ma bunâ, tamam a giustiţillei ş-a mediului di emburlâchi.
Aduțem aminti că, Ripublica Moldova apruche statutlu di vâsilie candidatâ tu 2022. Pâzârâpserli di aprucheari furâ dișcllisi ufițial tu 2024. UI și Ripublica Moldova lucreadzâ deadun, tutnâoarâ, tu arada a Parteneriatlui dit apiritâ.
Autor: Mihai Pelin
Apriduțearea: Mirela Biolan
