Ripublica Moldova şi Ucraina ahurhiră păzărăpserli di aderari
UE dişcllisi păzărăpseri di aderare cu Ripublica Moldova și Ucraina.
Tașcu Lala, 28.06.2024, 17:26
Republica Moldova și Ucraina ahurhiră ufiţialu, marță, proţeslu di aderare la Uniunea Europiană, unăoară cu organizarea-a protiloru conferinţe interguvernamentale. Ufiţialli a instituţiilor europine avură muabeti cu reprezentanţăllii a ţiloru dauă guverne structura şi călindarea a yinitoariloru negocieri şi apufusiră protili capitole la cari ateali dauă state lipseaşti s’facă andridzerli legislative tră s’hibă simfuni cu ndreptulu comunitar. Easti zborlu ti aşi-dzăsili capitole fundamentale, cari andregu legislaţia aferentă a statlui di dreptu, funcţionarea democraţiillei, a libirtăţlor fundamentale, cum şi controlu financiar.
Acă dauli stati fură călisiti ti aderari tru idyiulu kiro la Uniune, imnaticlu a lor s’amparti aoa şi pot s’adera tru momente ahoryea, andicra di progresele fapti. Chișinăul și Kievul ş’pripun s’ţănă paslu iruşi a reformelor, aţea turlie ta s’poată s’adera până tru 2030. Tru paralelu, Comisia Europiană va s’ahuhrească un proces di scanare a legislaţiei aţiloru dauă state tra s-şi pregătească cu kirolu urminiili şi evaluărli.
Premierlu ali Republicii Moldova, Dorin Recean, spune că Kievul și Chișinăul va s’aibă colaborari ma largu.
“Moldova şi Ucraina suntu zniipsiti multu di multu di polimlu ali Rusie şi nă agiutămu multu di multu nu maş tu probleme di securitate, ama şi tru ţi mutreaşti aderarea la Uniunea Europeană, şi ma largu va făţemu aesta” – declară Dorin Recean.
Obiectivlu a negocierilor easti ca Republica Moldova s’agiungă stat membru ali UE, iara ritmolu a negocierilor ţăni di implementarea reformelor tru mod real, substanţial şi ireversibil, cundille și vicepremierul tră Integrare Europeană, Cristina Ghearasimov.
Și reprezentanţăllii a guvernului di Kiev spun că suntu apufusiţ s’avanseadză iruşi cu reformele. Vicepremierul Ucrainei, Olga Stefanishyna, cundille că 90% ditu ucraineni u voru integrarea şi haristusi ali Uniuni că u ţăni tăxearea şi ma largu andrupaşti văsilia a llei.
Prezidentulu Volodimir Zelenski salută lansarea oficială a negocierilor di adirare a Ucrainei la UE, calificânda aestă dzuuă ca hiinda ună istorică tră ună văsilie cari alumtă cama di doi añi di dzăli contra ali aputruseari ruseasca. „Nu va alăximu calea ţi u ankisimu cătă ună Europă unită, cătă casa-a noastră comună a tutulor naţiunilor europeane, ună casă cari lipseaşti s’hibă iriñeatică”, spusi Volodimir Zelenski.
„Viitorul nostru easti tru cadrul ali familie europeană”, spusi şi preşedituta Republicii Moldova, Maia Sandu, cari haristusi tră agiutorlu ţi lu ari di la liderlli a instituţiilor europine.
Di București, șefa diplomației, Luminiţa Odobescu, salute ahurhita-a negocierilor di aderare la UE a Kievlui și Chișinăului şi năpoi spusi că yinitorlu a aţiloru dauă stati easti tru Uniune. Pi un şingiru di socializare, aesta spusi că ahurhearea a negocierilor easti ‘un succes mplin meritat, ţi tiñiseaşti eforturi impresionante’.
Tu arada a llei, przidenta ali Comisie Europeană, Ursula von der Leyen, u feaţi timbihi Ucraina şi Republica Moldova că aestu va s’hibă ună cali greauă’, dar cari dişcllidi ‘oportunităţ cabaia mări’.
Aderare la UE, Comisia Europeana, reforme, Rep Moldova, Ucraina
Autoru: RRI
Armănipsearea: Taşcu Lala
